Fan̈ontanian̈any Pamaky

Ikeny Vavolombelon̈o Jehovah ma aody jiaby azo baka amy lio?

Valiny fan̈ontanian̈a zen̈y efa niboaka tamy Tilikambo Fiambesan̈a 15 Ziain 2000, fa hevitry maventy aminizio himpody koran̈iny ato.

Voanalohany, tsara tadidian̈a fa Vavolombelon̈o Jehovah tsy mampiasa lio. Zahay mino fa lalàn̈any Zan̈ahary momba lio io tsy miova. Hevitrinany tsy karaha hevitrinolombelon̈o. Fa kanefa, misy problemo vaovao miboaka. Amizioty lio io efa mety zarazarain̈y efatra, avio izy efatra io koa mbala mety zarazarain̈y koa. Ke baka hahaizany Kristianin̈y araiky manapakevitry han̈eky sa tsy han̈eky izio, izy mila mandiniky raha volan̈iny Baiboly, ndreky izikoa izy man̈eky izio, mety ino vokanizen̈y amy fifandraisan̈anany amy Zan̈ahary Farany An̈abo. Zen̈y raha tsara dinihiny, fa tsy mifantoko amy hatsaran̈a ndreky vokatra ratsinizio amy fasalaman̈anany fo.

Tsotra fo hevitry maventy tsara alain̈y onon̈o. Alo baka atsika handiniky raha volan̈iny Baiboly ndreky tantara, avio fan̈azavan̈a arapitsaboan̈a sasantsasany, misy ahitantsika zen̈y.

Zan̈ahary Jehovah nivolan̈a tamy Noa razambentsika fa lio io tokony hiverin̈y karaha raha araiky miavaka tsisy ambaka izy. (Genesisy 9:3, 4) Tafara taty, hita tamy lalàn̈a namezany Zan̈ahary iro Israelita aby io fa ten̈a masin̈y ankitin̈y lio io. Karaha ty baka hoizy: “Izikoa misy olo amy taranakany Israely na vahiny mipetraka miaraka aminaro ao, mihina lio, na lio nino zen̈y na lio nino, zaho kontra olo nihina lio io.” Israelita araiky tsy nan̈araka lalàn̈any Zan̈ahary io mety hitaon̈o olo hafa han̈ano karaha izy koa, ke zen̈y nahavy Zan̈ahary nivolan̈a karaha ty: “Ke izy haripako miala amy firenenanazy.” (Levitikosy 17:10) Koa fa nandeha fotoan̈a, tamy fivorian̈a araiky nataondro ta Jerosalema tan̈y, iro apostoly ndreky antipan̈ahy aby io nan̈aboaka didy fa atsika tsy maintsy ‘mifady lio.’ Ten̈a raha maventy raha zen̈y, fotony izio miran̈a tantan̈a amy didy aza mijangajanga ndreky manompo sampy.​—Asan’ny Apostoly 15:28, 29.

Ino ma dikany ‘mifady’ zen̈y tamy fotoan̈a io? Kristianin̈y tsy nahazo nihina lio, na lio velon̈o zen̈y na koa lio mandry. Iro koa tsy nihina henany biby tsy latsaka lio, salakady azo antoko koa fa iro tsy nahazo nihina hanin̈y misy lio, karaha ataony sôsisy kaian̈a boudin. Mihina lio olo araiky izikoa man̈ano raha aby io, ke mandika lalàn̈any Zan̈ahary.​—1 Samoela 14:32, 33.

Ankamaraozanolo taloha tan̈y tsy ninjehiny menimenindro foeky, izikoa fa nihina lio. Man̈aporofo zen̈y asa soratrany Tertullien, pahay tantara tamy taonjato faharoe ndreky fahatelo. Nisy Kristianin̈y nampangain̈y ho nihina lio, ke Tertullien izikoa fa namaly fiampangan̈a io izy nikoran̈a momba foko aby migiaka lio mba han̈amarin̈ana fifan̈ikian̈a nataondro. Avio koa izy nivolan̈a fa ‘izikoa fa nisy fampisehoan̈a tamy stady araiky, nisy olo sasany nigiaka lionolo aby ratsy fan̈ahy vo baka nivonen̈a in̈y baka hitahan̈a aretin̈y androbe.’

