Efa mandilatran’ny 130 taon̈o zay, Vavolombelon̈on’i Jehovah miaraka man̈ano fivoriambe isaka taon̈o. Amy ziôty, fandaharan̈a amy fivoriambe ahitan̈a kabaro mandilatran’ny 40, hira, fan̈adikadin̈ana, ndreky video. Hahazo hatsaran̈a mpan̈atriky izikoa ‘hita ndreky ren̈y’ tsara raha jiaby atao amin’izio, fôtony fandaharan̈a handrisiky irô han̈ano raha. (Lioka 2:20) Akôry hampiasan̈a fan̈amezan̈a ataonao baka azo antoko fa hahazo hatsaran̈a baka amy fivoriambe aby io olo jiaby, na aia na aia tany misy irô?

 Maro stady na gymnase môderny an Erôpy ndreky amy tany hafa, efa misy fitaovan̈a fandifasan̈a feo ndreky video. Ke ino fo mahavy atsika matetiky mbala man̈apetaka fitaovan̈antsika fo koa fa mamôndro toeran̈a aby io han̈anaovan̈a fivoriambe? Karaha ty ho David, rahalahy miaraka miasa amy Sampan-draharaha amy Foibe Man̈aparitaka Feo Ndreky Video: “Vitsy amy toeran̈a fondroen̈a aby io natao hitandrin̈esan̈a tsarabe fandaharan̈a mandilatran’ny tsiota lera. Sady aminio ankamarozany fandaharan̈a aby io misy kabaro. Fitaovan̈a fandifasan̈a feo ndreky video amy stady fan̈anaovan̈a spaoro aby io zisty ampiasain̈a han̈anaovan̈a filazan̈a na handifasan̈a hirahira fohiky fo. Ekran-drô zisty an̈aboahan̈a skaoro, pibilisite, ndreky han̈ampodian̈a tapaka videon’ny saoma io. Fa amy fivoriambentsika ndraiky, tiantsika izikoa mpan̈atriky afaka mizaha video lava, aviô maharen̈y ndreky mahazo tsara raha jiaby volan̈in’ny mpan̈ano kabaro baka amy pipitara arỳ.”

 Samby amy karazany irô stady fan̈anaovan̈a fivoriambe aby io, zen̈y mahavy fitaovan̈a fandifasan̈a feo ndreky video aby io mila ivoavoan̈a. Ke miaraka hay aia stady han̈anaovan̈a fivoriambe, Sampan-draharaha Miandraikitry Feo ndreky Video amy birôn’ny sampan̈a direkty mifidy aia tany hipitrahan’ny mpan̈atriky, mifan̈araka amin’isan’olo iritriretindrô ho avy amy fivoriambe io ndreky amin’ny hamaraozan’olo tandry toeran̈a io. Koa fa vita zen̈y, zahavandrô rahalahy aby io aia toeran̈a an̈apitrahan̈a bafla ndreky ekran. Zahavandrô koa akôry han̈apitahan̈a raha aby io, baka iô ataondrô listy fitaovan̈a jiaby ilain̈a baka haharen̈y ndreky hahita fandaharan̈a tsara olo jiaby.

 Fandaharan̈a amy fivoriambe sasany hatao amy volan̈a maro, ke mahaimaro ndreky isan-karazany fitaovan̈a ilain̈y andifasan̈a feo ndreky video. Izikoa fandaharan̈a io hadika amy volan̈a hafa, irô mpandika teny aby io mila mahita ndreky maharen̈y tsara fandaharan̈a. Baka iô raha volan̈in’ny mpandika teny aby io alefa amin’ny antainin’ny radio samby hafa arin̈esan’olo mampiasa volan̈a aby io. Atsika mampiasa prôgramo manokan̈a fandifasan̈a video mahavita mandefa video amy volan̈a valo samihafa indraiky mipaka, ke olo jiaby afaka miaraka mahita video. Ho David: “Be garamidany fitaovan̈a aby io, ke mila ampiofan̈iny mare lan̈ian’olo hikirakira irô io.”

 Ankamarozan’ny sampan̈a efa misy fitaovan̈a fandifasan̈a feo ndreky video, ke fitaovan̈a aby io fo ampiasain̈y isaka taon̈o. Lera fotoan̈an’ny fivoriambe, zarazaraindrô rahalahy aby io fitaovan̈a aby io aviô halefa mitety fivoriambe maromaro. Isaka taon̈o, sampan̈an’ny Etazony mandany mandilatran’ny 200 000$ a handifasan̈a fitaovan̈an’ny fivoriambe atao amy sampan̈a io. Fa zen̈y mbala moramora tozay mividy ndreky mikobaby fitaovan̈a fan̈ampiny. Karaha ty nikoran̈in’i Steven, rahalahy an̈isany niandraikitry sampan-draharahan’ny feo ndreky video tamy fivoriambe araiky ta Kanada: “Alain’ny ekipin’ny feo ndreky video antoko tsarabe fa kompile, milamin̈y aviô voakajy tsara irô vy, boulon, tady ndreky raha jiaby momba fitaovan̈a aby io, amy zen̈y irô io pare hampiasain̈y amy fandaharan̈a man̈araka.”

