Ten̈a maro antambo tamy taon̈o 2020 in̈y, sady tamy zin̈y koa komansy niparitaka erantany COVID-19. Karakory nataony Vavolombelon̈o Jehovah han̈ampian̈a piaramanompo tamizin̈y?

 Tamy taompanompoan̈a 2020 in̈y, a Komitiny Pandrindra amy Filankevipitantan̈ana nan̈eky hanokanan̈a vola 28 tapitrisa dolara b han̈ampian̈a iro amy tany tatrany antambo. Vola io nan̈ampian̈a iro tany nandalovany antambo mandilatrany 200, an̈isanizen̈y valan̈aretin̈y COVID-19, sikilony, ranobe tan Afriky, mafo ta Venozoelà, baka io tany paiky ta Zimbabwe. Nampiasa volany fan̈amezan̈a taminio nivangan̈a hanin̈y, rano, nikarakaran̈a tany hipitrahanolo, aody, ndreky materiely fan̈adiovan̈a ndreky fiasan̈a tran̈o. Diniha baka sasany amindro asa famonjian̈a olo aby ty.

 COVID-19. Valan̈aretin̈y io ten̈a nisy vokany tamindro rahalahy ndreky ranabavintsika erantany, na taminy arabatan̈a, na taminy arapihetsehampo ndreky tamy velonten̈andro. Iro rahalahy an̈isany komity aby io nizaha raha ten̈a nilaindro rahalahy aby io mare, avio iro nan̈ano tatitry man̈ampy Komitiny Pandrindra hahay fomba ten̈a tsara han̈anovan̈a fan̈ampian̈a.

 Tan̈atiny taon̈o araiky iro tamy Repobliky Demokratikiny Congo tan̈y nahazo hanin̈y maro, rano, materiely fan̈adiovan̈a, ndreky aody ten̈a miasa amindro. Tamy faritry sasany, RDC koa niaraka niasa tamindro antipan̈ahy tan̈y, baka iro rahalahy aby io mahazo fan̈ampian̈a baka amy fanjakan̈a koa.

 Misy olo tsy Vavolombelon̈o Jehovah naharemarky asa famonjian̈a iro rahalahy aby io. Ohatra izioty, karaha ty nivolan̈iny Field Simwinga manampahifan̈a araiky, tamindro rahalahy aby io: “Mahatsiaro manan̈a trosa zahay amindro fan̈ampian̈a amy fotoan̈any tsarabe amianaro iro fianakavian̈a ten̈a sahiran̈a io.”

 Mosary tan Angola. Rango nisiany COVID-19 ty, nanjary tsy naro hanin̈y tan Angola, avio nanonga mare vangandraha. Naro rahalahintsika ndreky ranabavintsika tsy maharaka mivanga hanin̈y eky nazonizen̈y.

 Sampan̈any Brezily nirahin̈y nan̈ampy iro, ke nandefa hanin̈y tamindro rahalahy tan Angola aby io. Baka hampiasan̈a tsarabe vola fan̈amezan̈a io, iro rahalahy aby io nan̈ano fikarohan̈a mare fomba ten̈a tsara hivangan̈a hanin̈y ndreky handifasan̈a izio. Ke izikoa atao konty, fan̈ampian̈a valerany 22 dolara isanisany nivangain̈a ndreky nalefa. Tan̈atinizio tao nasian̈a vary, zariko, ndreky menaka, ke 20 kilo isanisany. Nisy 33 544 pake fan̈ampian̈a nalefa, 654 tonnes. Fan̈ampiny hanin̈y tantoeran̈a tan̈y, hanin̈y nahampy olo 50 000 nirasain̈y!

