‘Sary An̈ohatra’ Mahatsara Atsika

SAROTRO mare mahay raha tian’ny andinin-teny sasany koran̈iny izikoa tsisy andininy hafa man̈azava izy. Amy Baiboly ao misy tantara mikoran̈a raha an̈ohatra, fa raha io fo ndraikindraiky tsy ten̈a mibaribary. Araiky amy zen̈y, tantaran’ny man̈angy aroe tan̈atin’ny tokantran̈on’i Abrahama, loham-pianakavian̈a taloha tan̈y. Apostoly Paoly nivolan̈a fa izio ‘sary an̈ohatra.’​—Galatianina 4:24.

Mila dinihintsika tsarabe tantara io. Lan̈ian’olo man̈iry hahazo hatsaran̈a baka amy Jehovah Zan̈ahary baka mila mahay manondro azôvy irô olo an̈atin’ny tantara io. Nan̈ino? Alô ankendriky hizahavantsika antony nahavy Paoly nan̈azava dikan’ny tantara io.

Nisy prôblemo irô Kristianin̈y ta Galatia, tamy taonjato voanalohany. Sasany tamindrô nan̈araka Lalàn̈an’i Mosesy mare ke ‘nankalaza andra, fanjava ndreky vanim-potoan̈a aviô taon̈o.’ Irô nivolan̈a fa tsy hahazo fankasitrahan̈a amy Zan̈ahary zen̈y lan̈iany tsy man̈araka Lalàn̈a. (Galatianina 4:10; 5:2, 3) Fa hain’i Paoly ndraiky fa efa tsy nitakin̈y tamin’ny Kristianin̈y eky raha zen̈y. Ke han̈aporofoan̈a raha zen̈y, izy nikoran̈a tantara araiky efa hain’ny Jiosy tsarabe.

Paoly nampahatsiaro irô Galatianin̈y aby io fa Abrahama, razamben’ny firenena jiosy, niteraka Ismaela ndreky Isaka. Hagara andevovavy renin’i Ismaela, fa Saraha man̈angy afaka ndraiky renin’i Isaka. Azo antoko fa haindrô Galatianin̈y nafana fô tamy fan̈arehan̈a Lalàn̈an’i Mosesy fa tamy voanalohany Saraha tsy niteraka, ke Hagara andevonany nataony vadin’i Abrahama misy azahoany zanaka. Mety haindrô koa fa nanomboko tsy nan̈isy fôtiny tômpivavinany i Hagara koa fa navesatra Ismaela. Fa koa fa ela ny ela, tanteraka fampan̈antinan̈an’ny Zan̈ahary. Saraha niteraka Isaka, ndray izy efa matoe. Tafara tatỳ, Ismaela nampijaly Isaka ke nitoravan’i Abrahama irô roen’i Hagara.​—Genesisy 16:1-4; 17:15-17; 21:1-14; Galatianina 4:22, 23.

Man̈angy aroe, fifan̈ikian̈a aroe

‘Sary an̈ohatra’ io nazavain’i Paoly tamin’ny an-tsipiriany karaha ty: ‘Irô roe vavy, fifan̈ikian̈a aroe. Araiky natao tamy Bongo Sinay, sady miteraka tsaiky hatao andevo, manondro Hagara. ... Izy manondro Jerosalema amy ziôty, fôtony andevo izy ndreky zanany.’ (Galatianina 4:24, 25) Hagara manondro firenenan’Israely ndreky Jerosalema kapitalinany. Baka tamy fifan̈ikian̈an’ny Lalàn̈a tamin’ny Bongo Sinay nahavy firenena jiosy nifandray marikitry tamy Jehovah. Fifan̈ikian̈a io nampahatsiaro Israelita aby io fa irô andevon’ny ota ke nila navotan̈a.​—Jeremia 31:31, 32; Romanina 7:14-24.

Manondro azôvy ndraiky Saraha, ‘man̈angy afaka’, ndreky Isaka zanany? Nivolan̈a Paoly fa Saraha, ‘man̈angy tsy miteraka’ in̈y, nanôndro vadin’ny Zan̈ahary na fandaminan̈an’ny Zan̈ahary an-dan̈itry an̈y. Tsy niteraka fandaminan̈a io fôtony talohan’ny navian’i Jesosy, izio mbala tsiary nanan̈a ‘zanaka’ voahôsotron’ny fan̈ahy tambony tany teto. (Galatianina 4:27; Isaia 54:1-6) Fa tamin’ny Pantekoty tamy taon̈o 33, nisy lelahy ndreky man̈angy maromaro nilatsahan’ny fan̈ahy masin̈y. Olo aby io mira nateraka ndraiky baka ho zanakan’ny man̈angy io. Irô natsangan’ny Zan̈ahary hanjary zanany ke nanjary lova araiky amy Jesosy Kristy sady tafiditry an̈atin’ny fifan̈ikian̈a vaovao araiky. (Romanina 8:15-17) An̈isan’izen̈y iziô apostoly Paoly, ke izy afaka nivolan̈a karaha ty: “Fa Jerosalema an̈abo an̈y ndraiky man̈angy afaka, aviô izy renintsika.”​—Galatianina 4:26.

