Abrahama: Lelahy Nisy Korazy

Iry Abrahama man̈oman̈a hiala a Kanana. Rikian̈a izy mizaha lafaminany ndreky mpanomponany aby io. (Genesisy 12:1-5) Tsapany fa be andraikitry miambin̈y izy fôtony izy miantoko raha jiaby ilain’olo miaraka aminany. Mba akôry eky hahavitany zen̈y kanefa tsy hainy aby tany himboandrô? Mety tsy sarotro taminany ma namelon̈o irô ta Ora tan̈y, fôtony tan̈y mahitsohitso, mahavokatra, sady ampy rano? Akôry izikoa izy marary na maty amy tany handihanandrô an̈y? Azôvy hikarakara fianakavian̈anany? Raha aby zen̈y mety nampiasaloha Abrahama, fa zen̈y tsy nisakan̈a izy tsy handeha. Izy tapa-kevitry han̈araka volan̈an’ny Zan̈ahary ndray ino ndray ino raha hiboaka. Zay lelahy nisy korazy ankitin̈y!

INO MA KORAZY ZEN̈Y? Olo misy korazy zen̈y olo tsy mavozovozo sady masaky man̈ano raha, fa tsy olo malemy na bihen̈amaso. Zen̈y ndraiky tsy midika fa olo misy korazy tsy mavozo foeky. Olo araiky koa fa amezan’ny Zan̈ahary korazy manjary mahavita raha tôkony hataony fo ndray izy mavozo.

AKÔRY NAN̈ABOAHAN’I ABRAHAMA FA IZY NISY KORAZY? Abrahama tsy navozo hiavaka amy maro. Abrahama tombo tamy tany feno olo nanompo sampy ndreky nivavaka tamy zan̈ahary isan-karazany. Fa ndray zen̈y izy tsy navozo raha niritriretin’olo momba izy, ke nataony fo raha efa hainy fa marin̈y. Izy tsy navozo hiavaka amy maro, ke nifidy hanompo Zan̈ahary araiky fo, tsy azôvy fa Jehovah ‘Zan̈ahary Farany An̈abo.’​—Genesisy 14:21, 22.

Abrahama tsy nifantoko tamy tadi-vola fa tamy fanompoan̈a Zan̈ahary marin̈y. Izy vôn̈ono niala fiain̈ananany niadan̈a ta Ora, ke handeha hifindra amy tany paiky an̈y. Izy baka natoky tsarabe fa Jehovah han̈amia raha ilainy amy fiain̈ana. Koa fa nandeha taon̈o, mety nisy fotoan̈a Abrahama nahatsiaro hely fiain̈ananany ta Ora. Fa ndray zen̈y izy natoky tsarabe fa Jehovah hikarakara izy ndreky fianakavian̈anany. Izy nilampy tamy Jehovah fo ke lôso nanan̈a korazy han̈arehan̈a didin’ny Zan̈ahary.

INO RAHA IANARANTSIKA BAKA AMIN’NY ABRAHAMA? Mangala tahaka Abrahama atsika izikoa masaky man̈araka volan̈an’i Jehovah, nata tsy man̈ano zen̈y olo man̈odidin̈y atsika. Baiboly mivolan̈a fa lan̈ian’olo mino Jehovah Zan̈ahary mety hisy hanohitry. Mety naman̈a na havan̈a, ohatra, han̈ano zen̈y. (Jaona 15:20) Fa izikoa atsika resy lahatra amy raha nianarantsika momba Jehovah, atsika tsy mavozo miaro finoan̈antsika, fa izy fo ataontsika ampan̈ajan̈a.​—1 Petera 3:15.

Atsika koa afaka mino fampan̈antinan̈an’ny Zan̈ahary fa izy han̈amia raha ilain’olo matoky izy. Izikoa atsika mino raha zen̈y, atsika ho hisy korazy han̈ano raha ara-pan̈ahy ho raha ten̈a maventy amy fiain̈anantsika fa tsy fitadiavan̈a vola. (Matio 6:33) Diniha baka raha nataony fianakavian̈a araiky ty.

Aroe lahy zanakan’i Doug ndreky Becky. Mbala hely tsaiky aby io, fa ndray zen̈y, irô fivadiany tihifindra amy tany mbala mila mpitory maro. Nan̈ano fikarohan̈a salakady nivavaka mare momba zen̈y irô. Baka iô, irô tapa-kevitry handeha. Karaha ty ho Doug: “Tsy nora taminaka handeha hifindra an̈y miaraka amy tsaiky aby io, fôtony tsy ten̈a haiko raha miambin̈y zahay an̈y. Fa tamy somilany zahay nieritreritry hifindra, zahay efa nikoran̈a momba Abrahama ndreky Saraha. Irô ten̈a natoky Jehovah ke izy nikarakara irô fo. Fandinihan̈a raha zen̈y ten̈a nan̈ampy zahay.”

