KORAN̈A MAHALIAN̈A
Ombian̈a ma Fanjakan̈any Zan̈ahary Nikomansy Nanjaka? (Fizaran̈a 1)
Karakaraha ty koran̈a mety hataony Vavolombelon̈o Jehovah araiky aminolo. Ataontsika Cameron an̈arany Vavolombelon̈o Jehovah io. Izy nandeha amy tran̈ony lelahy araiky kahian̈a John.
‘MITADIAVA FO’ IZIKOA MISY RAHA TIANAO HO HAY
Cameron: A John, ravoravo zaho mahita anao mbala von̈ono hianatra Baiboly iniany. a Tamy farany in̈y, nisy fan̈ontanian̈a napetrakanao momba Fanjakan̈any Zan̈ahary. Anao nan̈ontany ino mahavy Vavolombelon̈o Jehovah mino fa Fanjakan̈a io nanomboko nanjaka tamy taon̈o 1914.
John: Ia, nisy bokinaro araiky zay baka nivakiako, ke izio tao nikoran̈a fa Fanjakan̈any Zan̈ahary zen̈y nanomboko nanjaka taminy 1914. Ke tafandiniky oe zaho, fotony anao baka nivolan̈a fa raha jiaby inoanaro io miorin̈y amy Baiboly ao fo.
Cameron: Ia, zen̈y ankitin̈y.
John: Ke zaho baka mba efa namaky Baiboly io fo rango amboanalohany firaka amparany fa zaho tsiary nahita “1914” zen̈y tao. Avio nizahako koa Baiboly aminy Internet ao, nisoratiko “1914” fa zaho tsy nahita izio tao.
Cameron: Ten̈a derain̈y anao John, fotony anao nahavita namaky Baiboly rango amboanalohany firaka amparany. Zen̈y baka midika fa tianao mare Volan̈a Zan̈ahary io.
John: Ia, tsisy boky miran̈a izio foeky baka ay!
Cameron: Marin̈y zen̈y. Fa derain̈y koa anao fotony izikoa anao fa nisy fan̈ontanian̈a, tamy Baiboly tao fo koa nitadiavanao valiny. Baiboly mampirisiky atsika, ‘hitady fo’ izikoa fa misy raha tiantsika ho hay. Narehanao tsarabe raha zen̈y. b Tsara anao mba efa niezaka nitady karaha zen̈y.
John: Mersy. Tiako baka zaho mahaimahay fo. Ke zaho nikarokaroko hely, avio hitako fa nisy fan̈azavan̈a momba taon̈o 1914 io amy boky ianarantsika ty. Izy ato mikoran̈a momba nôfiny panjaka araiky zay. Izy zen̈y nan̈inôfy fa nisy kakazo maventy be araiky nitapahan̈a, avio izio nimpody naniry. Karakaraha zen̈y izy tao zay.
Cameron: Aon, ia. Izio faminanian̈a koran̈iny Daniela toko 4. Momba nôfiny Nebokadnezara panjakany Babylony izio.
John: Ia, izy zen̈y. Zaho nimpodimpody namaky faminanian̈a io fa, ehe, tsy hitako foeky ino ifandraisanizio amy Fanjakan̈any Zan̈ahary na koa amy taon̈o 1914.
Cameron: Hainao John, nata paminan̈y Daniela koa ane mba tsy ten̈a nahazo dikany raha nirahiny Zan̈ahary nisoratiny io.
John: Aon?
Cameron: Ia. Izy nivolan̈a amy Daniela 12:8: “Ren̈iko ndraiky zen̈y fa tsy mazava aminaka dikany.”
John: Korazy zaho fa mba tsy aminaka zaraiky fo dikany zen̈y izio tsy mazava.
Cameron: Ny marin̈y aminany, tsy azony Daniela dikanizio fotony mbala tsendriky tamy fotoan̈a io nitiavany Zan̈ahary ahaizanolo tsarabe dikany faminanian̈a amy bokiny Daniela. Fa atsika amy zioty ndraiky, efa afaka mahay tsarabe dikanizio.