Fa Kristianin̈y ndraiky tsy nan̈eky han̈ano zen̈y, ndray nisy Romanin̈y sasany nan̈ano zen̈y hampahivan̈a aretin̈indro. Tertullien nivolan̈a: “Ndray liony biby mbala tsy hoaninay fo.” Namezandro Romanin̈y aby io hanin̈y misy lio iro ten̈a Kristianin̈y aby io misy hitsapan̈a tsy fivadihan̈andro. Fa ho Tertullien: “Anaro ma mihevitry fa [Kristianin̈y] higiaka lionolo, kanefa efa hainaro tsarabe fa ndray liony biby fo efa mampagaroharo iro?”

Amy zioty, vitsy fo olo izikoa hampirisihiny dokotera hampiditry lio zen̈y, ke hieritreritry fa mbala mihatra amizio lalàn̈any Zan̈ahary. Marin̈y ndraiky fa Vavolombelon̈o Jehovah tiho velon̈o. Fa kanefa, iro tsy maintsy man̈araka lalàn̈any Jehovah momba lio. Ino ma dikanizen̈y amy fitahan̈a misy amy izioty io?

Tafarany Ady Lehibe Faharoe, loso nahazatra olo nampiditry lio. Hitany Vavolombelon̈o Jehovah fa raha zen̈y mifanohitry amy lalàn̈any Zan̈ahary. Mbala mino zen̈y fo atsika firaka ziô. Fa amy zioty fo, efa niova fitahan̈a. Matetiky tsy lio izy hampidirin̈y aminolo marary io, fa araiky amy taharo fototrony lio fo: 1) liomena, 2) liofotsy, 3) plakety, 4) plasma. Miankin̈y amy raha mavoa olo marary io han̈amezany dokotera izy liomena, na liofotsy, na plakety, na koa plasma. Ke lio io loso mety zarain̈y aminolo maro. Vavolombelon̈o Jehovah mino fa mandika lalàn̈any Zan̈ahary iro izikoa man̈eky hampidiran̈a lio na koa araiky amy taharo fototrony lio aby io. Finoan̈andro zen̈y miorin̈y amy Baiboly. Izio miaro iro aminy aretin̈y maro mety hifindra baka amy lio, karaha ataony hépatite ndreky SIDA.

Fa iro taharo fototro aby io koa mbala mety zarazarain̈y. Ke akory koa momba zen̈y? Karakory ampiasan̈a iro io? Baka io ino aby raha tsara dinihiny Kristianin̈y, izikoa izy fa hanapakevitry han̈eky hampiasa iro sa tsy han̈eky?

Lio io ten̈a maro garamidany. Plasma fo ziô ohatra, efa ahitan̈a raha maro, kanefa 90 isanjatonizio rano fo. Ao misy hormony, sira mineraly, anzima, baka io raha mahavelon̈o karaha mineraly hafa ndreky siramamy. An̈atinizio ao koa ahitan̈a proteiny karaha albiminy, avio misy raha mampandry lio ndreky pisesitry iadian̈a aminy aretin̈y. Manampahizan̈a aby io mangala ndreky mampiasa proteiny maro baka amy plasma. Olo mora mandeha lio (hemôfila), ohatra, amezan̈a raha mampandry lio (facteur 8). Baka io izikoa misy olo mitady hidirany aretin̈y sasany, dokotera mety han̈iraka izy atao pikira gammaglobuline. Izio nalain̈y baka tamy plasmanolo efa tsy voany aretin̈y io. Misy proteiny hafa baka amy plasma koa ampiasain̈y amy fitsaboan̈a, fa iro avoakoran̈a aby io efa man̈aboaka tsara fomba angalan̈a raha baka amy taharo fototrony lio (plasma). *

