Mandilatra 60 isanjatony panompo manontolo andra manokana aminy ekipy miasa amy fandikanteny, tsy miasa amy birôny sampan̈a fa amy birôny fandikanteny mitokana (BFM). Ino ma ten̈a mahatsara zen̈y? Ino aby fitaovan̈a tsy maintsy nilain̈y baka ho vita tsara asa amy BFM? Nan̈ino ten̈a misy vokany aminy hatsaran̈any fandikanteny toeran̈a misy iro ekipy pandika teny aby io?

 Natao amy toeran̈a ten̈a ampiasan̈a volan̈a io BFM aby io. Karaha ty ho Karin, pandika teny amy tenimparitry aliman: “Zahay nafindra tamy BFM ta Cuauhtémoc, a Meksiky, ke tenimparitry aliman fo fivolan̈anay, na amy zahay samy pandika teny, na amy fanompoan̈a na mandeha bazary. Zahay ten̈a an̈ivonolo mampiasa volan̈anay. Zahay maharen̈y fomba fivolan̈ana, ohateny efa ela tsy ren̈inay in̈y, baka io zahay maharaka tsarabe fivoarany volan̈a.”

 Nivolan̈a James an̈isany ekipiny pandika teny amy volan̈a frafra a Ghana fa misy fotoan̈a izy mbala manimanin̈y fiarahan̈a tamy fianakavian̈any Betela, taminiro mbala tamy birôny sampan̈a tan̈y. Fa ho izy ndraiky: “Ten̈a tiako miasa amy BFM. Anao mitory amy volan̈anolo adika io, ke anao mahita iro olo aby io ravoravo maharen̈y vaovao tsara io amy volan̈andro. Ten̈a manohin̈y fonaka raha zen̈y.”

 Akory ataondro rahalahintsika aby io mandiniky tany hasian̈a BFM? Ho Joseph, an̈isany Sampandraharaha Miandraikitry Fan̈oren̈ana Erantany, a Warwick, a Etazonỳ an̈y: “An̈isany problemo matetiky hitanay, misy tany mijaly motro ndreky rano, ndreky fan̈anovan̈a Internet hangalan̈a asa handeha adika io. Ke zahay koa fa mifidy tany hasian̈a BFM, zahay mizaha tany maromaro, amy tany misy olo mampiasa volan̈a io.”

 Hevitry farany malaky ndreky tsy mandany vola, fan̈anovan̈a BFM amy Tran̈o Fan̈anovan̈a Fivoriambe, Tran̈o Fivorian̈a na amy tran̈ony misionera, ahafahany pandika teny mody isaka hariva. Izikoa tsy mety amy tany sasany raha zen̈y, iro rahalahy aby io mety mivanga tran̈o na birô mety ipitrahany pandika teny ndreky iasandro. Fa izikoa ndraiky misy fiovoandraha, alafondro izio, avio vola azo amizio mety hampiasain̈a amy tany ten̈a ilavan̈a izy.

 Tamy taompanompoan̈a 2020 in̈y, vola mandeha 13 million de dolara nilanin̈a tamy BFM. Iro ekipy miasa amizio mila raha karaha ataony ordinatera, programo manokana, fitaovan̈a fangalan̈a feo, ndreky Internet. Ohatra izioty, ordinatera ampiasainy pandika teny araiky fo efa 750 dolara. Efa atao ao programo nivangain̈a ndreky programo Watchtower Translation System. Izio man̈ampy pandika teny handamin̈y asandro ndreky hizaha loharanonkevitry ilaindro.

 Iro pandika teny aby io koa nahazo fitaovan̈a fangalan̈a feo an̈aty birôndro ao fo. Ten̈a nilain̈a izio, fotony rango nisiany valan̈aretin̈y COVID-19, maro pandika teny mahavita mandika teny fo nata iro antran̈ondro an̈y, avio mbala mahavita mangala feo raha adikandro ndreky video maro fo.

 Matetiky misy piasa antsitrapo koa man̈ampy amy fikarakaran̈a BFM ndreky man̈ampy pandika teny aby io hiverifie raha adikandro. Karaha ty ho Cirstin, miasa amy BFM mandika teny afrikaans, a Le Cap, an Afriky Atsimo an̈y: “Maro pitory ndreky pisava lalan̈a maharitry eto afaka mampiasa tsara talentandro.”

 Ravoravo piasa antsitrapo aby io amy tombontsoa azondro. Nisy ranabavy araiky zay nivolan̈a fa ten̈a namelombelon̈o izy asa atao amy BFM. Misy rahalahy ndreky ranabavy sasany baka eto koa alain̈a feo. Karaha ty ho Juana, pandika teny totonac a Veracruz, a Meksiky an̈y: “Mahaimaro fo ranadahy ndreky rahavavy mety alain̈a feo ampiasain̈y aminy audio ndreky video, fotony tsy lavitry tanàna mampiasa volan̈anay io.

 Mba nahaitsara ma fandikan̈a teny izikoa fa nisy BFM? Mandeha antapitrisany iro pamaky aby io mahita fa mahaitsara zen̈y izio. Nivolan̈a karaha ty Cédric, an̈atiny ekipiny pandika teny kongo, amy Repobliky Demokratikiny Congo an̈y: “Taloha, nataondro rahalahy ndreky ranabavy aby io ‘teny kongo amy bokiny fandaminan̈a’ an̈arany fandikanteny nataonay, fotony ho iro tsy karaha fivolan̈anolo andavanandra zen̈y. Fa izioty ndraiky iro mivolan̈a fa amy teny kongo moderny zen̈y bokintsika aby io, fotony efa amy fivolan̈anolo izioty.”

 Karaha zen̈y koa nivolan̈iny Andile, pandika teny xhosa, an Afriky Atsimo: “Maro mare olo mivolan̈a fa niova fandikanteny izioty. Ndray iro tsaiky zatra namaky Tilikambo Fiambesan̈a tamy teny angiley taloha izioty efa mamaky izio amy teny xhosa. Tiandro mare Fandikan-tenin’ny Tontolo Vaovao navaozin̈y, fotony amy fivolan̈ananolo izioty tsarabe.”

 Fan̈amezan̈a antsitrapo aminy asa erantany ndreky fan̈amezan̈a baka amy donate.pr418.com fo ahavitan̈a manangan̈a ndreky mikobaby BFM, avio ikarakaran̈a iro olo jiaby miasa ao.