“Vo tsy ela zay, karaha tsy posibla amintsika hahazo hanin̈y arapan̈ahy hatao amy forma elektroniky.” Asa anao ikenao raha zen̈y? Zen̈y an̈isany raha nikoran̈iny Geoffrey Jackson tamy kabaro mankahery nataony, tamy Vaovao Farany Baka amy Filankevipitantan̈ana (2020) #6. Ho izy koa: “Fa izioty ndraiky atsika mahita fa ten̈a sahiran̈a atsika tamy valan̈aretin̈y ty, izikoa tsy nanan̈a raha karaha ataony JW Library. Jehovah in̈y kaiky nan̈oman̈a atsika taon̈o maro hiatriky raha karaha ty.”

 Akory nataony Jehovah nan̈oman̈a atsika tamizio? Ino aby ma raha natao tamy namoron̈ana JW Library? Ino raha nilain̈a baka izio hitohy ndreky hahaitsara fo?

 Tamy May 2013, Filankevipitantan̈ana nangataka tamindro man̈ano Programo MEPS, sampandraharaha amy foibe an̈y, han̈ano application misy Baiboly Fandikan-tenin’ny Tontolo Vaovao navaozin̈y. “Tamy zen̈y zahay tsendriky nan̈aboaka application io tamy Play Store” ho Paul Willies, miasa amy Programo MEPS. “Fa zahay namory ekipy, nan̈ajanon̈o tetikasa sasany, ke niaraka niasa tamy sampandraharaha hafa hamoron̈ana application io ndreky raha jiaby an̈atinizio. Nivavaka matetiky zahay, ke nohony fan̈ampiany Jehovah, dimy fanjava tafaranizio fo, efa naboaka tamy fivorian̈a fatao isaka taon̈o application io!”

 Fa problemo fan̈araka, akory han̈ovoan̈a application io hanjary ten̈a biblioteky misy boky maro mare ndreky amy volan̈a maro koa. Ke komansy tamy Zanvie 2015, maro amindro bokintsika amy teny angiley natao taminy application io, avio tsiota fanjava tafaranizen̈y, olo efa afaka nangala raha aby tao, tamy volan̈a mandilatra zato karazany.

 Rango tamy zen̈y, iro rahalahy aby io nankatsara application io, ke nan̈ano video, boky jiaby, ndreky raha jiaby zahan̈a amy fivorian̈a, natao antany araiky. Nataondro ao koa Fitaovana Fikarohana, hampiasainolo lera man̈ano fikarohan̈a aminy andininy amy Baiboly. Ke iro koa fa manindry andininy io, direkty miboaka gazety man̈azava izio.

 Fitaovan̈a elektroniky valo tapitrisa isanandra, avio mandilatra 15 tapitrisa, izahavanolo amy JW Library io isaka fanjava! Ino raha mila atao baka izio mandeha fo amy fitaovan̈a elktroniky aby io? Man̈azava zen̈y karaha ty rahalahy Willies: “Application portabla io tsisy hoe ke vita tanteraka zen̈y. Mbala miasa mare zahay mampiditry raha vaovao ndreky mampitombo fahaizanolo mampiasa izio. Sady sistemo commerciale lastio koa mitaky fitaovan̈a elektroniky io mila atao mise à jour matetiky, ke zahay misy raha amboarin̈y fo baka izio mifan̈araka amy sistemo io fo. Zahay koa mila maharaka mampanonga programonay, baka mahatondra iro boky maro ndreky raha nalain̈a feo mahaimaro fo amy JW Library.” Izikoa atao konty, amy JW Library ao izioty amy volan̈a isankarazany, misy boky ndreky gazety mandeha 200 000, avio audio ndreky video mandilatra 600 000!

 Baka tsy mijanon̈o application io, mila ampian̈a programo ao. Sasany amindro io mila lisansy, ke mila vangain̈a izio. Lisansy araiky fo izioty efa 1 500 dolara isaka taon̈o. Fan̈ampinizen̈y koa, Programo MEPS mandany 10 000 dolara isaka taon̈o hampandihanan̈a tsarabe JW Library io aminy ordinatera vaovao, tablety ndreky telefony.

