1, 2. a) Nan̈ino atsika mivolan̈a fa olombelon̈o afaka hanjary kamaradin’ny Zan̈ahary? b) Ino raha hidinihintsika amy lahatsoratra ty?

 INO raha ten̈a ilain’olombelon̈o? Fitiavan̈a. Rango izy vo teraka firaka izy maty, izy mila fitiavan̈a. Fa tsy fitiavan̈a misy amin’olo fivadiany na amin’olo mifankatia fo ilainy ndreky tadiaviny. Olombelon̈o mila kamarady ndreky man̈ano raha miaraka amin’olo. Fa ny ten̈a maventy, atsika mila fitiavan̈a baka amy Jehovah. Maro olo mieritreritry fa olombelon̈o tsy afaka mikamarady marikitry amy Zan̈ahary, fôtony izy an-dan̈itry an̈y salakady Farany Mahery. Fa tsy karaha zen̈y ndraiky atsika!

² Baiboly mivolan̈a fa efa navy nisy olombelon̈o tsy lavorary nanjary kamaradin’ny Zan̈ahary. Atsika mila mandiniky fiain̈anandrô fôtony tsisy tanjon̈o tsaratsaran’ny mifen̈y hanjary kamaradin’ny Zan̈ahary. Abrahama, ohatra, an̈isan’olo nifandray marikitry tamy Zan̈ahary. (Vakia Jakoba 2:23.) Tamy fomba akôry? Baka tamy finoan̈anany. Baiboly mivolan̈a fa Abrahama “baban’olo jiaby manan̈a finoan̈a.” (Rom. 4:11) Alô hizahavantsika nan̈ino finoan̈anany nahavy izy nanjary kamaradin’ny Zan̈ahary. Baka iô tôkony han̈ontany ten̈a karaha ty: ‘Ino mety ataoko amy zen̈y zaho ho hisy finoan̈a karaha Abrahama ke hahaihanjary kamaradin’i Jehovah fo?’

3, 4. a) Mety ino fitsapam-pinoan̈a farany sarotro tamin’i Abrahama? b) Nan̈ino Abrahama vôn̈ono han̈ano sôron̈o Isaka?

³ Aleva sary an-tsain̈y hely baka ty: In̈y Abrahama manonga bongo miaraka amin’i Isaka zanany. Kadiriny 25 taon̈o tiô Isaka tamin’io. Izy mitondra hazomaty fa Abrahama ndraiky mitondra meso ndreky fandrihetan̈a môtro. Io fotoan̈a farany nafy tamin’i Abrahama. Izy tamy fotoan̈a io efa kadiriny 125 taon̈o tiô, efa matoe izy fa mbola matanjaka. ^[1] Tsy hatoezan̈a raha ten̈a sarotro taminany fa raha nirahin’i Jehovah hataony, tsy ino zen̈y fa han̈ano sôron̈o zanany io.​—Gen. 22:1-8.

⁴ Mety io fitsapam-pinoan̈a farany sarotro tamin’i Abrahama. Misy olo mivolan̈a fa ratsy jery Zan̈ahary matoa nan̈iraka Abrahama nan̈ano sôron̈o zanany. Misy koa mivolan̈a fa Abrahama olo tsisy fô salakady raha nan̈ekin̈eky fahatany fo. Olo mieritreritry karaha zen̈y olo tsisy finoan̈a sady tsy mahay karakôry ten̈a finoan̈a zen̈y. (1 Kor. 2:14-16) Abrahama tsy nan̈ekin̈eky fahatany. Izy nan̈araka volan̈an’ny Zan̈ahary fôtony izy nino tsarabe fa Jehovah, Babany an-dan̈itry an̈y tsy mety han̈iraka izy han̈ano raha hampijaly mandrakizay mpanomponany tsy mivadiky. Hainy fa izikoa izy man̈araka volan̈a, izy ndreky zanany tsy foeny io hitahin’i Jehovah. Raha hainy ndreky raha niain̈any nan̈ampy izy nanan̈a finoan̈a karaha zen̈y.

