Man̈ova Olo Baiboly

Vakia ato ino raha nataony man̈angy araiky nijaly taminizy mbala hely, kanefa nanjary nanan̈a fiain̈ana nisy dikany? Avio, akory nahavy olo araiky kafiry nanjary pitory tia fihavan̈ana?

“Raha niriko mba hisy olo ho tia zaho.”​—INNA LEZHNINA

TERAKA TAMINY: 1981

TANY FAVIAN̈A: RUSSIE

FIAIN̈ANA TALOHA: NIJALY MARE TAMINIZY MBALA HELY

FIAIN̈ANANANY TALOHA: Babako ndreky mamako samy maren̈iny, avio zaho koa naren̈iny rango zaho menamena. Tiako fiain̈ananaka tamy zaho tsiota taon̈o mijotso. Mbala hely zaho efa nahay haratsiany misarabadian̈a zen̈y, fotony nisaraka ry olobeko. Nalahelo mare koa zaho taminio. Babako ndreky zokiko lelahy nidoko ta Troitsk fo fa zaho ndraiky nindesiny mamako nifindra ta Tcheliabinsk tan̈y. Tafaranizin̈y mamako mbala nanambady ndraiky koa. Papaheliko io olo mamolava, ke matetiky izy namopoko zahay roeny mamako.

Fa taminy 1993, naty koa zokiko lelahy in̈y, ke ten̈a nafy taminay jiaby fehiny raha zen̈y. Mamako nazony problemo io nanjary nigiaka toaka koa, ke iro roeny papaheliko niaraka nampijaly zaho. Safe zaho nanomboko nitady fiain̈ana tsara, sady nitady olo mba ho tia zaho koa. Nitety fivavahan̈a maro zaho baka mba hisy olo hankahery zaho, kanefa zaho tsy nahita foeky.

BAIBOLY NAN̈OVA FIAIN̈ANANAKA: Nisy tsaiky lekoly araiky taminaka zay Vavolombelon̈o Jehovah. Nan̈anaovany tantara baka amy Baiboly zaho, tamy zaho 13 taon̈o. Tantarany Noa ndreky Joba ten̈a tiako fotony iro ndray nijaly, iro nanompo Zan̈ahary fo. Tsy ela tafaranizin̈y amy zay zaho nianatra Baiboly ndreky nivory niaraka tamy Vavolombelon̈o Jehovah.

Naro raha nanjary haiko zaho koa fa nianatra Baiboly. Ravoravo zaho nahay fa kaiky Zan̈ahary io misy an̈aran̈a. (Salamo 83:18) Ten̈a nahagaga zaho koa nahita fa marin̈y ankitin̈y raha koran̈iny Baiboly mikasiky fiain̈ana aminy “andra farany.” (2 Timoty 3:1-5) Namparavoravo zaho koa nahay fa olo maty mbala hivilomin̈y. Tiako ho hita ndraiky koa baka anadahiko in̈y.​—Jaona 5:28, 29.

Fa kanefa tsy olo jiaby ravoravo nahita zaho nianatra Baiboly. Mamako ndreky papaheliko in̈y baka tsy tia Vavolombelon̈o Jehovah foeky. Nataondro raha jiaby tsy hianarako Baiboly, fa zaho tsy nan̈eky foeky. Tiako aby baka zay raha nianarako tamy Baiboly.

Ten̈a sarotro taminaka niaritry raha nataony fianakavian̈anaka taminaka. Fa mbala nisy raha hafa koa nandalo. Zandriko lelahy naty tandrano, kanefa izy edy mba namako mandeha mivory tamy Vavolombelon̈o Jehovah. Iro Vavolombelon̈o Jehovah aby io ndraiky tsy nan̈ary zaho foeky. Tamindro nazahoako fitiavan̈a nitadiaviko retry ela in̈y. Nan̈eky marin̈y zaho fa izio fivavahan̈a marin̈y. Ke natao batisa zaho taminy 1996, nanjary Vavolombelon̈o Jehovah.

HATSARAN̈A NAZOKO: Nahazo vady tsara zaho, Dmitry an̈arany. Efa tsiota taon̈o vadian̈anay. Zahay fivadiany izioty manompo amy birôny sampan̈any Vavolombelon̈o Jehovah a Saint-Pétersbourg. Avio ry olobeko efa tsy nanohitry be karaha taloha in̈y eky.

Ravoravo mare zaho nahay Jehovah! Manompo izy zaho, ke nanjary nisy dikany fiain̈ananaka.

“Naro fan̈ontanian̈a nanahiran̈a sain̈inaka.”​—RAUDEL RODRÍGUEZ RODRÍGUEZ

TERAKA TAMINY: 1959

TANY FAVIAN̈A: CUBA

FIAIN̈ANA TALOHA: PANOHITRY FITONDRASAN̈A

FIAIN̈ANANAKA TALOHA: Zaho teraka ta La Havane, ta Cuba. Masikiny tany nahatombo zaho io, ke efa nanjary raha nahazatra nahita olo niady tamy lalan̈a. Safe zaho koa fa bebe, zaho nianatra judo ndreky spaoro feno hakafirianan̈a.

