Zaho teraka ta Saint-Domingue, a Repobliky Dominikanin̈y. Efatra mianadahy zahay, fa zaho faralahy. Papako ndreky mamako olo nianatra, ke tiandrô zahay mifan̈ôsihôsy amin’olo tsara toetry fo. Efatra taon̈o talohan’ny nahatirahako, irô nifanôjy tamy misiônaira môrmon. Irô misiônaira aby io mbala manafolahy. Tian’iry olobeko irô fôtony irô nahalala fomba, nadio, aviô pôzindrô nilamin̈y tsara. Zen̈y nahavy ry olobeko tapa-kevitry hivavaka tamy Fiangonan’i Jesoa Kristy Natao Nin’olo Masin̈in’ny Andra Farany na Fiangonan̈an’ny Môrmon. Fianakavian̈anay an̈isan’ny Môrmon voanalohany taminay tan̈y.

Zaho koa fa nahaibe, nahaitiako fo raha fataonay ta leglizy. Raha ten̈a maventy amy Môrmon fiarahan̈a miaraka amy fianakavian̈a ndreky man̈araka fitsipiky momba fitondran-ten̈a, ke narehako tsara raha zen̈y. Nirehareha zaho fôtony Môrmon, ke zaho tihan̈ano misiônera.

Nifindra ta Etazonỳ fianakavian̈anay tamy zaho 18 taon̈o. Tian’ny papako ndreky mamako hianatra amin’ny iniversite tsara baka zaho. Kadiriny taon̈o araiky tafaran’izen̈y, navy namangy zahay ta Floride tan̈y tantiniko ndreky tontonko. Irô io Vavolombelon̈on’i Jehovah. Niainvitendrô han̈aton̈o fivoriambe zahay. Lany fan̈ahy zaho nahita olo jiaby nan̈odidin̈y zaho samby niôndriky nizaha andininy ndreky nangala naoty. Ke mba nangataka stylô ndreky taratasy hangalan̈a naoty koa zaho.

Hain’ny tantiniko ndreky tontonko fa zaho tihanjary misiônera. Ke koa fa vita fivoriambe io, irô nivolan̈a fa irô afaka man̈ampy zaho hahay raha an̈atin’ny Baiboly. Pare taminaka raha zen̈y, fôtony tamy fotoan̈a io, Bokin’ny Môrmon ten̈a nandaniako fotoan̈a fa tsy Baiboly.

Tamy telefaony zahay nianatra Baiboly. Isaka zahay miaraka midiniky Baiboly, irô nampirisiky zaho hampiran̈a raha inoako amy raha ampianarin’ny Baiboly. Zaho foeky baka tiandrô hahita porofo fa marin̈y raha ianarako.

Maro amy raha inoan’ny Môrmon nikeko, kanefa zaho tsiary nahay na mifan̈araka amy raha ampianarin’ny Baiboly raha ampianarin̈y zaho na tsy mifan̈araka. Zaho nandifasan’ny tantiniko gazety Mifohaza! 8 Novambra 1995, naboakan’ny Vavolombelon̈on’i Jehovah. Misy lahatsoratra maromaro mikoran̈a raha inoan’ny Môrmon taminany io tao. Lany fan̈ahy zaho koa fa namaky izio, fôtony kaiky mbala maro fampianaran̈an’ny Môrmon mbala tsiary ren̈iko. Nan̈ano fikarohan̈a tamy sitin’ny Môrmon zaho ke hitako fa marin̈y ankitin̈y raha koran̈in’ny Mifohaza! Nahainankamarin̈y zen̈y fo koa raha hitako tamy zaho nitsidiky musée-ny Môrmon a Utah, an Etazonỳ.