Karaha plasma io, taharo fototro sasany aby in̈y koa (liomena, liofotsy, ndreky plakety) mety hangalan̈a raha isankarazany koa. Baka amy liomena, ohatra, azahoan̈a interferons ndreky interleukines. Ke izio itahan̈a kansera sasany ndreky aretin̈y sasany baka amy virisy. Baka amy plakety io koa mety hangalan̈a raha mampajanga bay. Pikaroko amy zioty efa man̈amboatra aody hafa misy raha baka amy taharo fototrony lio. Tsy taharo fototrony lio ampiasain̈y amy fitsaboan̈a aby io, fa raha nalain̈y baka tamindro. Ke Kristianin̈y ma tokony han̈eky karazan̈a fitsaboan̈a zen̈y? Zahay tsy afaka mamaly zen̈y. Baiboly koa tsy man̈amia tsipiriany momba zen̈y, ke anjarany Kristianin̈y tsiaraikiaraiky man̈apakevitry erakany eritreritrinany man̈oloan̈a Zan̈ahary.

Olo sanany tsy man̈eky raha jiaby nalain̈y baka tamy lio (ndray izio raha hely mety hiaro vatan̈anany an̈aty fotoan̈a fohiky). Zen̈y fazahoany dikany didiny Zan̈ahary mila ‘mifady lio’ in̈y. Iro baka mieritreritry fa tokony arehan̈a fo lalàn̈a namezany Zan̈ahary Israelita aby io, ke tsy maintsy ‘hahidin̈y amy tany’ liony raha manampahin̈ana. (Deoteronomia 12:22-24) Ino mahavy atsika mikoran̈a momba zen̈y? Alohany han̈amboaran̈a gammaglobuline, na aody mampandry lio, na koa aody hafa, lio io tsy maintsy avory antsendriky baka io karakarain̈y. Zen̈y mahavy Kristianin̈y sanany tsy man̈eky ampiasa aody karaha zen̈y, miran̈a iro tsy man̈eky hampidiran̈a lio na koa iro taharo fototro efatra in̈y. Tokony hajaintsika fanapahankevitrindro mifan̈araka amy eritreritrindro zen̈y.

Fa tsy karaha zen̈y fanapahankevitriny Kristianin̈y hafa. Iro koa tsy man̈eky hampidiran̈a lio, liomena, liofotsy, plakety, ndreky plasma. Fa iro fo mety han̈eky raha baka amy taharo fototrony lio. Kanefa koa mety ho samby hafa fanapahakevitrindro. Mety hisy Kristianin̈y han̈eky atao pikira gammaglobuline, kanefa mety han̈eky na tsy han̈eky atao pikira raha nalain̈y baka tamy liomena na liofotsy. Kanefa, aminy ankapobeny, ino mety hahavy Kristianin̈y sanany hieritreritry fa mety mampiasa raha baka amy taharo fototrony lio?

“Fan̈ontanin̈any Pamaky” amy Tilikambo Fiambesan̈a 1 Septambra 1990 nivolan̈a fa proteiny amy plasmany viavy mavesatra, mifindra amy lalandiony tsaiky an̈aty kibonany. Ke izy mamindra immunoglobuline amy zanany io, man̈amia izy fiarovan̈a. Ten̈a maventy raha zen̈y. Izikoa fa maty liomenany tsaiky io, tapany sasany aminizio, tsy ino fa iro pitondra proteiny, manjary biliburine. Ke biliburine io mandeha amy tavoninany an̈y, ke mandeha amy reniny, baka io miboaka miaraka amy raha malotonany. Ke Kristianin̈y sasany mety hieritreritry fa matoa raha baka amy taharo fototrony lio aby io mifindrafindra amy fomba voajan̈ahary karaha zen̈y, midika fa mety ampiasaindro koa raha baka amy plasma na amy seliliny lio.

