Fan̈anaovan̈a Azafady Mampisy Fihavanan̈a

“TEN̈A misy vokany fan̈anaovan̈a azafady io. Mahavita mandamin̈y ady ampilaminan̈a, mandravan̈a tsy fifan̈arahan̈a misy amindro firenena aby io, mahavy fanjakana han̈eky fa mijaly vahoaka, baka io mampifandray tsarabe olo tsy fankahazo fan̈anaovan̈a azafady io.” Zen̈y raha nambarany Deborah Tannen, manampahizan̈a aminy Iniversiteny Georgetown Washington.

Koran̈iny Baiboly fa matetiky fan̈anaovan̈a azafady baka amy fô havitan̈a mampihavan̈a olo tsy mifankahazo. Diniha hely baka ohatra araiky ty. Izio fan̈oharan̈a nataony Jesosy momba zanaka adala in̈y. Izy koa fa nody ndreky nan̈ano azafady tamy babany tamy fô jiaby, niraisiny babany antan̈androe izy. (Lioka 15:17-24) Ke atsika tsy tokony ho sarotiny be fa tokony ho von̈ono han̈ano azafady ndreky hangataka familankeloko. Tsy ho sarotro be aminolo manetry ten̈a man̈ano zen̈y.

Ino Vokany Izikoa Anao Man̈ano Azafady?

Hita tamy raha niain̈any Abigaila, man̈angy misy jery taminy Israely taloha tan̈y fa ten̈a misy vokany ankitin̈y fan̈anaovan̈a azafady io. Von̈ono han̈ano azafady izy ndray tsy izy ny diso fa vadiny. Davida taminio tamy tany paiky tan̈y niaraka taminy olonany. Iro tamy fotoan̈a io niaro andiany ondrikondriky Nabala, vadiny Abigaila. Olony Davida koa fa nandeha nangataka mofo ndreky rano tamy Nabala, iro tsy namiany raha foeky. Tsy vitanizen̈y fo fa mbala namiany volandraty koa iro. Neloko mare Davida ke nitondra maramila kadiriny 400 lahy izy hamono Nabala ndreky fianakavian̈anany. Abigaila koa fa naharen̈y zen̈y, direkty izy nandeha nitsena Davida baka io nandohaliky man̈oloan̈a Davida lera iro fanojy. Izy baka io nivolan̈a karaha ty: “A tompoko anao! Sitrany ambilà zaho mibaby hadisovan̈a zen̈y. Avio, ambilà panompovavinao mba hivolan̈a hely, baka io tandrin̈esa raha volan̈iny panompovavinao ô.” Izy amy zay nan̈azava raha jiaby nandalo, baka io namezany hanin̈y ry Davida. Volan̈iny Davida: “Manongà ke mitsodrano anao zaho baka ho avy soamantsara antran̈onao an̈y. Efa narehako volan̈anao avio ikeko fangatahan̈anao in̈y.”​—1 Samoela 25:2-35.

Tsy naty fianakavian̈any Abigaila fotony izy nanetry ten̈a ndreky nan̈ano azafady taminy haratsiampan̈ahiny vadiny in̈y. Nan̈ano mersy izy foeky Davida, nohony Abigaila nisakana izy tsy nahazo trosandio. Marin̈y fa tsy Abigaila nan̈ano raha tsy manjary tamy Davida ndreky olonany aby io. Kanefa, nan̈eky hahazo tsin̈y izy han̈avotan̈a fianakavian̈anany, ke nataony raha hihavan̈ana tamy Davida.