Karaha ty nambaran’i Doug momba fiain̈anandrô tafaran’irô nifindra: “Maro ankitin̈y hatsaran̈a nazonay.” Ho koa izy: “Tsotra fiain̈ananay ke lôso be fotoan̈a hahavitanay man̈ano raha miaraka, ohatra, miaraka mitory, miaraka mikoran̈a, aviô miaraka misaoma amy zanakanay. Maharen̈y sambatra mare zahay.”

Marin̈y ndraiky fa tsy olo jiaby mahavita man̈ano fan̈ovoan̈a maventy be karaha zen̈y. Ndray zen̈y, atsika jiaby samby afaka mangala tahaka Abrahama ke fanompoan̈a Jehovah ataontsika raha ten̈a maventy amy fiain̈anantsika. Atsika mila matoky fa izy hikarakara atsika. Izikoa atsika man̈ano zen̈y, ‘atsika hanan̈a korazy hivolan̈a karaha ty: “Jehovah mpan̈ampy zaho, ke tsy havozo foeky zaho.” ’​—Hebreo 13:5, 6.

[Volan̈a nalain̈y]

Olo araiky koa fa amezan’ny Zan̈ahary korazy manjary mahavita raha tôkony hataony fo ndray izy mavozo

[Efajoro]

Man̈angy Mavozo Zan̈ahary Sady Vady Ten̈a Tsara

Saraha vadin’ny lelahy araiky fatatra finoan̈a mare. Izy man̈angy mavozo Zan̈ahary sady nan̈ambela môdely ten̈a tsara. In-telo Baiboly manon̈ono an̈aran̈anany sady mivolan̈a fa tôkony hangala tahaka izy lan̈iany man̈angy mavozo Zan̈ahary. (Isaia 51:1, 2; Hebreo 11:11; 1 Petera 3:3-6) Tsy maro raha koran̈in’ny Soratra Masin̈y mikasiky man̈angy niavaka be io. Ndray zen̈y, haintsika fa izy nanan̈a toetry maro tsara.

Diniha hely baka, akôry nataon’i Saraha tamy Abrahama nivolan̈a taminany fa irô nirahin’ny Zan̈ahary hiala ta Ora. Lôso diniky ma izy nandiniky aia tany himboahandrô aviô nan̈ino irô mila mandeha? Niasaloha ma izy akôry hazahoandrô raha ilain̈a amy fiain̈ana? Nalahelo ma izy nieritreritry hiala iry kamaradiny ndreky iry havany, fôtony tsy hainy asa irô mbala hifankahita andra araiky an̈y? Azo antoko fa izy mety tafieritreritry raha jiaby zen̈y. Fa ndray zen̈y, izy vôn̈ono handeha fôtony izy natoky fa Jehovah han̈amia hatsaran̈a izy noho izy nan̈araka volan̈a.​—Asan’ny Apostoly 7:2, 3.

Saraha tsy vitany mpanompon’ny Zan̈ahary tia man̈araka volan̈a fo fa, izy koa ten̈a vady tsara. Izy tsy niady fahifan̈a tamy vadiny ke hikomandy fianakavian̈andrô. Saraha nan̈aja vadiny tamy fônany jiaby salakady nanohan̈a izy tamy fomba fitaritany fianakavian̈andrô. Ke vokany, izy nahaitsara fo fôtony nanan̈a toetry maro tsara.​—1 Petera 3:1-6.

Ino hatsaran̈a azon’ny man̈angy mifen̈y hanan̈a toetry karaha nin’i Saraha? Efa mandilatran’ny 30 taon̈o vadian̈an’i Jill, karaha ty ho izy: “Ohatran’i Saraha nampianatra zaho fa zaho tôkony tsy hisalasala hikoran̈a hevitrinaka amy vadiko. Fa amy maha lohan’ny fianakavian̈a izy, izy tômpin’ny fanapahan-kevitry farany. Ke anjaranaka mitady fomba hampahomby lan̈iany raha tapany.”

Mety ty fianaran̈a ten̈a manohin̈y fô baka amy môdelin’i Saraha: Izy nata tsara saora mare, izy tsy nipoerapoera tamy zen̈y. (Genesisy 12:10-13) Izy nanetry ten̈a fo ke nanohan̈a Abrahama, na tamy mora na tamy sarotro. Abrahama ndreky Saraha samby tsy nivadiky, nanetry ten̈a sady nifankatia. Ke hay be fa irô sambatra mare.