 JW Library io mampihen̈y vola lany amy fan̈anovan̈a pirinty, fan̈atambaran̈a boky ndreky fandifasan̈a boky. Ohatra araiky fo, bokikely Fandinihana ny Soratra Masina Isan’andro. Taloha, efa presky 12 tapitrisa tamy Fandinihana ny Soratra Masina Isan’andro—2013 natao pirinty. Fa tamy 2020 ndraiky, dimy tapitrisa fo natao pirinty, nata mandilatra 700 000 isany pitory erantany. Nan̈ino ma natao fan̈ovoan̈a zen̈y? Fotony maro amindro rahalahy ndreky ranabavintsika aby io man̈ano teny vakina isanandra io amy JW Library. a

 Maro hatsaran̈a azonolo mampiasa JW Library io. Karaha ataony Geneviève, mipetraka a Kanada an̈y nivolan̈a fa nanjary tsy tapatapaka izioty fan̈anovany fianaran̈a. “Tsy asitriko fa ten̈a sarotro aminaka mamory boky marobe io isaka maraindrain̈y, ke tsy vitako man̈ano fianaran̈a isaka maraindrain̈y. Fa rango nisiany JW Library ndraiky, zaho mangala tabletinaka, raha jiaby efa pare an̈aty ao, zaho mianatra aminjay. Nanjary tsy tapatapaka eky fianaran̈anaka izioty, ke nankafatatra finoan̈anaka raha zen̈y sady nampamatotro zaho.”

 Ten̈a ilain̈a koa izio amy fisiany valan̈aretin̈y izioty. Karaha ty nivolan̈iny Chalyn, baka a Etazonỳ an̈y: “Rango nisiany COVID-19 erantany, zaho tsiary nahita boky vaovao vita pirinty naboaka, efa mandilatra taon̈o araiky zay. Fa ampy hanin̈y arapan̈ahy fo atsika, fotony atsika misy JW Library. Ten̈a man̈ano mersy Jehovah zaho nan̈amia izio. Ten̈a be fitiavan̈a izy.”

 Karaha zen̈y koa Faye, mipetraka a Philippines an̈y, mivolan̈a raha tsapany karaha raha tsapanolo maro fo. Volan̈iny: “Zaho mampiasa JW Library fotony izio raha ten̈a man̈ampy zaho hahaiharikitry Jehovah. Io raha voanalohany vakiko isaka maraindrain̈y. Izio fo raha tandrin̈esako zaho koa fa man̈ano asa antran̈o. Izio fo ampiasaiko izikoa fa man̈oman̈a fampianaran̈a Baiboly. Mizaha video amizio ao fo zaho, isaka zaho malalaka. Mamaky lahatsoratra na Baiboly ao zaho izikoa fa miambin̈y latoro elaela. Izio tsy lafo marin̈y.”

 Ten̈a miasa amy fanompoan̈a koa JW Library io. Karaha zen̈y izioty ranabavy araiky ta Cameroun tan̈y. Izy tihampiasa andininy hitany nampiasainy ranabavy araiky, herin̈iandra vitsivitsy talohanizio. Fa kanefa tsy nazony onon̈o tany misy andininy io baka tio. Karaha ty nambarany: “Nisy volan̈a taminy andininy io nazoko onon̈o. Safe zaho nan̈abian̈a JW Library, zaho niditry tamy Baiboly, avio nitadiaviko andininy ahitan̈a volan̈a in̈y. Direkty hitako andininy nitadiaviko in̈y. JW Library io ten̈a man̈ampy zaho hahita iro andininy maro, koa fa tsy tsaroako tany misy izy.”

 Nohony anaro tsara fan̈ahy, ke mazoto man̈ano fan̈amezan̈a amy donate.pr418.com mahavy atsika nahavita namoron̈o, mikarakara, ndreky mankatsara JW Library, ampiasaindro rahalahy ndreky ranabavintsika erantany. Mersy anaro amy toetsain̈y tsaranaro zen̈y.

1. Oktobra 2013: Voanalohany niboaka JW Library nisy Baiboly Fandikan-tenin’ny Tontolo Vaovao navaozin̈y

2. Zanvie 2015: Nasian̈a Boky ndreky gazety maro tamy teny angiley, avio nisy tamy volan̈a anjatony aby

3. Novambra 2015: Nety natao kolera tamizio

4. May 2016: Nisy fivorian̈a natao tao

5. May 2017: Nasian̈a note tao

6. Desambara 2017: Nasian̈a Baiboly Fianaran̈a (angiley) tao

7. Marsy 2019: Afaka mangala audio, video stream, ndreky fitaovan̈a fikarohan̈a

8. Zanvie 2021: Mankafiza Fiain̈ana Tsisy Farany! natao tao