John: Nan̈ino eky anao mivolan̈a zen̈y?
Cameron: Aleva onon̈o baka raha volan̈iny andininy fan̈araka izio, amy Daniela 12:9 ty: “Tokony hitanàn̈a sekire fo volan̈a zen̈y sady hasian̈a tombokase, mandrapaviany fotoan̈any farany.” Dikanizen̈y, efa tamy “fotoan̈any farany” tafara tatỳ vo mazava tsara dikany faminanian̈a io. Sady karaha raha handeha hianarantsika tsy ho ela, porofo jiaby efa man̈aboaka fa atsika io efa miain̈y amy fotoan̈a zen̈y. c
John: Ke asa mety azavainao aminaka basy faminanian̈any Daniela io?
Cameron: Hiezaka zaho.
NÔFINY NEBOKADNEZARA
Cameron: Alô fintin̈iko hely antsendriky raha hitany Nebokadnezara panjaka, tan̈atiny nôfinany, zay atsika vo man̈azava dikany.
John: Ia.
Cameron: Tan̈aty nôfinany tao, Nebokadnezara nahita kakazo maventy oe. Izio nipaka firaka tamy lan̈itry tan̈y. Avio amy zay, izy naharen̈y anjeliny Zan̈ahary araiky nan̈iraka fa mila tapahan̈a zen̈y kakazo io fa fototronany fo mila ambela amy tany ao fo. Izikoa fa tapitry “fepotoan̈a fito”, kakazo io nimpody naniry ndraiky koa. d Tanteraka tamy panjaka Nebokadnezara antsendriky faminanian̈a io. Miran̈a kakazo nipaka firaka amy lan̈itry io baka izy, fotony izy panjaka farandraha nalaza eky. Fa baka tio fo, karaha kakazo in̈y, izy nitapahan̈a tan̈aty “fepotoan̈a fito.” Asa tsaroanao raha nandalo?
John: Aha tsy tsaroako ay.
Cameron: Tsy man̈ino. Baiboly mivolan̈a fa Nebokadnezara nanjary adala, tan̈aty fito taon̈o. Tan̈aty fotoan̈a zen̈y, izy tsy afaka nanjaka. Fa izikoa fa tapitry fepotoan̈a fito io, nimpody taminany jerinany ke izy afaka nanjaka ndraiky koa. e
John: Ia, mazava aminaka firaka iô. Fa ino fo ma ifandraisany raha aby zen̈y amy Fanjakan̈any Zan̈ahary ndreky amy taon̈o 1914?
Cameron: Izikoa fintin̈iny, indroe tanteraka faminanian̈a io. Araiky voanalohany, izikoa fa tsy afaka nanjaka Panjaka Nebokadnezara. Araiky faharoe amy zay, izikoa fa fitondrasan̈any Zan̈ahary somary tapaka hely. Ke araiky zen̈y mifandray amy Fanjakan̈any Zan̈ahary io.
John: Karakory ma nahaizanao fa tanteraka fan̈indroeny faminanian̈a io, ke izio amy zay mikasiky Fanjakan̈any Zan̈ahary?
Cameron: Amy faminanian̈a io ao fo efa ahaizantsika zen̈y. Arakany Daniela 4:17, faminanian̈a io namezan̈a “baka ho hainolo fa Araiky Farany An̈abo in̈y Pitondra amy fanjakan̈anolombelon̈o, ke lan̈iany tiany hamian̈a fitondrasan̈a amiany izy.” Asa nalainao onon̈o izy iô mivolan̈a “fanjakan̈anolombelon̈o” io?
John: Ia, ho izy “Araiky Farany An̈abo in̈y Pitondra amy fanjakan̈anolombelon̈o.”
Cameron: Ia. Ke araka hevitrinao, azovy ma “Araiky Farany An̈abo” io?
John: Mety Zan̈ahary donko izio ay.
