Man̈ova Olo Baiboly

Lelahy araiky niala tamy fivavahan̈a narehany rango mbala hely, kanefa mbala nimpody ndraiky tafara tatỳ. Nisy tsaiky lelahy araiky nialany babany, kanefa nahita baba hafa lera izy be. Alo hizahavantsika tantara aby io.

“Zaho nila nimpody tamy Jehovah.”​—ELIE KHALIL

TERAKA TAMINY: 1976

TANY FAVIAN̈A: CHYPRE

FIAIN̈ANA TALOHA: NADITRY

FIAIN̈ANANANY TALOHA: Zaho teraka ta Chypre fa tombo tan Australie. Vavolombelon̈o Jehovah raimandreniko. Nifen̈y iro nan̈ampy zaho ho tia Jehovah ndreky ho tia Baiboly. Fa koa fa nandeha fotoan̈a, zaho loso naditry. Niala tantran̈o zaho koa fa alin̈y ke niaraka tamindry namako. Nangalatra tomabily zahay baka io nan̈ano hadalan̈a isankarazany.

Tamy voanalohany, nisitriky zaho fotony navozo mamako ndreky papako. Fa koa fa nandeha fotoan̈a, zaho tsy nivaky loha foeky. Nahainaditry fo zaho fotony olo tsy tia Jehovah fo namako sady mbala zokiko lavitry oe. Tamy farany, zaho nivolan̈a tamy mamako ndreky papako fa zaho tsy hiaraka hivavaka tamindro eky. Nifen̈y iro nampisaintsain̈y zaho fa tsy nijireko foeky, ke nalahelo mare iro.

Niala tantran̈onay tao foeky zaho ke nanjary nifima jamala. Namboly ndreky nivarotro jamala maro oe zaho. Nanjary naloto fitondranten̈a ndreky nandeha baly fo zaho. Nanjary mora meloko mare koa zaho. Ohatra iziô, koa fa nisy olo nivolan̈a raha tsy tiako, direkty nitihitihiko na nivangoeko foeky. Raha jiaby nampianarin̈y zaho tamy Baiboly efa haiko tsy mety in̈y edy nataoko.

BAIBOLY NAN̈OVA FIAIN̈ANANAKA: Nanjary loso kamaradiko mare lelahy araiky pifima jamala zay. Efa maty papany, rango izy mbala hely. Matetiky zahay nikoran̈a firaka efa alin̈y be. Nitarain̈y taminaka izy fotony malahelo papany maty in̈y, ke nivolan̈iko taminany fa efa nahavita namelon̈o olo maty Jesosy, ke mbala han̈ano zen̈y koa izy aminy amaray an̈y. (Jaona 5:28, 29) Efa nianarako baka raha zen̈y taloha. Ravoravo zaho nivolan̈a taminany karaha ty: “Iritrireta hely baka anao hifankahita ndraiky aminany! Hiain̈y tsisy farany amy Paradisa ambony tany eto atsika jiaby amy zen̈y.”

Nan̈ontany momba andra farany na Zan̈ahary tokana olo telo koa kamaradiko io. Nalaiko Baibolinaka baka io naboakako izy, ino marin̈y ma andra farany zen̈y, baka io azovy ma Jehovah ndreky Jesosy zen̈y. (Jaona 14:28; 2 Timoty 3:1-5) Arakaraka nikoran̈ako momba Jehovah, zaho loso tafieritreritry ndraiky fifandraisako taminany.

Nimpody tsihelihely tamy jerinaka raha nampianarindry olobeko zaho tamy Baiboly in̈y. Ohatra, tsaroako tampoko raha nianarako zaho koa fa nifima jamala niaraka tamindry namako tamy fety nataonay. Iro nan̈ano nivolan̈a fa tia Zan̈ahary, kanefa tsy fan̈araka amy zen̈y aby raha ataondro. Zaho tsy tiako han̈ano karaha iro io. Ke ho zaho tamy jeriko tan̈y, mila mimpody amy Jehovah zalahy zaho ay.

Mora ampivolan̈ana raha zen̈y fa sarotro man̈ano izy. Tsy ten̈a nanahiran̈a zaho niala tamy jamala! Nialako iro namako aby in̈y baka io zaho nimpody nianatra Baiboly taminy antipan̈ahy Vavolombelon̈o Jehovah zay.

Nifehy ten̈a koa fa neloko ny raha ten̈a tsy mora taminaka. Misy andra zaho mahavita, fa kanefa misy fotoan̈a tsy vitako foeky. Kivy mare zaho ke nikoran̈a taminy antipan̈ahy in̈y. Nanampaharetan̈a ndreky tsara fan̈ahy taminaka izy salakady nankahery zaho. Nirahiny namaky lahatsoratra araiky tamy Tilikambo Fiambesan̈a, koa zaho. Lahatsoratra io mandrisiky olo hanan̈a korazy. a Nikoran̈inay koa ino aby raha mety ataoko zaho koa fa meloko. Vitako fo nifehy ten̈a zaho koa fa nan̈araka raha koran̈iny lahatsoratra in̈y ndreky nivavaka fo tamy Jehovah. Taminy Avrily 2000 zaho natao batisa. Haravoan̈a tsisy ambaka izy niny mamako ndreky papako.