5. Mety karakôry fomba nahaizan’i Abrahama raha momba Jehovah, baka iô ino vokan’izio taminany?

⁵ Raha hainy. Abrahama be ta Ora, tanànan’ny kaldeanin̈y. Olo tao nanompo sampy, an̈isan’izen̈y koa i Tera babany. (Jos. 24:2) Ke akôry fomba nahaizan’i Abrahama raha momba Jehovah? Baiboly tsy mikoran̈a zen̈y. Ndray zen̈y, hitantsika ao fa Abrahama io taranaka fahasivy baka amy Sema zanakan’i Noa. Sema io olo nino Jehovah mare. Kadiriny 150 taon̈o tiô Abrahama tamy Sema naty. Tsy haintsika asa mety baka tamy Sema nahaizan’i Abrahama raha momba Jehovah. Azo antoko baka fa nikoran̈in’i Sema tamy taranakanany lan̈iany raha hainy momba Jehovah. Mety an̈isan’izen̈y Abrahama; niditry tan̈aty fônany raha ren̈iny ke izy nanjary tia Jehovah ndreky nino izy.

6, 7. Ino tamy raha niain̈an’i Abrahama nankafatatra finoan̈anany?

⁶ Raha niain̈any. Ino tamy raha niain̈an’i Abrahama ma nankafatatra finoan̈anany? Misy vokany amy fôntsika raha saintsain̈intsika, ke mandrisiky atsika han̈ano raha. Tian’i Abrahama raha hainy momba ‘Jehovah, Zan̈ahary Farany An̈abo, niasa lan̈itry ndreky tany.’ (Gen. 14:22) Ke izy nanjary nan̈aja ndreky navozo Jehovah mare. Izikoa olo araiky tihifandray marikitry Jehovah, izy mila ‘mavozo Zan̈ahary.’ (Heb. 5:7; Sal. 25:14) Favozoan̈a io nandrisiky Abrahama han̈araka volan̈an’i Jehovah.

⁷ Abrahama ndreky Saraha nirahin’ny Zan̈ahary niala ta Ora ndreky nifindra tamy tany mbala tsy haindrô. Irô tamy zen̈y efa natoe kanefa hipetraka amy tran̈olay firaka irô maty. Narehan’i Abrahama volan̈an’i Jehovah ke izy nitahiny ndreky narovany. Ohatra, nisy fotoan̈a Abrahama navozo tsao hivonen’olo ndreky tsao halain’olo vadinany. Saraha baka farandraha zatovo eky. Na tiô favozoan̈anany zen̈y, Abrahama mbala nan̈araka volan̈an’i Jehovah fo. Ke tsy indraiky tsy indroe Jehovah niaro irô roe fivadiany sady nan̈ano fahagagan̈a tamindrô. (Gen. 12:10-20; 20:2-7, 10-12, 17, 18) Nankafatatra finoan̈an’i Abrahama raha jiaby niain̈any zen̈y.

8. Ino raha han̈ampy atsika hifandray marikitry amy Jehovah?

⁸ Atsika koa ma mba afaka hanjary kamaradin’i Jehovah? Ia. Maro raha haintsika momba izy. Maro koa raha efa niain̈antsika. Mbala vo tapany hely amy fahendrenan’ny Zan̈ahary fo hain’i Abrahama. (Dan. 12:4; Rom. 11:33) Atsika ndraiky afaka mianatra raha maro momba araiky ‘niasa lan̈itry ndreky tany’, fôtony amy Baiboly ao feno fan̈azavan̈a maro valera mikasiky izy. Ke atsika koa fa mahay izy, atsika lôso man̈aja ndreky tia izy. Raha zen̈y amy zay handrisiky atsika han̈araka volan̈any. Ke ho hitantsika fa torohevitrinany miaro atsika, aviô izy mitahy ndreky mankahery atsika. Ho tsapantsika koa fa mahafa-pô ndreky mampilamin-tsain̈y baka iô mamparavoravo manompo Zan̈ahary amy fô jiaby. (Sal. 34:8; Ohab. 10:22) Arakaraka ahaizantsika Jehovah ndreky hahatsapantsika fa izy mitahy atsika, atsika hahaihino izy fo salakady tihifandray marikitry aminany.

