OLO jiaby mivavaka aby, na ino ino firenenanany. Mety mitokana iro man̈ano izio na mety miaraka aminolo maro. Mety a legilizy na amy tempoly, na amy synagoga, na amy tany masin̈y olo mivavaka. Sasany mampiasa sampile, sasany sarivongana, avio misy koa mamelatra lamba, avio mandohaliky iô mivavaka. Misy koa olo sasany man̈odikodin̈y kapoaka misy tonombavaka izikoa fa mivavaka, na mamaky bokimbavaka, na mamaky tonombavaka amy tablo hely mihanton̈o.

Maro raha itovizantsika amy biby, karaha ataony teraka, mahaibe avio maty. (Mpitoriteny 3:19) Samy mila hanin̈y ndreky rano koa atsika. Fa vavaka io raha mampiavaka olo amy raha jiaby niasainy Zan̈ahary ambony tany eto. Ino antony?

Valiny farany tsotra donko, atsika mila mivavaka amy Zan̈ahary. Maro olo mieritreritry fa vavaka io fomba ifandraisandro amy raha ivavahandro amy tany tsy hitany maso an̈y. Fa Baiboly mivolan̈a fa hivavaka amy Zan̈ahary dikany niasany atsika. (Asan’ny Apostoly 17:24, 27) Tandraraiky, Jesosy nivolan̈a karaha ty: “Sambatra lan̈iany mahatsiaro fa mila Zan̈ahary, fotony izy hahazo Fanjakan̈any lan̈itry.”​—Matio 5:3.

Hita baka amy tran̈o aby maro maventy ndreky raha maro ampiasainolo iro koa fa mivavaka ndreky iro lera marobe lanindro ivavahan̈a fa olombelon̈o ten̈a “mila Zan̈ahary” aminy ankitin̈y. Fa kanefa ny raha misy, iro tsy ten̈a man̈aton̈o Zan̈ahary aby fa mitady taridalan̈a aminolo karaha iro na aminy ain̈indro tompiny foeky. Fa asa mba hitanao fa misy erany fo raha mety ho vitanolombelon̈o? Atsika olombelon̈o tsy ampy angovo, tsy ela velon̈o, avio tsy mahatsinjo lavitry. Ke mila pan̈ampy hendry sady mahery, avio tsy mety maty atsika.

Atsika mila taridalan̈a ndreky fahendrena, izikoa tihahay valiny fan̈ontanian̈a aby tsy hainolombelon̈o valian̈a. Mila fankahirezan̈a atsika, izikoa naty havan̈a. Mila torohevitry koa atsika izikoa fa misy fanapahankevitry mampijaly jerintsika, avio mila familankeloko koa atsika izikoa fa man̈ameloten̈a.

Koran̈iny Baiboly fa mila mivavaka atsika, baka hazahoan̈a raha jiaby zen̈y. Baiboly io boky ten̈a mafatoky. Efa misy vavakany lelahy ndreky man̈angy maro tsy nivadiky tamy Zan̈ahary an̈atinizio ao. Iro nivavaka baka hahazo fankahirezan̈a, taridalan̈a, familankeloko, ndreky nivavaka baka hahita valiny fan̈ontanian̈a maro sarotro.​—Salamo 23:3; 71:21; Daniela 9:4, 5, 19; Habakoka 1:3.

Nata tsy miran̈a iro vavaka nataonolo aby io, ny raha mampiran̈a iro io, araiky fo Zan̈ahary nivavahandro. Ten̈a raha maventy zen̈y, na maro olo tsy mijery zen̈y. Fa azovy ma tokony hivavahantsika?