Samy hafa fomba fihevitrinolo ndreky fanapahankevitrindro, ke dikanizen̈y ma efa tsy raha maventy eky izio? Tsy zen̈y. Izio ten̈a raha maventy. Fa kanefa tsotra fo hevitry. Hitantsika tio fa Vavolombelon̈o Jehovah tsy man̈eky hampidiran̈a lio, na taharo fototrony lio. Baiboly mandrisiky Kristianin̈y mba ‘hifady fo raha natao soron̈o amy sampy, ndreky lio, ndreky fijangajangan̈a.’ (Asan’ny Apostoly 15:29) Fa momba raha baka amindro taharo fototrony lio io ndraiky, anjarany Kristianin̈y tsiaraikiaraiky mangala fanapahankevitry mifan̈araka aminy eritreritrinany, izikoa izy efa baka nandiniky tsarabe ndreky nivavaka.

Ankamaraozanolo man̈eky lan̈iany fitsaboan̈a mety hampatsaratsara izy malaky, ndray izio efa hainy fa mety hisy vokany ratsy. Karaha zen̈y fampiasan̈a aody misy lio. Fa Kristianin̈y ndraiky mifen̈y mba hahay handanjalanja, ke tsy vokatriny fitsaboan̈a fo raha dinihiny. Vavolombelon̈o Jehovah ten̈a mankasitraka ezaka ataony pitsabo mba hikarakaran̈a tsarabe fasalaman̈andro. Dinihindro tsarabe koa hatsaran̈a na vokatra ratsy mety indesiny fitsaboan̈a. Fa iro izikoa fa hanapakevitry han̈eky na tsy han̈eky aody misy lio, iritriretindro tsarabe antsendriky raha volan̈iny Zan̈ahary, ndreky fifandraisan̈andro aminy araiky Pan̈amia fahin̈ana atsika io.​—Salamo 36:9.

Kristianin̈y ravoravo mare fotony matoky karaha pan̈ano Salamo nanoratra karaha ty: ‘Fa Jehovah Zan̈ahary io masoandra ndreky ampinga. Izy man̈amia fankasitrahan̈a ndreky voninahitry. Jehovah tsy mijijy tamban̈a han̈amia raha tsara iro olo mifen̈y fo tsy mivadiky aminany. A Jehovah e, sambatra olo matoky anao.’​—Salamo 84:11, 12.

[Lamariky amy pazy ambany]

[Efajoro]

RAHA METY HAN̈ONTANIAN̈A DOKOTERA

Izikoa anao hididian̈a, na mety mila fitsaboan̈a ampiasan̈a lio, an̈ontania izy:

Iro olo jiaby handeha hitsabo ndreky hikarakara zaho io ma efa mahay fa, nino nino raha mandalo, zaho tsy man̈eky foeky hampidiran̈a lio (lio, liomena, liofotsy, plakety, plasma), fotony zaho Vavolombelon̈o Jehovah?

Izikoa mety namboarin̈y baka tamy plasma, na liomena, na liofotsy, na plakety aody asainy ampiasainao, an̈ontania izy:

Aody io ma namboarin̈y baka tamy taharo fototrony lio? Izikoa zen̈y, mety hazavainao azafady ino aby raha an̈atinizio ao?

Firy aminy aody io ma ilaiko, baka io karakory ampidiran̈a izio aminaka?

Izikoa eritreritrinaka man̈eky zaho hampiasa izio, ino mety vokatra ratsinizio amy fasalaman̈anaka?

Fa izikoa eritreritrinaka tsy man̈ambela zaho hampiasa izio, ino fitsaboan̈a hafa mety ampiasaiko?

Diasa zaho mbala handiniky tsarabe, fa mety ombian̈a zaho afaka mivolan̈a aminao fanapahankevitrinaka?