9, 10. a) Izikoa tian’olo aroe ho fatatra tsarabe fikamaradianan̈andrô, ino raha mila ataondrô? b) Ino man̈aporofo fa tian’i Abrahama sady nankafatariny fo fifandraisany tamy Jehovah?

⁹ Fikamaradianan̈a io raha valera mare. (Vakia Ohabolana 17:17.) Fa izio tsy miran̈a amy raha tsisy fahin̈ana ke vidin̈a baka iô akajin̈y amy koain. Izio miran̈a raha manam-pahin̈ana ke mila karakarain̈y baka hitombo ndreky hahaiho tsara fo. Abrahama tsy vôly nikarakara fifandraisany tamy Jehovah. Akôry nan̈anaovany zen̈y?

¹⁰ Abrahama tsiary nieritreritry fa izy efa navozo Zan̈ahary ndreky nan̈araka volan̈anany fo taloha ke efa tsy mila man̈ano zen̈y eky. Izy nan̈araka tari-dalan̈anan’i Jehovah fo isaka izy hanapa-kevitry, na amy raha madiniky na amy raha maventy. Karaha zen̈y nataondrô tamin’irô tan-dalan̈a handeha ta Kanana. Taon̈o araiky tsy hitirahany Isaka, dikan’izen̈y tamin’i Abrahama 99 taon̈o, nirahin’i Jehovah nivosirin̈y lelahy jiaby tan-tran̈onany tao. Mety nieritreritry ma Abrahama tamy fotoan̈a zen̈y fa tsao mba tsy mety raha nirahin’i Jehovah zen̈y? Sa izy nitady hevitry tsy han̈anaovan̈a izio? Ehe. Izy natoky Jehovah, ke ‘andran’in̈y fo’ direkty nataony raha nivolan̈in’i Jehovah.​—Gen. 17:10-14, 23.

11. Ino raha nampiasaloha Abrahama, baka iô akôry nataon’i Jehovah nan̈ampy izy?

¹¹ Abrahama zatra nan̈araka volan̈an’i Jehovah firaka tamy raha madiniky. Zen̈y nahavy irô roe nifandray tsara fo ndreky lôso kamarady mare. Izy tsy navozovozo nikoran̈a raha tan̈aty fônany tamy Jehovah, ndreky nan̈ontany izy lera nisy raha nampiasaloha izy. Navozo mare, ohatra, Abrahama izikoa fa hainy fa Zan̈ahary handravan̈a Sodoma ndreky Gomora. Niasaloha izy tsao olo ratsy fan̈ahy hiaraka hofoaty amin’olo marin̈y. Mety Lota zanaka rahalahiny ndreky ry havany donko tan̈atin’ny jerin’i Abrahama, fôtony iry Lota nipetraka ta Sodoma. Izy natoky Zan̈ahary ‘Mpitsara tany jiaby’, salakady nanetry ten̈a koa fa nan̈ontany izy. Jehovah nahari-draha tamin’i Abrahama ke nampianariny izy fa Izy Zan̈ahary mamindra fô. Nazavainy taminany koa fa izy mahita raha an̈atin’ny fônolo tsiaraikiaraiky ke mamonjy lan̈ian’olo marin̈y, nata amy fotoan̈an’ny didim-pitsaran̈anany.​—Gen. 18:22-33.

12, 13. a) Nan̈ino raha hain’i Abrahama ndreky raha niain̈any ten̈a nan̈ampy izy tafara tatỳ? b) Ino man̈aporofo fa izy natoky Jehovah?