Cameron: Zen̈y ke. Baka aminio ahaizantsika fa faminanian̈a io tsy raha momba Nebokadnezara fo fa mikoran̈a momba Fanjakan̈any Zan̈ahary koa, tsy ino zen̈y fa, fahifan̈any Zan̈ahary hanjaka aminolombelon̈o. Izikoa zahavanao faminanian̈a aloha ndreky afarany andininy io, loso mazava tsara aminao raha zen̈y.
John: Ino tianao avian̈a?
INO MA RAHA TEN̈A KORAN̈INY BOKY IO?
Cameron: Amy bokiny Daniela ao, matetiky, ahitan̈a faminanian̈a araiky mimpodimpody matetiky. Izio faminanian̈a mivolan̈a fa Zan̈ahary hanangana Fanjakan̈a araiky, ke Jesosy Zanakanany hataony Panjakanizio. Alô baka atsika himpody alohaloha hely. Amy Daniela 2:44. Mba vakia kony izio azafady.
John: Ia, ho izy: “Aminy andrandro panjaka aby io, Zan̈ahariny lan̈itry hanangana fanjakan̈a tsy ho ravan̈a mandrakizay, baka io fanjakan̈a io tsy ho azonolo hafa. Izio hanorotoro ndreky han̈afoan̈a fanjakan̈a jiaby io, ke izio zaraiky fo ho tavela mandrakizay.”
Cameron: Mersy. Araka hevitrinao, mikoran̈a momba Fanjakan̈any Zan̈ahary ma andininteny io?
John: Donko!
Cameron: Hitanao izy iô mivolan̈a fa Fanjakan̈a io “ho tavela mandrakizay.” Fanjakan̈any Zan̈ahary fo mety karaha zen̈y fa tsy fanjakan̈anolombelon̈o, tsy zen̈y?
John: Ia.
Cameron: Ty koa misy faminanian̈a araiky hafa amy bokiny Daniela ato, mikoran̈a mikasiky Fanjakan̈any Zan̈ahary. Izio faminanian̈a amy Daniela 7:13, 14. Izio mikoran̈a momba olo araiky hanjary panjaka, hoizy: “Namian̈a izy amy zay fitondrasan̈a ndreky voninahitry ndreky fanjakan̈a, baka firenena ndreky olo jiaby samby amy volan̈anany hanompo izy aby. Fitondrasan̈anany io tsy handalo fo fa hahadin̈y, fanjakan̈anany io koa tsy ho rongana foeky.” Momba ino ma koran̈anany io?
John: Momba fanjakan̈a.
Cameron: Ia. Fa tsy kila fanjakan̈a. Aleva onon̈o baka, hoizy tio, Fanjakan̈a io hanan̈a fahifan̈a amy “firenena ndreky olo jiaby samby amy volan̈anany.” Izikoa atao amy volan̈a hafa, Fanjakan̈a io hanjaka erantany.
John: Aon, kaiky zen̈y raha tianizio koran̈iny! Tsy azoko foeky zen̈y tio.
Cameron: Karaha ty koa volan̈inizio: “Fitondrasan̈anany io tsy handalo fo fa hahadin̈y, fanjakan̈anany io koa tsy ho rongana foeky.” Tsy hitanao miran̈a raha koran̈iny Daniela 2:44 tio, raha zen̈y?
John: Ia miran̈a.
Cameron: Alô basy fintin̈intsika hely raha nikoran̈intsika aby tio in̈y. Faminanian̈a amy bokiny Daniela toko 4 io nisoratin̈y baka ho hainolo fa “Araiky Farany An̈abo in̈y Pitondra amy fanjakan̈anolombelon̈o.” Raha zen̈y man̈aboaka fa faminanian̈a io tsy tanteraka tamy Nebokadnezara fo fa mbala misy fahatantirahany maventy koa. Avio izikoa atsika fa mandiniky bokiny Daniela, atsika mahita faminanian̈a mikoran̈a fa Zan̈ahary hanangana fitondrasan̈a hindesiny Zanany. Araka hevitrinao, mikoran̈a momba Fanjakan̈any Zan̈ahary koa dikanizen̈y faminanian̈a amy Daniela toko 4 io?