Ohatra araiky koa apostoly Paoly. Hainy tsarabe fotoan̈a tokony hialan̈a tsin̈y na han̈anaovan̈a azafady. Tandraraiky, tsy maintsy niaro ten̈a man̈oloan̈a iro tamy Synedriona na fitsaran̈a ambony tamy jiosy izy. Neloko mare Ananiasy pisoron̈obe fotony Paoly tsotra loatra, ke nirahiny hamango hipy izy olo nitsangana narikitry Paoly tio. Volan̈iny Paoly taminany: ‘Hamango anao koa Zan̈ahary, anao riba nipindarin̈y fotsy io! Anao mipetraka hitsara zaho mifan̈araka amy Lalàn̈a, kanefa anao edy tsy man̈araka izio, ke man̈iraka olo hamango zaho?’ Paoly koa fa nivolan̈inolo fa nanihitihy pisoron̈obe, direkty izy nan̈eky diso, ke nivolan̈a karaha ty: “Rahalahy aby, tsy haiko kony izy pisoron̈obe zen̈y. Zen̈y ankitin̈y raha voasoratra in̈y: ‘Aza mierin̈y pitondra amy firenenanao.’”​—Asan’ny Apostoly 23:1-5.

Izikoa dinihin̈y, marin̈y volan̈a Paoly fotony pitsara zen̈y tsy tokony ho kafiry. Ndray zen̈y, mbala nan̈ano azafady fo izy fotony tafan̈ano volan̈a tsy nan̈aja, arakany fahitanolo sasany izy. * Ke nohony Paoly nan̈ano azafady in̈y, loso von̈ono nitandren̈y izy iro tamy Synedriona io tao. Efa hainy Paoly raha tsy nampitovy hevitry iro tamy fitsaran̈a io tao, ke nambarany iro fa finoan̈a fitsanganan̈a amy maty raha hitsaran̈a izy io. Niteraka adihevitry be raha zen̈y ke loso nilan̈y tamy Paoly iro Fariseo aby io.​—Asan’ny Apostoly 23:6-10.

Ino raha ianarantsika baka amy tantara aroe koran̈iny Baiboly io? Abigaila ndreky Paoly samby nan̈aboaka fa nanen̈iny iro, ke iro afaka nifampikoran̈a tsarabe taminolo nanan̈a alahelo tamindro. Man̈ampy atsika hihavan̈a tsara aminolo koa fan̈anaovan̈a azafady io. Atsika koa man̈eky hadisovan̈antsika ndreky man̈ano azafady aminolo io, hahavita hifampikoran̈a tsarabe atsika.

‘Tsy Zaho Kony Diso Ay!’

Izikoa haintsika fa nampameloko olo raha nivolan̈intsika na raha nataontsika, atsika mety hieritreritry fa sarotiny loatra olo io. Kanefa, Jesosy nivolan̈a tamy pianatranany karaha ty: “Izikoa anao mitondra fan̈amezan̈a hatao aminy alitara, ke iô anao mahatsiaro fa rahalahinao manan̈a alahelo aminao, ambilà alohany alitara iô fan̈amezan̈anao, fa mindao antsendriky mihavan̈a amy rahalahinao. Lera anao mimpody vo man̈atitry fan̈amezan̈anao.”​—Matio 5:23, 24.

Ohatra iziô, mety misy rahalahy araiky mieritreritry fa anao nanota taminany. Jesosy nivolan̈a fa mila man̈ano raha ‘hihavan̈ana amy rahalahinao’ fo anao koa fa misy raha karaha zen̈y mandalo, na izy man̈eky diso na tsy man̈eky. (Diksiônerany Vine Man̈azava Testamenta Taloha Ndreky Vaovao, angiley) Ny marin̈y aminany, anaro roe samy mety ho diso, fotony anaro samy tsy lavorary salakady matetiky tafan̈ano raha tsy mety. Dikanizen̈y, tsy maintsy mifandefitry anaro roe.

