FERNANDO navozo mare. a Izy nangataka hikoran̈a taminy antipan̈ahy aroe. Piandraikitry faritry vo tsy ela navy nitsidiky fiangonan̈andro. Efa natetitetiky baka antipan̈ahy aby io mikoran̈a amy Fernando raha tokony hataony izikoa izy tihahafeno fepetra baka hahazo andraikitry fan̈ampiny. Ke izikoa fa nandeha fotoan̈a, loso diniky Fernando: ‘Mba ho voatendry antipan̈ahy edy zaho ty va?’ Akory ho iro antipan̈ahy aby io taminany?

Araiky tamindro antipan̈ahy aby io nikoran̈a momba 1 Timoty 3:1 tamy Fernando. Nitandren̈y tsarabe izy. Nivolan̈iny tamy Fernando fa iro nahazo taratasy manendry Fernando ho antipan̈ahy. Fernando taitry be zay, ke ho izy: “Karakory?” Nampodiny rahalahy in̈y ndraiky koran̈a in̈y, ke tokiky Fernando. Ravoravo koa fiangonan̈a izikoa fa natao filazan̈a tan̈y fa Fernando antipan̈ahy.

Ke diso ma anao izikoa mba tihahazo andraikitry? Aha. Karaha ty koran̈iny 1 Timoty 3:1: “Izikoa misy lelahy mifen̈y hanjary piandraikitry, dikanizen̈y izy man̈iry asa tsara.” Maro izioty rahalahy mifen̈y handroso arapan̈ahy, baka mahazo andraikitry. Ke efa an̈etsiny antipan̈ahy ndreky pikarakara fiangonan̈a mahay, an̈ivony vahoakany Jehovah izioty. Fa mahaimaro mare olo an̈ivony fiangonan̈a izioty, ke rahalahy jiaby mila mifen̈y baka hahazo andraikitry. Ke ino ma raha tokony hatao izikoa tihahazo andraikitry amy fiangonan̈a anao? Mety ma miasaloha mare karaha nataony Fernando in̈y?

“Mifen̈y” zen̈y baka amy verba amy volan̈a griky, dikany man̈iry mare na manakatra, amy 1 Timoty 3:1. Raha avy an̈aty jerinao amy zen̈y donko mety olo araiky mifen̈y manakatra voandraha masaka an̈abony kakazo. Fa mifen̈y zen̈y ndraiky tsy midika fa man̈iry mare hahazo plasiny “piandraikitry.” Olo araiky man̈iry hanjary antipan̈ahy zen̈y, tanjon̈onany tsy hahazo plasy fa han̈ano “asa tsara.”

Amy 1 Timoty 3:2-7 ndreky Titosy 1:5-9 ao ahitan̈a maromaro amindro fepetra takin̈a aminolo tihan̈ano asa tsara io. Karaha ty ho Raymond, antipan̈ahy efa ela momba iro fitsipiky aby io: “Aminaka, raha ten̈a maventy, olo karakory ma atsika io. Ndray ilain̈a olo mahay man̈ano kabaro ndreky mahay mampianatra, tsy ampy raha zen̈y. Tokony tsisy raha hivolan̈ana atsika koa atsika, hahay handanjalanja amy raha fataontsika, hisain̈y tsarabe, ho tia filaminan̈a, ho tia mandray vahiny, avio handefitry koa.”

Miala lavitry raha tsy marin̈y ndreky fahalotoan̈a rahalahy araiky tihahazo andraikitry, baka tsisy raha hivolan̈ana izy. Mahay mandanjalanja amy raha fataony koa izy, misain̈y tsarabe, tia filaminan̈a, avio mandefitry. Baka amy zen̈y mahavy iro rahalahy ndreky ranabavy aby io matoky fa hahay hitariky izy sady afaka man̈ampy izikoa fa misy problemo. Tia mandray vahiny koa izy ke mankahery iro tanora ndreky iro olo vaovao aby io. Tia ny tsara koa izy, ke mankahery ndreky man̈ampy iro olo marary ndreky iro efa matoe aby io. Tsy baka amy fan̈irian̈a ho voatendry fo mahavy izy mifen̈y hanan̈a toetry aby io, fa baka hahatsara iro rahalahy ndreky ranabavy aby io koa. b