¹² Azo antoko fa raha hain’i Abrahama ndreky raha niain̈any nan̈ampy izy nifandray marikitry amy Jehovah fo. Narary taminany nirahin’i Jehovah nan̈ano sôron̈o Isaka zanany. Ndray zen̈y, izy nifen̈y nisaintsain̈y toetry tsaran’ny Kamaradiny an-dan̈itry an̈y io. Alô baka himpodianantsika hely tantara in̈y. Tamin’ny lelahy tsy mivadiky io nan̈aniky Bongo Moria in̈y, izy ma nieritreritry fa Jehovah niova ratsy fan̈ahy ndreky tsisy fô? Tsisy karaha izy foeky hieritreritry raha karaha zen̈y! Nan̈ino atsika mivolan̈a zen̈y?

¹³ Karaha ty ho Abrahama tamindrô mpanompo niaraka tamindrô: ‘Anarô midokoa eto miaraka amy boriky, fa zahay roe mianaka handeha arỳ oe hankôhoko amy Zan̈ahary. Baka iô zahay mimpody.’ (Gen. 22:5) Ino ma raha tian’i Abrahama volan̈iny? Navandesany ma mpanomponany aby io tamin’izy nivolan̈a fa irô roen’i Isaka mbala himpody iô kanefa efa hainy tsara fa Isaka hatao sôron̈o? Ehe. Baiboly man̈azava raha tian’i Abrahama volan̈iny io. (Vakia Hebreo 11:19.) Hain’i Abrahama fa ‘vitan’ny Zan̈ahary manangana Isaka amy maty.’ Izy nino fa olo maty mbala hatsangana. Efa hitany fa Jehovah nan̈amia angôvo izy ndreky Saraha ke ndray irô efa natoe, irô mbala afaka niteraka fo. (Heb. 11:11, 12, 18) Abrahama nahay tsarabe fa tsisy raha tsy hain’i Jehovah. Ke izy natoky fa tsy maintsy hampodin’i Jehovah aminany ndraiky zanany tsy foeny io, ndray ino ndray ino raha niboaka tamin’io. Izikoa tsy zen̈y baka tsy ho tanteraka raha jiaby nampan̈antinainy taminany. Ke tsy mahagaga izikoa Abrahama kahian̈a ‘baban’olo jiaby manam-pinoan̈a’!

14. Ino amy raha irahin’i Jehovah ataonao hitanao sarotro, baka iô nan̈ino mety han̈ampy anao ohatran’i Abrahama?

¹⁴ Akôry ndraiky atsika? Marin̈y ndraiky fa Jehovah tsy man̈iraka atsika han̈ano sôron̈o zanakantsika. Fa atsika irahiny man̈araka didinany, nata sarotro amintsika raha zen̈y ndraikindraiky na koa tsy mazava amintsika antony. Misy raha irahin’i Jehovah ataonao ma kanefa sarotro aminao man̈ano izy? Sarotro amin’olo sasany mandeha mitory. Irô baka mety olo bihen̈amaso, ke mety tsy mora amindrô man̈aton̈o olo tsy hainy ndreky mikoran̈a vaovao tsara aminany. Misy ndraiky mavozo tsao hiavaka amin’olo a lekaoly na am-piasan̈a. (Eks. 23:2; 1 Tes. 2:2) Efa nisy fotoan̈a ma anao nahatsapa karaha raha tsapan’i Abrahama tamin’izy nanonga Bongo Moria in̈y? Anao ma efa nieritreritry fa mety tsy ho vitanao raha ampan̈anaovin̈y anao? Izikoa zen̈y, diniha môdelinany. Izy farandraha nisy korazy ndreky nanam-pinoan̈a eky. Anao koa misaintsain̈y tantarandrô lelahy ndreky viavy tsy nivadiky taloha aby in̈y, anao lôso tihangala tahaka irô ndreky hanjary kamaradin’i Jehovah.​—Heb. 12:1, 2.