HATSARAN̈A NAZOKO: Milamin̈y tsara jerinaka izioty fotony zaho efa tsy mifima jamala baka io tsy ratsy fitondranten̈a eky. Nahairavoravo fo zaho na lera miasa, na mivory, na mangala diandian̈a. Ten̈a tiako fiain̈ananaka izioty!

Man̈ano mersy Jehovah zaho nan̈amia mamako ndreky papako. Iro baka nifen̈y fo nan̈ampy zaho. Tiako mare koa volan̈any Jesosy ty: “Tsisy olo mahay man̈aton̈o zaho izikoa tsy tahominy Baba araiky nan̈iraka zaho.” (Jaona 6:44) Ravoravo mare zaho fotony nitahominy Jehovah ke tafimpody ndraiky aminany.

“Nahazo baba fo zaho in̈y.”​—MARCO ANTONIO ALVAREZ SOTO

TERAKA TAMINY: 1977

TANY FAVIAN̈A: CHILI

FIAIN̈ANA TALOHA: PAN̈ANO ROCK

FIAIN̈ANANAKA TALOHA: Zaho tombo ta Punta Arenas, tanàna tsara be zay, an Ameriky Atsimo atỳ. Tamy zaho dimy taon̈o, nisaraka papanay ndreky mamanay, ke mamanay fo nitarimy zaho. Papanay tsy nijery zaho eky, ke zen̈y nahavy zaho mba nan̈iry hanan̈a baba.

Mamanay nianatra Baiboly tamy Vavolombelon̈o Jehovah, ke nindesiny nivory niaraka taminany fo zaho. Kanefa zaho tsy tihandeha hivory foeky, ke nan̈ajima mare zaho lera tandalan̈a man̈an̈y. Zaho koa fa feno 13 taon̈o, zaho vôly nandeha nivory.

Koa fa nandeha fotoan̈a, zaho nanjary tia lamoziky avio ten̈a nahay nisaoma raha man̈en̈a. Loso an̈isany tariky araiky pan̈ano rock zaho, tamy zaho 15 taon̈o. Matetiky, tamy bara, na amy fety nalamin̈iny fianakavian̈a na fety hafa zahay nihira. Zaho koa niaraka taminolo ten̈a jaolahy tamy fahaizan̈a lamoziky, ke nanjary tia lamoziky klasiky zaho. Nianatra lamoziky tamy lekoly marikitry zahay teto zaho. Zaho koa fa 20 taon̈o, nandeha ta Santiago, kapitaliny Chili zaho, fotony tiako hampitombosin̈y fahaizako lamoziky io. Mbala niaraka tamy tariky pan̈ano rock fo koa zaho tan̈y.

Tsy afapô foeky zaho tamy fiain̈ananaka, ke loso nigiaka toaka mare zaho avio nifima jamala niaraka tamindry namako tamy tariky io tao. Iro efa nataoko mira lafamìnaka. Zaho in̈y naditry mare, ke raha zen̈y hita tamy fomba fisanjiako. Lamba joby fo fisikiniko, avio zaho nanangana sombotro. Nataoko lava mare koa fan̈evanaka.

Niady taminolo fo zaho, ke matetiky zaho nisamboriny polisy. Indraiky andra zay, zaho namo mare, ke niady zahay ndreky pivarotro jamala zay. Iro nikatsiky ady taminay roeny namako. Nibomandro zaho, ke avoa mare vavanaka.

Zen̈y mbala tsisy dikany taminaka, fa ny raha ten̈a sarotro taminaka, zaho nifitahiny namako ndreky tsaiky man̈angy niarahako. Kaiky nampirafesiny tsaiky man̈angy io zahay roeny namako, kanefa zahay roeny ngiahy io kamarady mare, sady izy amy zen̈y efa mandeha antaon̈ony iro niaraka fo. Kamaradiko jiaby nahay raha zen̈y fa iro tsisy nivolan̈a izio taminaka. Ke kivy mare zaho!

Nimpody ndraiky ta Punta Arenas zaho nampianatra lamoziky, ke nataoko asa fiviloman̈a foeky raha momba lamoziky io. Mbala nan̈ano rock ndreky nan̈aboaka hira niaraka tamy tariky araiky zay zaho. Nifanojy tamy tsaiky man̈angy zatovo zay zaho tan̈y. Sussan an̈aranany. Nifankatia zahay ke nan̈ano tran̈o araiky. Koa fa nandeha fotoan̈a, hitany Sussan fa mino Zan̈ahary tokana olo telo kamaradiny, kanefa zaho tsy nino. Nan̈ontaniany karaha ty zaho: “Ninjovy marin̈y aminany?” Karaha ty nivolan̈iko taminany: ‘Haiko fa tsy tokana olo telo Zan̈ahary, fa tsy haiko fo man̈aporofo izy amy Baboly ao. Vavolombelon̈o Jehovah fo ten̈a mahavaly zen̈y.’ Zaho baka io nivavaka baka hampiany Zan̈ahary. Efa ela mare tsy nivavahako.

