Zaho teraka tamy tanàna hely ta Roma tan̈y, tanànanolo tsy dia manandraha izio. Ten̈a tsy nora fiain̈ananaka. Tsiary haiko mamako niteraka zaho, avio zaho tsy dia nifandray tsara tamy papako. Tsisy raha pare foeky fiarahamonin̈y nisy zaho.

Mbala tsy ampy folo taon̈o zaho efa nangalatra edy. Fa zaho koa fa 12 taon̈o, zaho nanomboko niala tantran̈o. Natetiky papako nangala zaho tamy birôny polisy, baka io nindesiny nody tantran̈o. Niady taminolo fo zaho fotony zaho ten̈a kafiry, baka io neloneloko fo. Tamy zaho 14 taon̈o amizay, zaho vo ten̈a niala taminay tao, ke tsy nimpody tan̈y eky. Nanomboko nihina jamala zaho sady nirenireny tamy lalan̈a. Zaho tsisy tany nandrian̈a, ke zaho namaky tomobilinolo ke nandry tao, avio zaho nifoha bonera be baka tsy tatrany tompiny. Zaho amy zay nitady tany misy rano hisehan̈a.

Loso pangalatra mahay ankitin̈y zaho. Zaho nandrava sakanolo, avio namaky tran̈o koa fa alin̈y. Nahaitsy nanjary fo lazanaka tafaranizin̈y, avio zaho nahazo naman̈a maro efa zatra taminy asa ratsy. Ndraiky namaky labanky zaho baka tamy fiarahan̈a tamindro fo. Nazovo zaho mare iro namako aby tafaranizin̈y, fotony zaho kafiry mare, ke narehandro fo zay raha nivolan̈iko tamindro. Tsiary nialany basy zaho taloha. Ndray zaho nandry, mbala tambany ondan̈anaka tao fo izio. Akafirianan̈a, jamala, halatra, asaha, baka io fijangajangan̈a, raha aby zen̈y fo nameno fiain̈ananaka. Tadiaviny polisy fo zaho. Isaka teteky zaho nisamboriny polisy, avio tan̈atiny taon̈o maro zaho niditry niboaka tamy prizon.

Tandraraiky amizay zaho koa fa nafaka gadra, zaho nandeha namangy rahavaviny mamako zay. Kaiky izy ndreky zanany aroe mianadahy loso Vavolombelon̈o Jehovah. Zaho nitahomindro nandeha nivory niaraka tamy Vavolombelon̈o Jehovah. Zaho ndraiky tsy lian̈a fa zaho nandeha fo hizaha raha nataondro tan̈y. Zahay koa navy tamy Tran̈o Fivorian̈a tan̈y, zaho tsy nan̈eky koa tsy nipetraka farany tafara, narikitry varavaran̈a, amy zen̈y zaho afaka man̈aramaso olo miditry ndreky niboaka tao. Fa basinaka mbala taminaka fo.

Ten̈a nan̈ova fiain̈ananaka fivorian̈a in̈y. Tsaroako tsarabe tamy zen̈y fa karaha tsy tambony tany zaho. Olo maro tsara fan̈ahy, nazava trôko sady nandray zaho tsara. Tsy mety adin̈ako iro tsara fan̈ahy taminaka in̈y, baka io hitako tamy sorandro fa iro tsy mihatsaravelatsihy. Tsy honohono ho mira fiain̈ananaka taloha foeky raha hitako tao!

Zaho nanomboko nianatra Baiboly tamy Vavolombelon̈o Jehovah. Arakaraka nianarako Baiboly nahavy fiain̈ananaka nahaitsara fo. Nanohin̈y fonaka mare raha volan̈iny Ohabolana 13:20: “Lan̈iany olo miaraka aminolo misy jery hanjary ho hisy jery, fa hidirany antambo ndraiky lan̈iany olo minaman̈a aminolo tsisy sain̈y.” Tontohitry zaho fa mila miala iro namako aby in̈y. Tsy vitako foeky nan̈ano raha zen̈y, koa tsy tio fan̈ampian̈a baka tamy Jehovah.

Nifen̈y zaho niala tamy raha nandoto vatan̈anaka, karaha ataony sigarety ndreky jamala isankarazany. Nitapahako fan̈evanaka lava be in̈y, zaho vôly nan̈ano kavin̈y avio zaho tsy nan̈ano volandraty eky. Sambany tamy fiainan̈anaka zaho nahavita nifehy ten̈a.

Zaho olo tsiary tia namaky teny ndreky tsy tia nianatra ke sarotro mare taminaka nifantoko zaho koa fa nianatra Baiboly. Fa tsy nataoko tamban̈a tsy hiezaka raha zen̈y ke zaho loso tia Jehovah fo, sady tsapako koa fa zaho efa mba niova. Matetiky fo ndraiky eritreritrinaka man̈enjiky zaho. Zaho karaha nan̈ameloten̈a ke loso nisalasala, asa Jehovah ten̈a nan̈ambela hadisovan̈anaka tamy raha tsy nanjary jiaby nataoko in̈y. Tamy fotoan̈a aby zen̈y, tantarany Panjaka Davida taminizy baka nan̈ano fahotan̈a maventy in̈y nan̈ampy zaho.​—2 Samoela 11:1–12:13.

Fa mbala nisy problemo hafa koa zaho. Sarotro taminaka nitory isaka tran̈o. (Matio 28:19, 20) Navozo mare zaho tsao hifanojo amindro olo nikafirianako na nataoko raha tsy nanjary hafa taloha aby in̈y! Resiko tsihelihely tio fo ndraiky tahotronaka zen̈y. Ke zaho loso nahita haravoan̈a mare man̈ampy olo hahay momba Babantsika andan̈itry an̈y io. Ten̈a man̈ambela hadisovan̈a ankitin̈y izy.

Zaho koa tsy nahay Jehovah, efa naty zaho ambaka zay. Maro tamindro namako taloha aby in̈y efa naty aby, fa ny sasany ndraiky nigadra. Kanefa zaho iziô sambatra salakady manan̈a fan̈antinan̈a tsara aminy amaray. Zaho izioty efa mahay manetry ten̈a, efa man̈araka volan̈a sady efa mahafehy ten̈a izikoa meloko ndreky mahay mifandray aminolo hafa. Nahazo vady zatovo koa zaho iziô, Carmen an̈aranany. Ravoravo zahay miaraka man̈ampy olo hianatra Baiboly.

Misy raha adin̈ako hely! Manan̈a asa tsara zaho izioty. Mbala misy ifandraisany amy banky koa izio. Tsy mamaky banky eky zaho fa man̈adio banky.