Tsy fahaizan̈a azovy manan̈a ny mariny na azovy ny diso ny ten̈a raha maventy, fa azovy ny han̈ano raha voanalohany baka tsy ho robaka fihavanan̈a. Koa fa hitany Paoly fa nisy piaramanompo ta Korinto nitory Kristianin̈y namandro tamy fitsaran̈a nohony problemony vola, nanariny karaha ty iro: “Tsy sintrany fo anaro man̈eky avoa raha tsy rariny ndreky man̈eky hambakain̈y?” (1 Korintianina 6:7) Nivolan̈a zen̈y tamy piaramanompo taminany Paoly, baka iro tsy handeha amy fitsaran̈a an̈y handamin̈y raha tsy mampifan̈araka iro io. Mazava tsarabe toro lalan̈a ambadiky zen̈y: Fihavan̈ana amy piaramanompo ny raha ten̈a maventy fa tsy azovy manan̈a ny marin̈y na azovy ny diso. Atsika koa mieritreritry toro lalan̈a io, ho moramora amintsika han̈ano azafady koa fa misy olo mieritreritry fa avoa raha tsy rariny baka tamy raha nataontsika.

Tokony ho Baka amy Fô Fan̈anaovan̈a Azafady Io

Raha efa mandehandeha fo fan̈anaovan̈a azafady zen̈y izioty. Karaha ataony iro zaponey aby io, efa tsy avoakonty foeky fan̈anaovandro azafady na sumimasen. Mety ivolan̈ana fisaoran̈a koa volan̈a io na lera anten̈a sanganehan̈a fotony tsy afaka namaly hatsaran̈a nataonolo. Miovaova dikany volan̈a io. Misy olo sasany mivolan̈a fa ampiasain̈y matetiky loatra volan̈a io. Ke loso maro olo man̈ontany ten̈a, asa raha mba amy fô edy an̈anaovandro azafady io. Mety ho karaha zen̈y koa fan̈anaovan̈a azafady io amy firenena hafa an̈y.

Ten̈a tsara izikoa atao baka amy fô fan̈anaovan̈a azafady io, na ino na ino volan̈a ampiasain̈y. Tokony ho hita amy volan̈a ampiasainolo araiky ndreky fomba ivolan̈any izy fa ten̈a manen̈iny izy tamy raha tsy nety nataony. Tamy toriteny Tan̈abony Bongo nataony Jesosy Kristy, izy nampianatra pianatranany karaha ty: “Fa volan̈anaro izikoa fa ‘Ia’, ia, izikoa fa ‘Ehe’, ehe, fotony ankoatrany zen̈y efa baka aminy araiky ratsy in̈y edy.” (Matio 5:37) Dikanizen̈y, anao koa fa man̈ano azafady, aza atao amy vava fo fa amy fô! Hangala ohatra araiky baka atsika. Tamy terainy avion araiky, nisy lelahy araiky tafikon̈o man̈angy araiky niaraka nilahatra taminany amy tany fangalan̈a entan̈a. Nan̈ano azafady lelahy io. Koa fa nandehandeha koa filaharan̈a, voakon̈ony entan̈anany koa man̈angy io. Nan̈ano azafady ndraiky koa izy. Izikoa lelahy io mbala nikon̈o man̈angy io fan̈intelony, kamaradiny man̈angy io mety hivolan̈a fa tsy ten̈a niala tsin̈y lelahy io. Izikoa ho izy ten̈a baka amy fonany azafady nataony in̈y, izy mba tokony nitandrin̈y baka man̈angy io tsy voakon̈ony entan̈anany. Hitantsika baka amy zen̈y fa tokony ho tapakevitry tsy han̈ampody raha tsy nety nataontsika atsika, izikoa fa nan̈ano azafady.

Tokony han̈eky diso atsika izikoa ten̈a nan̈ano azafady na niala tsin̈y tamy fontsika jiaby. Hangataka familankeloko koa atsika sady hiezaka han̈arin̈y ny tsy mety vitantsika. Ary atsika ndray tsy diso, tokony ho von̈ono koa atsika han̈ambela hadisovan̈anolo nan̈ano raha nampalahelo atsika. (Matio 18:21, 22; Marka 11:25; Efesianina 4:32; Kolosianina 3:13) Mety tsy ho mora han̈ano raha hampihavan̈a, fotony olo jiaby samy tsy lavorary. Ke efa fan̈anaovan̈a azafady edy lakileny raha zen̈y.