Nata iro antipan̈ahy aby io man̈ampy ndreky man̈ambara raha tokony hatao, rahalahy io mila mifen̈y hahafeno iro fepetra takiny Soratra Masin̈y io. Karaha ty ho Henry, antipanahy efa zadraharaha ty: “Izikoa anao tihanjary piandraikitry, mifen̈a mare baka hahafeno fepetra.” Karaha ty koa nan̈azavany Mpitoriteny 9:10: “ ‘Zay raha jiaby mety ho vitanao, ataova aminy angovonao jiaby.’ Na ino na ino raha ampan̈anoviny antipanahy anao, ataova tsara. Mazotoa man̈ano zay asa an̈irahan̈a anao amy fiagonan̈a, an̈atinizen̈y mamafa tran̈o. Ho voaremarikenolo fo asa mare ataonao ndreky anao mifen̈y io, amy farany.” Izikoa anao tiho loso antipanahy mifen̈a fo man̈ano zay fanompoan̈a masin̈y an̈irahan̈a anao baka io mifen̈a fo koa ho mafatoky. Tokony ho hita fa manetry ten̈a anao fa tsy mila voninahitry.​—Mat. 23:8-12.

Mety misy rahalahy sasany karaha tihivolan̈a ankolaka aminy antipan̈ahy fa izy tihahazo andraikitry na koa ataony raha hahavy antipanahy hihevitry fa izy mendriky raha zen̈y. Misy koa sasany tsy faly, izikoa fa amiany antipan̈ahy torohevitry. Ty raha mila iritriretindro rahalahy man̈ano karaha zen̈y: ‘Raha mahatsara zaho fo ma ten̈a tadiaviko, sa zaho manetry ten̈a ke tihikarakara ondrikondrikiny Jehovah?’

Aza adin̈a fa antipan̈ahy zen̈y tokony ho “modely arehany ondrikondriky jiaby.” (1 Pet. 5:1-3) Olo modely amy fiangonan̈a zen̈y tsy olo fetsifetsy na olo mieritreritry hamitaka olo. Ke na efa voatendry izy na mbala tsendriky, mila maharidraha ndreky mahay miaritry fo. Fa zen̈y ndraiky tsy mivolan̈a fa olo araiky koa fa antipan̈ahy, izy tsy ho diso foeky. Tsisy fahagagan̈a karaha zen̈y izioty. (Nom. 12:3; Sal. 106:32, 33) Araiky amindro rahalahy aby io mety tsy hahita raha ivolan̈ana rahalahy io, fa araiky ndraiky mety hahita raha tsy metimety aminany. (1 Kor. 4:4) Ke aza meloko izikoa misy antipan̈ahy man̈amia torohevitry anao baka amy Baiboly. Raha hahatsara anao fo tadiavindro. Ke tandrin̈esa tsara torohevitry amian̈a anao, avio areha.

Maro olo mivolan̈a fa efa ela zen̈y iro niambin̈y kanefa mbala tsy voatendry fo. Ke izikoa efa taon̈o maro anao ‘nifen̈y baka hahazo andraikitry’, asa hitanao ela anao vo ho voatendry? Izikoa zen̈y raha andalovanao izioty, aleva onon̈o raha koran̈iny Baiboly ty: “Raha antinain̈y koa tsy mety tanteraka, mamparary fô. Fa kakazony fahin̈ana ndraiky raha irin̈a io izikoa azo.”​—Ohab. 13:12.

Izikoa misy tanjon̈o takarin̈y kanefa tsy tatra, mety harary ankitin̈y fô. Abrahama nahatsapa karaha zen̈y. Jehovah nampan̈anten̈a fa han̈amia izy zanaka lelahy, kanefa Saraha tsy nety navesatra tan̈atiny taon̈o taon̈o. (Gen. 12:1-3, 7) Niangavy Jehovah izy, taminizy efa natoe mare: “A Jehovah Tompo Farany An̈abo, ino raha hamianao zaho? Ndraiky hofoaty foeky zaho ty fa tsy hanan̈anaka ... Zaho tsy namianao taranaka foeky.” Jehovah baka tio nan̈amia toky izy fa ho tanteraka fo raha nivolan̈iny taminany in̈y. Efa 14 taon̈o tafaranizen̈y, farany malaky, vo tanteraka raha zen̈y.​—Gen. 15:2-4; 16:16; 21:5.

Ke taminy Abrahama niambin̈y ma tsy ravoravo foeky izy nanompo Jehovah? Ravoravo fo izy. Tsy nisalasala foeky izy fa ho tanteraka volan̈any Jehovah taminany, ke izy nan̈anten̈a fo. Karaha ty nambarany apostoly Paoly: “Lera Abrahama efa nan̈aboaka fa izy nahadin̈y niambin̈y, tio izy vo nahazo fampan̈antinan̈a zen̈y.” (Heb. 6:15) Zan̈ahary Farany Mahery io nitahy lelahy tsy nivadiky io fo tamy farany, ke namiany mandilatrany raha nantinainy izy. Ke ino raha ianaranao baka amy zen̈y?