John: Ia, zen̈y ke. Fa mbala tsy hitako fo ino ifandraisanizen̈y amy taon̈o 1914.
“AMBILÀ TAPITRY FEPOTOAN̈A FITO”
Cameron: Alô himpodianantsika ndraiky momba Panjaka Nebokadnezara in̈y. Tamy faminanian̈a io tanteraka voanalohany, kakazo in̈y nanondro Nebokadnezara. Nijanon̈o tsy nanjaka hely izy izikoa fa nitapahin̈y kakazo io, avio nadoko tio tan̈atiny fepotoan̈a fito. Tanteraka raha zen̈y izikoa izy fa loso adala tan̈aty fotoan̈a lavalava. Tapitry fepotoan̈a fito io izikoa fa nimpody nisy jery ndraiky Nebokadnezara ke nimpody nanjaka. Fa tanteraka fan̈indroeny koa faminanian̈a io, izikoa fa nisy fotoan̈a tsy nitondra vahoakanany elaela Zan̈ahary. Zen̈y ndraiky tsy midika fa nisy problemo taminany tao.
John: Tsy mazava ay.
Cameron: Iro panjaka Israelita aby io, volan̈iny Baiboly fa nipetraka tamy “seziny Jehovah.” f Iro io nisoloten̈a Zan̈ahary izikoa fa nitondra olonany. Fitondrasan̈andro io lamariky fa Zan̈ahary manjaka amy vahoakanany. Kanefa nisy fotoan̈a, ankamaraozandro panjaka aby io tsy nan̈eky Zan̈ahary eky, ke nan̈araka iro koa ankamaraozany vahoaka. Fotony iro nivadiky taminany, nambelany Zan̈ahary iro ho resindro Babylonianin̈y aby io tamy 607 T.K. Ke nanomboko tamy zen̈y, efa tsisy panjaka eky nisoloten̈a Jehovah ta Jerosalema. Ke mitovy tsy nanjaka taminy olonany fo Zan̈ahary. Asa azonao firaka iô?
John: Ia, azoko ke.
Cameron: Ke nanomboko tamy 607 T.K. fepotoan̈a fito io. Nanomboko taminizio Zan̈ahary efa tsy nitondra eky. Ke izikoa fa tapitry fepotoan̈a fito io, Zan̈ahary hanendry pitondra vaovao, andan̈itry an̈y, hisolonten̈a Izy. Amy zen̈y vo tanteraka iro faminanian̈a hafa nivakiantsika tamy bokiny Daniela tao. Ke ty fan̈ontanian̈a maventy: Ombian̈a ma tapitry fepotoan̈a fito io? Izikoa haintsika valinizen̈y, ho haintsika ombian̈a Fanjakan̈any Zan̈ahary nanomboko nanjaka.
John: Tsy taminy 1914 edy izio tapitry va?
Cameron: Ia, zen̈y ankitin̈y.
John: Fa karakory fomba nahaizan̈a zen̈y?
Cameron: Tamy Jesosy navy tambony tany tatỳ, izy nivolan̈a fa fepotoan̈a fito io mbala tsendriky tapitry. g Dikanizen̈y izio fotoan̈a lava oe. Efa anjatony taon̈o talohany naviany Jesosy tambony tany tatỳ baka efa nanomboko fepotoan̈a fito io, avio izio mbala nitohy tafarany nimpodianany tandan̈itry tan̈y. Baka io tsaraova fa efa “amy fotoan̈any farany” vo mazava tsarabe dikany faminanian̈a amy bokiny Daniela aby io. h Naharikian̈a fa nisy olo tia nandalin̈y Baiboly, lian̈a mare tamy faminanian̈a aby io, taloha heliny taon̈o 1900. Ke nidinihindro marikitry izio. Loso hitandro fa taminy 1914 tapitry fepotoan̈a fito io. Sady ankamaraozany raha miboaka man̈erantany nanomboko tamy zen̈y, man̈amarin̈y fa taminy 1914 ankitin̈y Fanjakan̈any Zan̈ahary nanomboko nanjaka tandan̈itry tan̈y. Nanomboko tamy taon̈o io andra farany, na koa “fotoan̈any farany.” Somary sarosarotro hely ndraiky tsy zen̈y?