An̈isany pianatra nahay zaho ta lekoly tan̈y, ke ry olobeko nandrisiky zaho hianatra taminy iniversite. Zaho amy zay koa fa nianatra tan̈y, zaho nanjary nahazo jery han̈ova rafitry politikiny Cuba. Ke komansy nahery andra zaho. Nisy polisy araiky zay nitafihinay roeny kamaradiko, fotony zaho tihandrava basinany. Naratra mare lohany polisy io, ke zahay ndreky kamaradiko io nigadraindro. Efa nahazo sazy hivonen̈a zahay, ke tokony iro antokondro pitifitry aby io hamono zahay. Tseky naty tanora zaho! Zaho tamy zen̈y raha mbala vo 20 taon̈o fo.

Tan̈aty prizon tao zaho zaraiky nandiniky akory hataoko, lera zaho tifirindro. Halako baka zaho koa hita mavozo mare. Fa tamy zen̈y, nisy fan̈ontanian̈a aby ty nanahiran̈a sain̈inaka: ‘Nan̈ino ma mahaimaro fo raha tsy rariny? Avio efa fiain̈ana izioty fo ma fiain̈ana?’

BAIBOLY NAN̈OVA FIAIN̈ANANAKA: Tamy farany, zahay tsy nivonendro fa nivoandro nigadra 30 taon̈o zahay. Ke tan̈y nahitako Vavolombelon̈o Jehovah sasany nigadra, fotony iro nanompo Jehovah. Ten̈a gaga zaho tamindro, fotony iro olo misy korazy kanefa tia fihavan̈ana mare. Ke iro nata nigadrain̈a tsy tamy rariny, iro tsy neloko zen̈y, avio koa iro tsy namaly faty.

Nianarako tamindro Vavolombelon̈o Jehovah fa Zan̈ahary io manan̈a fikasan̈a tsara mare amintsika olombelon̈o. Naboakandro taminaka tamy Baiboly fa hivoan̈a paradisa tany ty, avio tsy ho hisy eky olo kafiry ndreky raha tsy rariny. Nianarako tamindro koa fa tany ty ho feno olo tsara fan̈ahy, avio olo hiain̈y tsisy farany amy donia tsara mare.​—Salamo 37:29.

Tiako ndraiky raha nianarako tamy Vavolombelon̈o Jehovah, fa toetrinaka mbala tsy honohono hitovy tamy nindro foeky. Sambarako tsy ho vitako foeky baka hiala amy politiky ndreky tsy hamaly faty zen̈y. Ke zaho nanapakevitry hamaky Baiboly, zaho zaraiky fo. Ke izikoa fa tapitry famakiako izio, haiko fa Vavolombelon̈o Jehovah edy man̈araka raha nataondro Kristianin̈y tamy voanalohany tan̈y.

Haiko baka tamy fianarako Baiboly koa fa mbala be raha nila nivoako. Ohatra, zaho mbala zatra nan̈asaha, avio zaho mbala nifima sigarety. Mbala nilan̈y taminy antoko politiky koa zaho, izikoa fa nisy malo momba politiky. Tsy nora taminaka niala raha jiaby zen̈y, fa zaho ndraiky nampiany Jehovah, ke tafiala tsihelihely fo zaho.

Fa niala tamy toetrinaka mora meloko io raha ten̈any sarotro taminaka. Avio mbala mivavaka fo zaho firaka izioty baka hahavita hifehy ten̈a. Naro andininy amy Baiboly nan̈ampy zaho, karaha ataony Ohabolana 16:32 ty: “Sitrany koa olo tsy mora meloko, toizay lelahy fatatra. Sitrany olo mahafehy ten̈a toizay olo mandresy tanàna araiky.”

Taminy 1991 zaho natao batisa, ke nanjary Vavolombelon̈o Jehovah. Tan̈atiny barika tamy prizon tao nan̈anaovan̈a batisa zaho. Taon̈o araiky tafaranizin̈y, nafaka gadra sasany taminay. Nalefa tan Espagne teto zahay, fotony zahay nisy havan̈a teto. Niaraka zaho navy teto, efa nivory edy zaho. Niraisindro Vavolombelon̈o Jehovah teto zaho, mira olo efa haindro rango efa ela in̈y zaho. Iro koa nan̈ampy zaho hanomboko hanan̈a fiain̈ana vaovao.

HATSARAN̈A NAZOKO: Mahatsiaro sambatra zaho izioty miaraka amy vadiko ndreky zanako man̈angy manompo Jehovah. Ravoravo koa zaho mandany fotoan̈anaka han̈ampian̈a olo hianatra Baiboly. Ndraikindraiky zaho mahatsiaro zaho tseky nitifirin̈y in̈y, ke ravoravo zaho nandiniky fiain̈ananaka komansy tamizin̈y. Zaho izioty tsy basiny velon̈o fa mbala man̈anten̈a raha tsara koa. Efa tsy din̈iko aby haviany Paradisa, fotony hanjaka ny rariny amy zen̈y, avio “fahafatesan̈a tsy ho hisy eky.”​—Apokalypsy 21:3, 4.

[Volan̈a nalain̈y]

‘Naharavoravo zaho nahay fa kaiky Zan̈ahary io misy an̈aran̈a’

[Sary]

Zahay fivadiany ravoravo mampiasa DVD misy boky ndreky gazety amy teny tan̈ana, lera mitory aminolo maren̈iny