Izikoa efa ela anao nan̈iry ho voatendry antipan̈ahy kanefa mbala tsendriky voatendry firaka izioty, matokisa Jehovah fo. Mifen̈a fo baka ho ravoravo manompo izy. Fotony nan̈ino? Karaha ty nivolan̈iny Warren, olo efa navy nan̈ampy olo maro handroso arapan̈ahy: ‘Mila miambin̈y elaela vo hita fa mahafeno fepetra rahalahy araiky sa tsendriky. Baka amy toetsain̈inany ndreky fomba fan̈anaovany asa an̈irahan̈a izy baka ahitan̈a fahaizan̈anany ndreky toetrinany. Sasany amindro io mihevitry fa tsy mahomby raha ataony izikoa izy tsy mahazo andraikitry sasany. Diso izy koa mihevitry karaha zen̈y, fotony andraikitry io fo raha tafiritriretiny. Mahomby fo anao na aia na aia tany misy anao, avio na ino na ino raha ataonao amy fiangonan̈a na amy saha an̈y, izikoa anao tsy mivadiky amy Jehovah.’

Nisy rahalahy araiky zay, efa folo taon̈o niambesany izy vo voatendry antipan̈ahy. Nikoran̈a momba kalesiny Jehovah koran̈iny Ezekiela toko voanalohany ndreky fianaran̈a nazony baka tamizio izy. Volan̈iny karaha ty: “Tsy fotoan̈antsika ten̈a raha maventy fa fotoan̈any Jehovah, fotony izy mifidy halakisany fandihanany kalesy io, na fandaminan̈anany io. Izy mitondra izio. Hitako raha zen̈y tamy zaho tiho antipan̈ahy. Tsy raha niriko ten̈a raha maventy, fotony mety tsy ho mira amy raha iriko raha hainy Jehovah fa ilaiko.”

Asa mba tihan̈ano asa tsara ataony piandraikitry io anao andra araiky an̈y? Mifen̈a man̈ampy iro rahalahy ndreky ranabavy aby io mba ho ravoravo. Aza miasaloha loatra, avio mifen̈a baka haharidraha, izikoa hitanao fa ela anao niambin̈y. Karaha ty nivolan̈iny Raymond nikoran̈intsika in̈y: “Izikoa efa dila loatra fan̈irian̈anolo araiky tihahazo raha araiky, izy tsy mety ho afapo. Izikoa izy mieritreritry ombian̈a izy ho voatendry fo, izy tsy ho ravoravo amy fanompoan̈a ataony.” Mifen̈a baka hanan̈a vokatrany fan̈ahy bebe, sirto fanan̈ana faharetan̈a. Mianara Baiboly baka hahaitsara fo fihavan̈anao amy Jehovah. Ampitombosa fitorian̈a ndreky fampianaran̈a ataonao. Tarita han̈ano raha misy ifandraisany amy fanompoan̈a fianakavian̈anao. Man̈anaova Fotoampivavahan̈any Fianakavian̈a. Ankafiza fo fiarasan̈a amindro rahalahy ndreky ranabavy aby io. Anao koa man̈ano zen̈y, ho ravoravo fo anao manompo Jehovah, firaka tanjon̈onao io takatranao.

Iziko anao mbala ambelany Jehovah hifen̈y hahazo andraikitry amy fiangonan̈a, ten̈a tombontsoa maventy raha zen̈y. Fa kanefa tsy tiany Jehovah ndreky fandaminan̈anany izikoa rahalahy araiky mifen̈y hahazo andraikitry kivy ndreky tsy faly amy fanompoan̈anany. Jehovah manohan̈a ndreky mitahy lan̈iany olo manompo izy amy fo jiaby, avio “tsy sosohany fahorian̈a” foeky fitahian̈anany.​—Ohab. 10:22.

Nata efa elaela anao nifen̈y baka hahazo andraikitry, mbala mety mandroso tsarabe fo anao aminy arapan̈ahy. Aza atao ambanindraha fianakavian̈anao, avio mifen̈a fo hanan̈a iro toetry ilain̈a aby io ndreky hiasa mare an̈ivony fiangonan̈a. Jehovah tsy mety han̈adin̈a raha jiaby hataonao hanompoan̈a izy. Irarian̈a anao ho ravoravo fo manompo izy, amy zay andraikitry amian̈a anao.