John: Mila mimpody vakiako ndraiky donko izio zay vo azoko tsarabe ay!
Cameron: Aza mavozo. Nata zaho hitanao io ane mba elaela vo nahazo tsarabe dikany faminanian̈a io. Fa farafaharatsiny, mba hitanao tamy koran̈antsika tio in̈y fa miorin̈y amy Baiboly ao fo raha hinoanay Vavolombelon̈o Jehovah mikasiky Fanjakan̈any Zan̈ahary io.
John: Ia, efa ela nahitako zen̈y. Raha jiaby inoanaro miôrin̈y amy Baiboly ao fo.
Cameron: Hitako fa ndray anao koa mba man̈iry han̈ano karaha zen̈y. Fa karaha nivolanko tio, mety mbala vaovao mare aminao raha aby nikoran̈intsika tio. Mety mbala misy kestion manahiran̈a jerinao. Ohatra, hitantsika tio baka fa fepotoan̈a fito io koa mifandray amy Fanjakan̈any Zan̈ahary, avio izio nanomboko tamy 607 T.K. Kanefa, akory nahaizantsika fa taminy 1914 tapitry fepotoan̈a fito io?
John: Ia, zen̈y edy raha handihanany jeriko io.
Cameron: Baiboly fo koa man̈ampy atsika hahay akory marin̈y halavasany fepotoan̈a fito io. Tianao izikoa zen̈y hikoran̈intsika amy man̈araka? i
John: Pare tsarabe.
Misy hevitry araiky manokan̈a ma mba tianao ho hay an̈atiny Baiboly ao? Mba tianao ho hay ma raha mikasiky raha inoany Vavolombelon̈o Jehovah na raha fataondro? Izikoa zen̈y, aza misalasala man̈ontany araiky amy Vavolombelon̈o Jehovah. Ho ravoravo izy hikoran̈a momba zen̈y aminao.
a Vavolombelon̈o Jehovah manan̈a programo fianaran̈a Baiboly miaraka aminolo, antran̈ondro an̈y. Tsy man̈efa fianaran̈a io. Ke amizio iro afaka miaraka mikoran̈a hevitry maro an̈aty Baiboly ao.
b Ohabolana 2:3-5.
c Zahava toko 9 amy boky Ino ma Raha Ten̈a Ampianariny Baiboly? naboakany Vavolombelon̈o Jehovah. Izio koa afaka alainao amy www.pr418.com.
d Daniela 4:13-17.
e Daniela 4:20-36.
f 1 Tantara 29:23.
g Karaha ty nivolan̈iny Jesosy mikasiky faminanian̈a nambarany momba andra farany: “Jerosalema [manondro fitondrasan̈any Zan̈ahary] hitsahindro firenena hafa aby io firaka fotoan̈a voatondro nindro firenena hafa io tapitry.” (Lioka 21:24) Dikanizen̈y, mbala nitohy taminy andrany Jesosy i fotoan̈a tsy nanjakany Zan̈ahary in̈y, avio izio tsy tapitry izikoa tsy efa navy andra farany.
h Daniela 12:9.
i Amy lahatsoratra man̈araka ty mikoran̈a andininteny aby man̈aboaka akory halavasany fepotoan̈a fito io.
Mety ho Tianao Koa
TILIKAMBO FIAMBESAN̈A
Ombian̈a ma Fanjakan̈any Zan̈ahary Nikomansy Nanjaka? (Fizaran̈a 2)
Faminanian̈any Baiboly ndreky raha nampan̈inofisany Zan̈ahary panjakany Babylony in̈y manondro taon̈o hiboahanizio.
RAHA MOMBA ZAHAY
Raha Matetiky An̈ontanianolo Momba Vavolombelon̈o Jehovah
Zahava valiny fan̈ontanian̈a matetiky apetrakanolo.