Irô zanakan’ny man̈angy io

Tantarain’ny Baiboly fa Ismaela nan̈enjiky Isaka. Karaha zen̈y koa, zanakan’ny Jerosalema araiky nandivôzin̈y in̈y nan̈adroadro ndreky nan̈enjiky zanakan’ny Jerosalema an̈abo an̈y. Ho Paoly: ‘Tamy fotoan̈a zen̈y, araiky nateraka erakan’ny nôfotro [Ismaela] nan̈enjiky araiky naterakan’ny fan̈ahy, [Isaka] ke karaha zen̈y koa amy ziôty.’ (Galatianina 4:29) Jesosy Kristy koa fa navy tambony tany nan̈ambara Fanjakan̈an’ny Zan̈ahary, miran̈a raha nataon’i Ismaela tamin’i Isaka raha nataondrô mpitondra fivavahan̈a jiosy aby io taminany. Irô nan̈adroadro izy ndreky nan̈enjiky izy, fôtony irô nihevitry fa irô ny ten̈a mpandova Abrahama, fa tsy Jesosy.

Ho Jesosy taloha helin’ny namonoan’ny mpitondra jiosy aby io izy: “Jerosalema, Jerosalema, anao mpamono mpaminan̈y ndreky mpitaora-bato olo nirahin̈y handeha aminao ao! Efa impiry ma zaho tihamory zanakanao karaha ataon’ny renin’ny akôho mamory zanany ambanin’ny elatranany! Kanefa anarô tsy nety. Ke iô anarô ndreky tran̈onarô!”​—Matio 23:37, 38.

Raha tantarain’ny Baiboly momba raha niboaka tamy taonjato voanalohany ahitan̈a tsarabe fa olo baka amy firenena erakan’ny nôfotro, manôndro Hagara, tsy direkty nanjary lova araiky amy Jesosy. Tsy niraisin’i Jehovah lan̈iany Jiosy nitôron̈o ho taranakan’i Abrahama ke nieritreritry manan̈a zo handova izy. Fa ndray zen̈y, nisy Israelita erakan’ny nôfotro nanjary lova araiky amy Kristy. Tsy nohon’irô taranakan’i Abrahama nazahoandrô tombontsoa miavaka zen̈y fa nohon’irô nino Jesosy.

Tamin’ny Pentekoty taon̈o 33 nahaizan̈a olo sasany lova araiky amy Jesosy. Izikoa fa nandeha fotoan̈a, nisy olo hafa koa nandatsahan’i Jehovah fan̈ahinany, amy zen̈y irô hanjary zanakan’i Jerosalema an̈abo an̈y.

Nan̈azava ‘sary an̈ohatra’ io Paoly baka an̈aboahan̈a tsarabe fa fifan̈ikian̈a vaovao tsara lavitry mandilatran’ny fifan̈ikian̈an’ny Lalàn̈a nataon’ny Zan̈ahary tamin’ny alalan’i Mosesy. Tsy ankasitrahin’ny Zan̈ahary olo araiky izikoa izy zisty man̈araka Lalàn̈an’i Mosesy fo. Tsy lavorary aby baka olo jiaby, aviô Lalàn̈a io mahaiman̈aboaka fo fa olo jiaby samby andevon’ny fahotan̈a. Paoly nan̈azava fa, navy tambony tany teto Jesosy baka ‘hividy olo ambanin’ny lalàn̈a ke hankafaka irô.’ (Galatianina 4:4, 5) Ke lan̈ian’olo mino valeran’ny sôron̈on’i Kristy tsy voahelokon’ny Lalàn̈a eky.​—Galatianina 5:1-6.

Mahatsara atsika

Nan̈ino ma atsika mila mahay fan̈azavan̈an’i Paoly momba tantara natao sary an̈ohatra io? Fôtony izikoa tsy nazavainy tsara izio, tsy hazava amintsika raha sasany amy Baiboly ao. Tsy vitan’izen̈y fo fa, mahaimatoky fo atsika fa milamin̈y sady mifan̈araka tsarabe raha koran̈in’ny Baiboly.​—1 Tesalonianina 2:13.

Izikoa tsy tanteraka sary an̈ohatra io, atsika tsy afaka han̈anten̈a ho sambatra amin’ny amaray an̈y. Tavela andevon’ny fahotan̈a ndreky fahafatesan̈a tiô fo atsika izikoa tsy tiô zanakan’ny Jerosalema ambony an̈y. Lera manjaka Kristy ndreky irô hiaraka handova aminany fampan̈antinan̈a namezan’ny Zan̈ahary Abrahama, ‘hahazo rady aby firenena jiaby ambony tany.’ (Genesisy 22:18) Ho tanteraka raha zen̈y lera afaka mandrakizay vokatran’ny fahotan̈a, tsy fahalavorarian̈a, alahelo ndreky fahafatesan̈a. (Isaia 25:8, 9) Haravoan̈a fo amy zen̈y!

[Sary]

Tamy Bongo Sinay nan̈anaovan̈a fifan̈ikian̈an’ny Lalàn̈a

[Sary nazahoan̈a lalan̈a]

Pictorial Archive (Near Eastern History) Est.

[Sary]

Ino ma dikan’ny ‘sary an̈ohatra’ nikoran̈in’ny apostoly Paoly io?