FOTOKEVITRY MAVENTY HITA ATO | NAN̈INO MA MBALA MISY FIRAKA IZIOTY BAIBOLY?
Mbala Misy Fo Baiboly Ndray Mora Robaka Raha Nanoratan̈a Izio
NY RAHA MISY: Taratasy papyrus ndreky hoditry biby raha voanalohany nampiasaindro panoratra Baiboly ndreky olo aby nan̈ano kopỳ izio. a (2 Timoty 4:13) Ke Baiboly nanjary natahoran̈a tsy ho hisy eky.
Papyrus io taratasy mora matriaka, mipôko kolera, baka io koa izio mahaimalemy. Karaha ty nivolan̈iny Richard Parkinson ndreky Stephen Quirke, pikaroko momba Ezipty taloha tan̈y: “Taratasy io mety ho robaka ke manjary misarasaraka ndreky mivadiky fotaka foeky. Izikoa taratasy papyrus io ajarisin̈y, izio mety ho mando ke manjary moazỳ na lo. Ke izio izikoa alevin̈y, hoaniny biby na biby madiniky, karaha ataony vitsiky malandy.” Sasany tamy taratasy papyrus aby io betibetiky fo efa robaka edy, tafara heliny nahitan̈a iro, fotony iro azony hazavan̈a na hamandoan̈a be loatra.
Hoditry biby ndraiky mbala mahadin̈idin̈y tozay taratasy papyrus. Fa ndray zen̈y, izio mora robaka izikoa tsy tandreman̈a tsara na izikoa apetraka amy tany mafana be, manintsy be, mando, na mazava loatra. b Izio koa farandraha tiany biby madiniky aby io. Ke tsy mahagaga izikoa efa tsisy eky ankamarozandro soratan̈ana taloha aby in̈y. Izikoa Baiboly io robaka karaha zen̈y, niaraka tsisy taminany koa hafatra tan̈aty tao.
NAN̈INO MBALA MISY BAIBOLY FO FIRAKA ZIOTY? Lalàn̈any jiosy mivolan̈a fa iro boky dimy voanalohany amy Baiboly ao tokony hadikany panjaka tsiaraikiaraiky amy boky. (Deoteronomia 17:18) Maro koa soratan̈ana nataondro olo mahay mare man̈ano kopỳ aby io. Ke tamy taonjato voanalohany, nahitan̈a Soratra Masin̈y aby tamy synagoga jiaby tan Israely tan̈y firaka ta Makedonia. (Lioka 4:16, 17; Asan’ny Apostoly 17:11) Karakory mbala mampisy sasany amindro soratan̈ana efa ela be aby io firaka ziôty?
Horonambokiny Ranomasin̈y Maty navoakajy tan̈atiny taonjato maro, fotony nampidirin̈y tan̈aty sajoa tanimanga, baka io napetraka tan̈aty lavabato tamy tany paiky tan̈y
Philip W. Comfort, manampahaizan̈a momba Testamenta Vaovao, nivolan̈a karaha ty: “Efa fataony Jiosy aby io man̈akajy horonan̈a misy Soratra Masin̈y an̈aty sajoa.” Ndray iro Kristianin̈y aby io koa mbala nan̈ano zen̈y matoa nahitan̈a soratan̈ana taloha be tan̈y tan̈aty sajoa tanimanga, taminy efitry madiniky mahizikiziky, lavabato, ndreky tamy tany paiky.
VOKANY: Andrivony aby tapany Baiboly soratan̈ana taloha be tan̈y io mbala misy fo firaka izioty. Sasany amindro io efa mandilatrany 2 000 taon̈o. Baiboly zaraiky fo misy soratan̈ana maro salakady efa ela be karaha zen̈y.
a Papyrus io an̈arany kakazo araiky maniry an̈aty rano. Baka tamizio nangalan̈a raha mety hanoratan̈a.
b Filazan̈a momba fahaleovanten̈any Etazonỳ, ohatra, nisoratin̈y taminy hoditry biby. Kanefa, tsy ampy 250 taon̈o tafara tatỳ, ankamaraozany soratra tan̈atinizio tao nanjary nahainanjavon̈o fo ke efa kalikaly tsy avoavaky eky.