Lera Karakory tsy Mety Man̈ano Azafady?

Marin̈y ndraiky fa ilain̈a manen̈iny na man̈eky diso baka hisiany fihavanan̈a. Ndray zen̈y, misy fotoan̈a olo hendry tsy han̈ano azafady. Ohatra iziô amy raha momba tsy fivadihan̈a amy Zan̈ahary. Tamy Jesosy tambony tany teto, ‘izy nanetry ten̈a, ke nanjary nan̈araka volan̈a fo firaka izy naty taminy hazofijalian̈a.’ (Filipiana 2:8) Ndray zen̈y, izy tsy nan̈eky hampahivankivan̈a fijalian̈anany, ke tsy nety nan̈ano azafady ndreky tsy nan̈eky fa atao diso raha ninoany. Tsy nan̈ano zen̈y koa izy, pisoron̈obe koa fa nivolan̈a taminany karaha ty: “Zaho man̈iraka anao: Mifantà amy Zan̈ahary velon̈o, ke volàn̈a aminay anao koa Kristy Zanaka Zan̈ahary ankitin̈y!” Jesosy tsy nen̈atra sady tsy nan̈ano azafady fa nisikin̈y korazy izy nivolan̈a karaha ty: “Efa izy nivolan̈inao zen̈y. Fa zaho man̈ambara anaro: Komansy iziô, ho hitanaro Zanakolo hipetraka ankavan̈any Araiky Mahery in̈y, sady ho avy amy rondro amy lan̈itry arỳ.” (Matio 26:63, 64) Tsy fihavan̈ana tamy pisoron̈obe raha ten̈a naventy tamy Jesosy fa tsy fivadihany tamy Babany, Jehovah.

Kristianin̈y man̈aja ndreky man̈amia voninahitry manampahifan̈a. Ndray izy man̈ano zen̈y, tsy voatery han̈ano azafady na han̈eky diso, na han̈eky ampitahôrin̈y atsika, lera atsika irahindro tsy han̈araka volan̈a Zan̈ahary ndreky tsy ho tia iro rahalahintsika aby io.​—Matio 28:19, 20; Romanina 13:5-7.

Tsisy Raha Hisakana Fihavan̈ana Eky

Atsika jiaby io samy man̈ano raha tsy mety, fotony atsika nandova tsy fahalavorarian̈a ndreky fahotan̈a baka taminy Adama razambentsika. (Romanina 5:12; 1 Jaona 1:10) Lavorary aby Adama ndreky Eva tamy voanalohany. Fa Adama koa fa tsy nan̈araka volan̈any Zan̈ahary niasa izy, nanjary panota izy. Zan̈ahary nampan̈anten̈a fa mbala hataony lavorary karaha zen̈y koa atsika io. Izy han̈adoso fahotan̈a ndreky vokatranizio.​—1 Korintianina 15:56, 57.

Mba iritrireta hely baka! Jakoba rahalahiny Jesosy koa fa nan̈amia torohevitry momba fampiasan̈a lela, karaha ty ho izy: “Izikoa misy olo tsiary ndraiky diso tamy raha nivolan̈iny, dikanizen̈y izy olo lavorary, sady mahabeko ain̈inany jiaby.” (Jakoba 3:2) Olo lavorary fo mahavoafehy lelanany, ke tsy mila man̈ano azafady. “Mahabeko ain̈inany jiaby” izy. Lera atsika lavorary an̈y, hilamin̈y ankitin̈y fiain̈ana! Tsy ho hisy raha handrobaka fihavan̈anantsika foeky amy zen̈y. Fa parpavianizen̈y fo, atsika koa fa man̈ano raha tsy mety, mbala mila man̈ano azafady baka amy fô fo, fotony atsika tihan̈ano raha hihavan̈ana.

[Lamariky amy pazy ambany]

[Sary]

Ino raha ianarantsika baka tamy Paoly?

[Sary]

Lera olo lavorary an̈y, tsisy raha hisakana fihavan̈ana eky