Tsy ela tafaranizen̈y, zaho nifankahita tamy lelahy zay. Karaha olo efa navy hitako izy, ke nan̈ontaniako izy tsao izy mba Vavolombelon̈o Jehovah. Navozovozo hely izy nahita sanjinaka, fa baka tio izy nikoran̈a tsara, zaho koa fa baka nan̈ontany izy raha momba fivorian̈a. Resy lahatra zaho fa ten̈a valimbavaka raha zen̈y. Ke zaho nandeha tamy Tran̈o Fivorian̈a, baka io zaho nipetraka tafara be, amy zen̈y tsisy olo mahita. Kanefa ny raha nisy, marobe olo mbala nahatsiaro zaho, ke niraisindro tsara zaho sady nitolon̈indro. Nahatsiaro nahivankivan̈a be zaho! Zaho in̈y karaha tsaiky araiky naditry niala tantran̈oniry olobeny tan̈atiny fotoan̈a elabe, ke ravoravo zaho tafimpody ndraiky. Hitako tan̈y koa lelahy nampianatra zaho Baiboly, tamy zaho mbala hely in̈y, ke zaho nangataka izy hampianatra Baiboly zaho ndraiky.

BAIBOLY NAN̈OVA FIAIN̈ANANAKA: Tandraraiky zaho namaky raha koran̈iny Ohabolana 27:11 mivolan̈a karaha ty: “Misia jery zanako, ataova raha mamparavoravo fonaka.” Ke zaho tafieritreritry karaha ty: ‘Olo hely tsisy dikany karaha zaho ty ke hahavita han̈ano raha mamparavoravo Zan̈ahary niasa raha jiaby?’ Tontohitry zaho baka fa kaiky Jehovah izy Baba nitadiaviko ela jiaby in̈y.

Zaho tihan̈ano raha mamparavoravo Babako andan̈itry an̈y io sady tihan̈ano sitraponany, fa zaho mbala nifima jamala ndreky nigiaka toaka mare. Kanefa Jesosy efa nivolan̈a karaha ty: “Tsisy olo mahay manompo tompo aroe.” (Matio 6:24) Ke niezaka mare zaho niova. Nampatontohitry zaho mare raha koran̈iny 1 Korintianina 15:33 mivolan̈a karaha ty: “Naman̈a ratsy mandrobaka fahazaran̈a tsara.” Nanjary nazava taminaka fa tsy ho vitako foeky hiala raha ratsy nahazatra zaho aby io, izikoa zaho mbala miaraka amindry namako ndreky mandeha amy tany fandihananay aby in̈y. Ke tsy maintsy nialako foeky zay raha mety hitariky zaho amy raha ratsy aby io.​—Matio 5:30.

Sarotro mare taminaka tsy han̈ano rock eky fotony izio tiako mare. Kanefa, nan̈ampy zaho iro namako an̈ivony fiangonan̈a, ke vitako fo tamy farany tsy han̈ano izio. Vôly koa zaho tamy figiahan̈a toaka be in̈y, avio zaho tsy nifima jamala eky. Nitapahako koa fan̈evanaka, baka io nadosoko sombotronaka, avio nivoavoako kolerany lamba sikiniko fa tsy joby fo. Lany fan̈ahy Sussan koa fa nikoran̈iko taminany fa hitapahako fan̈evanaka. Ke ho izy taminaka: “Ino ma raha ataonaro amy Tran̈o Fivorian̈a ho anao zen̈y? Ambesa zaho foeky han̈an̈y!” Ten̈a tiany raha hitany tan̈y, ke nianatra Baiboly izy. Tafara, zahay nan̈ano mariazy, avio natao batisa taminy 2008. Ravoravo zahay iziô manompo Jehovah miaraka amy mamanay.

HATSARAN̈A NAZOKO: Zaho izioty mahatsiaro sambatra fa tsy karaha taloha in̈y eky. Vitako fo koa niala iry namako pamitaka aby in̈y. Zaho iziô mbala tia lamoziky, fa fidiko tsarabe fo lamoziky tandrin̈esako. Taiko mitantara raha niain̈ako han̈ampiako fianakavian̈anaka ndreky olo hafa, intsaka eky iro tanora aby io. Tiako ho tsapandro baka fa raha amy donia ty zahan̈a karaha tsara fo, fa ny marin̈y aminany, iro mira ‘fako.’​—Filipianina 3:8.

Manan̈a naman̈a maro mafatoky zaho an̈ivony fiangonan̈a. Zahay mifandray tsara sady mifankatia. Fa ny ten̈a mamparavoravo, nahita Baba fo zaho tamy farany fotony zaho loso tsara fihavan̈ana amy Jehovah.

[Lamariky amy pazy ambany]

[Volan̈a nalain̈y]

‘Nitahominy Jehovah zaho ke tafimpody aminany ndraiky’