15. Nan̈ino azo antoko fa tsy nanin̈enan’i Abrahama ndray hely nan̈araka volan̈an’i Jehovah?

¹⁵ Abrahama ma nanen̈iny nifen̈y nan̈araka volan̈an’i Jehovah? Karaha ty raha volan̈in’ny Baiboly momba izy: ‘Niala fahin̈ananany ke izy naty tamin’izy efa natoe mare, sady lava vilaoman̈a ndreky afa-pô tamy fiain̈ana.’ (Gen. 25:8) Efa tsisy angôvo firy Abrahama tamin’izy 175 taon̈o, fa ndray zen̈y, nahafa-pô izy fiain̈ananany. Izy baka tsy vôly niezaka nifandray tsara tamin’i Jehovah Zan̈ahary. Abrahama ‘lava vilaoman̈a ndreky afa-pô tamy fiain̈ana.’ Fa zen̈y tsy midika fa efa nety mare taminany fiain̈ananany ke izy efa tsy tiho velon̈o eky amin’ny amaray an̈y.

16. Ino raha mamparavoravo ho hitan’i Abrahama amy Paradisa?

¹⁶ Karaha ty nivolan̈in’ny Baiboly mikasiky Abrahama: “Izy niambin̈y faviany tanàna manan̈a fôtotro ten̈a izy; Zan̈ahary han̈ôrin̈y izio ndreky hiasa izio.” (Heb. 11:10) Ino ma tanàna io? Izio Fanjakan̈an’ny Zan̈ahary. Fanjakan̈a io hitondra tany ty amin’ny amaray an̈y. Abrahama nino fa izy hahita izio. Ho tanteraka tsarabe fan̈irian̈anany zen̈y. Miniminia hely haravoan̈anany hiain̈y amy Paradisa, mbala ho afaka hifandray marikitry amy Jehovah fo izy amy zen̈y. Ho ravoravo mare koa izy fôtony tan̈atin’ny andrivony taon̈o maro, mpanompon’i Jehovah nahazo hatsaran̈a baka tamy môdelinany. Amy fotoan̈a zen̈y, hainy fa raha nandalo tamy Bongo Moria in̈y “kandindon̈on’ny raha” maventy mbala hiboaka. (Heb. 11:19) Hainy koa fa raha niain̈any aby in̈y nahatsara mpanompon’i Jehovah an-tapitrisany. Fôtony irô koa fa misaintsain̈y alahelon’i Abrahama tamin’izy han̈ano sôron̈o Isaka in̈y, manjary tsapandrô alahelon’i Jehovah tamin’izy nan̈amia Jesosy Kristy hatao vidim-pan̈avaotan̈a. (Jaona 3:16) Mahatsara atsika jiaby môdelin’i Abrahama, fôtony izio man̈ampy atsika hankasitraka mare vidim-pan̈avaotan̈a. Izio baka porofom-pitiavan̈a farany maventy!

17. Tapa-kevitry han̈ino anao, baka iô ino raha hidinihintsika amy lahatsoratra man̈araka?

¹⁷ Ke irarian̈a atsika tsiaraikiaraiky ho tapa-kevitry hangala tahaka finoan̈an’i Abrahama. Mifen̈a fo hahay tsarabe Jehovah ndreky han̈araka volan̈anany, amy zen̈y hita fa anao tsy mivadiky aminany. Izikoa anao man̈ano zen̈y, ho tsapanao fa izy mamaly hatsaran̈a lan̈ian’olo tsy mivadiky aminany. (Vakia Hebreo 6:10-12.) Irarian̈a atsika tsy ho vôly hikamarady amy Jehovah! Amy lahatsoratra man̈araka, atsika handiniky tantaran’olo telo hafa nanjary kamaradin’i Jehovah koa.