Man̈ova Olo Baiboly

INO raha nampiova lelahy araiky pan̈ano loka ndreky pangalatra? Alo ambelantsika izy hitantara izy.

“Navy Tiako Mare Lakorisy Sevaly.”​—RICHARD STEWART

TERAKA TAMINY: 1965

TANY FAVIAN̈A: JAMAIKY

TANTARAMPIAIN̈ANA: PILOKA NDREKY KAFIRY

FIAIN̈ANANANY TALOHA: Zaho tombo tamy kapitaliny Jamaiky, ta Kingston. Masikiny olo tan̈y, fotony maro olo tsisy asa, avio naro koa olo kafiry. Nisy dahalo naro nampavozo koa tan̈y. Efa hely tsy isanandra zahay maharen̈y basy mipoaka fo.

Mamanay niasa mare nikarakara zaho ndreky zandriko aroe mianadahy. Nan̈ano hevitry fo izy baka zahay hahazo fampianaran̈a ten̈a tsara. Zaho tsy olo tia mianatra fa lakorisy sevaly fo raha nahasetry zaho. Matetiky zaho tsy nandeha lekoly fa nandeha tamy tany fan̈anaovan̈a lakorisy sevaly tan̈y fo. Ndray zaho mba nitenginy sevaly.

Tsy elanizin̈y, zaho efa nanjary piloka tamy lakorisy sevaly edy. Nanjary zatra nan̈ano firaisan̈a tamy man̈angy maro zaho, ke naloto fitondranten̈a zaho. Nihina jamala koa zaho, avio nangalatra baka hazahoako vola han̈anaovako fiain̈ananaka. Nisy basy maro koa zaho. Nakiry izy zaho tsy naty, zahay koa fa nandeha nandrava olo.

Farany zaho tatrany polisy, avio nigadra. Zaho ndray fa nafaka gadra, mbala tsy vôly fo zaho taminy hadalan̈a fa mbala nahainiaho fo. Izikoa olo mizaha karaha io fo, tsisy olo mahay zaho olo ratsy zen̈y. Kanefa zaho io olo madidoha, mora meloko, avio ten̈a ratsy fan̈ahy. Zaho tsy nahay olo hafa koa tsy zaho fo.

BAIBOLY NAN̈OVA FIAIN̈ANANAKA: Tamy fotoan̈a jiaby zen̈y mamako nianatra Baiboly, avio izy nanjary Vavolombelon̈o Jehovah. Hitako nanjary tsara toetry izy, ke tiako hay ino raha nampiova izy. Safe zaho nianatra Baiboly tamy Vavolombelon̈o Jehovah.

Hitako tsy mira niny fivavahan̈a hafa foeky raha ampianariny Vavolombelon̈o Jehovah, fotony nifan̈araka tamy Baiboly aby raha jiaby nampianarindro. Efa iro zaraiky fo olo haiko mitety tran̈onolo mitory, tsisy ny hafa amy nataondro Kristianin̈y tamy taonjato voanalohany. (Matio 28:19; Asan’ny Apostoly 20:20) Hitako koa fa iro ten̈a mifankatia, ke nan̈eky zaho fa nahita fivavahan̈a marin̈y.​—Jaona 13:35.

Hitako tamy fianarako Baiboly fa mbala maro raha mila nivoako. Haiko baka fa Jehovah tsy tia fijangajangan̈a, ke izikoa zaho mba tihamparavoravo izy, zaho nila niala tamy raha jiaby nandoto vatan̈anaka. (2 Korintianina 7:1; Hebreo 13:4) Ten̈a tafiditry tan̈atiny fonaka be zay fahaizako fa raha ataoko mety hahavy Jehovah halahelo na ho ravoravo. (Ohabolana 27:11) Safe zaho tapakevitry fa tsy hihina jamala eky ndreky tsy hampiasa basy eky, avio hifen̈y hanan̈a toetry tsara. Fa raha hitako ten̈a sarotro nialan̈a, loka ndreky fitondranten̈a ratsy.

Fa tamy voanalohany, tsy tiako haindro namako aby io foeky zaho nianatra Baiboly tamy Vavolombelon̈o Jehovah. Fa zaho koa fa baka namaky Matio 10:33, niova raha zen̈y. Karaha ty nivolan̈iny Jesosy ao: “Lan̈iany olo tsy man̈eky kahian̈a pianatranaka koa fa amasonolo, tsy hikeko koa izy manoloan̈a Babako andan̈itry an̈y.” Ke raha zen̈y nandrisiky zaho nivolan̈a tamindro olo aby io fa zaho mianatra Baiboly. Iro koa fa naharen̈y zen̈y, iro neloko taminaka mare. Karaha tsy ikeny sain̈indro baka olo karaha ataoko io hanjary Kristianin̈y zen̈y. Fa nambarako iro fa zaho fa tsy tia fiain̈ananaka taloha in̈y eky.

HATSARAN̈A NAZOKO: Mamako in̈y ravoravo mare nahita zaho komansy nan̈araka toro lalan̈any Baiboly. Fa izy izioty efa tsy midaon̈o zaho han̈ano hadalan̈a eky. Zahay samy tia Jehovah, ke zen̈y fo raha koran̈inay izioty. Ndraikindraiky zaho koa fa mandiniky fiain̈ananaka taloha, karaha tsy marin̈y foeky zaho nahavita niova be karaha in̈y. Vitako izin̈y fotony Jehovah nan̈ampy zaho. Efa tsy ratsy fitondranten̈a ndreky tsy tia vola karaha taloha eky zaho izioty.

Zaho hotrizay koa tsy nianatra Baiboly, donko zaho efa naty, na nigadra koa. Zaho izioty ravoravo miaraka amy vadiko manompo Jehovah. Madamonaka ten̈a manohan̈a zaho, avio zanako man̈angy man̈aja zaho mare. Man̈ano mersy Jehovah zaho fotony ambelany ho an̈isany fianakavian̈any pirahalahy kristianin̈y ten̈a be fitiavan̈a. Man̈ano mersy maventy olo nifen̈y nampianatra zaho ny marin̈y koa zaho. Ten̈a tombontsoa maventy ninaka izioty man̈ampy olo hianatra Baiboly. Fa Jehovah ten̈a ataoko mersy, fotony izy tsara fan̈ahy ndreky ten̈a be fitiavan̈a, ke nitaon̈o zaho han̈aton̈o izy.

[Volan̈a nalain̈y]

‘Nanjary haiko fa kaiky mety hampalahelo na hamparavoravo Jehovah raha ataoko’

[Sary]

Zahay roeny vadiko ndreky zanakanay man̈angy

[Sary]

Hitako niova toetriny mamako