 Akory ho rahalahy ndreky ranabavy aby io tamy zen̈y? Karaha ty nambarany Alexandre, mipetraka amy tany lavitry mare, baka an Angola an̈y: “Hitako tsarabe fa Jehovah ten̈a tia zaho ndreky tsy man̈ambela zaho latsatokana. Valera amy fandaminan̈any Jehovah koa zaho!” Karaha ty ndraiky nivolan̈iny Mariza, mitarimy zanany manokan̈a: “Ren̈iny Jehovah tan̈inaka. Man̈ano mersy izy ndreky fandaminan̈anany zaho e!”

 Haintany ta Zimbabwe. Tamy taompanompoan̈a 2020 in̈y, nisy haintany mare ta Zimbabwe, ke olo antapitrisany nanjary mosary mare. Vavolombelon̈o Jehovah andrivony koa tsy ampy hanin̈y.

 Nisy rahalahy dimy ta RDC niformen̈a han̈amia fan̈ampian̈a iro rahalahintsika aby io. Pitory anjatony koa nitatahy iro namon̈o hanin̈y, nandrasa izio, na nampindran̈a tomobily. c Tamy taompanompoan̈a 2020 in̈y, vola 691 561 dolara nampiasain̈a nan̈amezan̈a hanin̈y olo mandilatra 22 700!

 Nisy tamindro rahalahy ndreky ranabavintsika aby io koa efa lany vatsy, tamy fotoan̈a naviany fan̈ampian̈a io. Nan̈ano mersy Jehovah mare iro tamy zen̈y. Sasany ndraiky vaky fan̈anovan̈a hira amy fihiranantsika aby!

 Tamy faritry misy zahay, nisy ranabavy aroe maty vady nan̈aton̈o fivorian̈any tanàna misy iro, fotony misy fan̈ampian̈a baka amy fikambanan̈a tsy miankiny amy fanjakan̈a (ONG). Nivadiky politiky koran̈a baka tio, ke iro ranabavy aby io nanapakevitry fa tsy ikendro raha tadiavinolo aby io baka hazahoandro fan̈ampian̈a. Iro koa fa niala tamy fivorian̈a io, iro fokonolo aby io nivolan̈a karaha ty tamindro: “Aza mimpody atỳ eky hangala hanin̈y aminay!” Fa aroe herin̈iandra tafaranizin̈y fo, iro rahalahintsika aby io navy tan̈y nan̈amia fan̈ampian̈a iro ranabavy aroe in̈y. Mbala nindro koa navy aloha fa tsy niny fikambanan̈a in̈y!

 Nisy vokany tsara tamy fitorian̈a vaovao tsara koa fan̈ampian̈a iro rahalahy ta Zimbabwe tan̈y. Karaha zen̈y tantarany Prisca. Izy mipetraka amy tanàna hely zay. Ndray tio maintany be in̈y, izy mbala mandeha mitory fo isaka robia ndreky joma. Nata amy leranolo mamboly, mbala karaha zen̈y fo nataony. Iro olo tanàna araiky aminany man̈akivy izy. Ho iro: “Hofoatiny mosary ry zanakanao koa toriteny fo raha ataonao.” Ho Prisca tamindro: “Jehovah tsiary ndraiky nan̈ary olo manompo izy.” Tsy ela tafaranizin̈y, ranabavy io nahazo fan̈ampian̈a baka tamy fandaminan̈a. Iro jiraninany aby io lany fan̈ahy, ke ho iro tamy Prisca: “Ampianara raha momba Zan̈aharinao io zahay fa izy tsiary nan̈ary anao ankitin̈y e.” Fito amindro io izioty mitandren̈y fivorian̈a amy radio.

 Efa mahaimarikitry mare farany io ke tsy maintsy ho maro antambo mbala handalo. (Matio 24:3, 7) Ten̈a man̈ano mersy anaro zahay amy fan̈amezan̈a ataonaro amy donate.pr418.com. Ampiasain̈a hamonjian̈a olo sahiran̈a iro io, han̈amezan̈a raha ten̈a ilaindro, amy fotoan̈a ten̈a ilandro izy.