Letrizay zaho nino fa mifameno raha volan̈in’ny Bokin’ny Mormon ndreky Baiboly. Fa zaho koa fa namaky Baiboly tsarabe, hitako fa kaiky maro amy raha ampianarin’ny Môrmon mifanohitry amy raha koran̈in’ny Baiboly. Ohatra iziô, amin’ny Ezekiela 18:4, Baiboly mivolan̈a fa fan̈ahy mety maty. Kanefa karaha ty raha volan̈in’ny Bokin’ny Môrmon amin’ny Almà 42:9: “Fan̈ahy tsy mety maty na ombian̈a na ombian̈a.”

Tsy raha nampianarin’ny Môrmon fo nampijaly jerinaka fa fan̈indrahindran̈a firenena atao ao koa. Môrmon, ohatra, mampianatra fa ta Jackson, a Missouri, an Etazonỳ, toeran̈a nisy zaridain’i Edena. Mivolan̈a koa mpaminan̈in’ny eglizy fa fitondram-panjakan̈a amerikain handeha hampiasain’ny Zan̈ahary hitondra tany jiaby.

Ke zaho lôso diniky, ‘izikoa marin̈y edy zen̈y, han̈ano akôry tany naviako ndreky firenena hafa?’ Tandraraiky, hariva tamy zen̈y, nikaiky zaho tsaiky lelahy araiky môrmon efa miofan̈a han̈ano misiônera. Nikoran̈iko taminany raha nampiasa loha zaho io, aviô nan̈ontaniako izy asa izy vôn̈ono hiady amy Môrmon amy firenena hafa, izikoa firenenandrô miady. Lany fan̈ahy zaho koa fa nivolan̈any fa izy vôn̈ono! Nidinihiko tsara fampianaran̈an’ny Môrmon, sady nan̈apitrahako fan̈ontanian̈a mpitondra fivavahan̈a tao. Nivolan̈a irô fa mistery zen̈y valin’ny fan̈ontanian̈anaka, fa mbala ho voavaly fo ndraiky zen̈y andra araiky an̈y.

Diso fan̈antinan̈a tamy raha nivolan̈indrô zaho, ke zaho nandinin-ten̈a ino ma ten̈a antony mahavy zaho tihan̈ano misiônera môrmon. Tontohitry zaho fa kaiky nohon’ny zaho tihan̈ano asa soa ndreky zisty tihajain’olo fo nahavy zaho tihan̈ano izio. Kanefa tsy be aby raha haiko momba Zan̈ahary. Ndray prôgramon’ny Zan̈ahary momba tany ndreky olombelon̈o tsy haiko.

Maro raha haiko zaho koa fa nianatra Baiboly niaraka tamy Vavolombelon̈on’i Jehovah. An̈isan’izen̈y azôvy an̈aran̈an’ny Zan̈ahary, man̈ano akôry olo koa fa maty, aviô ino anjara asan’i Jesosy amy fan̈atantirahan̈a fikasan̈an’ny Zan̈ahary. Ke zaho ziôty efa nanjary zatra nampiasa Baiboly sady ravoravo mikoran̈a raha an̈atin’izio amin’olo. Letrizay zaho efa nahay fa Zan̈ahary misy. Fa ziôty zaho mahavita mikoran̈a aminany karaha ataoko mikoran̈a amy kamaradiko marikitry. Tamin’ny 12 Zie 2004 zaho natao batisa, ke nanjary Vavolombelon̈on’i Jehovah. Tsiota fanjava tafaran’izen̈y zaho efa nanomboko nan̈ano mpitory manontolo andra.

Niasa tamin’ny Foiben’ny Vavolombelon̈on’i Jehovah a Brooklyn, a New York zaho tan̈atin’ny dimy taon̈o. Ravoravo zaho nan̈ampy tamy fan̈aboahan̈a Baiboly ndreky boky man̈azava Baiboly baka hazahoan’olo an-tapitrisany eran-tany hatsaran̈a. Ravoravo koa zaho iziô fôtony mbala afaka man̈ampy olo hahay raha momba Zan̈ahary.