 Lafo fondron’ny fitaovan̈a fandifasan̈a feo ndreky video, salakady izy amy zen̈y matetiky tsy tsara aby na koa efa robaka. Zen̈y mahavy, matetiky atsika fo mividy fitaovan̈a ilaintsika. Amy ziôty, kadiriny 24 000$ ekran LED dimy na telo metara, fandifasan̈a video an̈atin’ny tran̈o. Baka iô, kablan’ny mikrô 15 metara fo efa kadiriny 20$. Ke alohan’irô hividy fitaovan̈a, Sampan’asan’ny Feo Ndreky Video miaraka miasa amy Sampan-draharahan’ny Fivangan̈a Entan̈a, ‘mandiniky tsarabe vola mety ho lany.’ (Lioka 14:28) Dinihindrô, ohatra, firy olo hahazo hatsaran̈a amy fitaovan̈a aby io? Efa fividianan̈a fitaovan̈a vaovao edy ma ny ten̈a tsara? Misy tany azo antoko ma afaka hikajianan̈a fitaovan̈a aby io, baka iô atsika ma manan̈a fitaovan̈a ndreky mpiasa an-tsitrapô mahay mikobaby raha aby io?

 Fitaovan̈a aby io mila kobabian̈a tsy tapaka, na an̈atiny na ambelany, amy zen̈y izy mahadin̈y ela sady mitsitsy vola. Lera fitaovan̈a aby io indesin̈y amy toeran̈a hafa, ampidirin̈y an̈atin’ny kesiky fatatra izy tsara baka tsy robaka. Amboarin̈y koa kesiky aby io koa fa misy robaka.

 Lany fan̈ahy olo tsy Vavolombelon̈o koa fa mahita hatsaran̈an’ny feo ndreky video amy fivoriambentsika. Nisy mpiasan’ny sosiete araiky an̈isan’ny farany malaza amy fandifasan̈a raha amy tele ndreky radio, ohatra, nahita hatsaran̈an’ny feo ndreky raha aboakantsika amy video. Ho Jonathan, rahalahy an̈isan’ny mpikarakara fitaovan̈a fandifasan̈a feo ndreky video amy fivoriambe: “Gaga izy koa fa nahay fa mpiasa an-tsitrapô aby olo jiaby tamin’ny ekipinay fa tsisy olo manan̈a fahaizan̈a manokan̈a. Izy nivolan̈a fa dimy andra sôsietendrô vo mahavita mametapetaka fitaovan̈a jiaby voapetakantsika an̈atin’ny andra araiky sy sasany.” Tamy fivoriambe araiky hafa, karaha ty nivolan̈in’ny lelahy araiky miandraikitry tran̈o nan̈anaovan̈a izio: “Maro manam-pahaizan̈a amy lamoziky ndreky video nandalo teto zay fa zaho mbala tsiary nahita olo mahay mandilatra irô nan̈ano fivoriambe ty!”

 Ino hatsaran̈a azonao nohon’ny fisiany fitaovan̈a fandifasan̈a feo ndreky video amy fivoriambe? Mety ho karaha raha tsapan’i David baka an Angletera ty koa raha tsapanao. Ho izy: “Zaho 88 taon̈o. Zaho efa mpandeha fivoriambe fo letrizay, fa hitako fa amy ziôty zaho vo ten̈a mahavita mifantoko tsarabe amy fandaharan̈a. Maro tsara mare video aby io, ke karaha hitako betibetiky fo efa tapitry fandaharan̈a. Baka amy fisian’ny video aby io koa lôso mazava tsara sady mitohy tsara raha ianaran̈a.” Ty ndraiky raha nivolan̈in’i Micheal, mipetraka a Nigeria: “Irô rahalahy ndreky ranabavy aby io ziôty efa maharen̈y mpan̈ano kabaro ndreky afaka mahita videontsika aby io tsarabe, ke irô mahavita mifantoko tsara amy fandaharan̈a.”

 Lera anao man̈ano fivoriamben’ny vondrom-paritry na fivoriambe manokan̈a “Ambarà ‘Vaovao Tsara’”! amy taon̈o ty, miniminia hely ino aby raha tsy maintsy natao baka anao maharen̈y ndreky mahita tsara fandaharan̈a jiaby. Baka amy fan̈amezan̈a ataonarô hahavitan̈a raha jiaby zen̈y, an̈atin’izen̈y fan̈amezan̈a atao baka amin’ny Internet, amy donate.pr418.com. Ke mersy anarô jiaby!