‘Filankevipitantan̈ana nanapakevitry fa tokony hivory mivantan̈a fiangonan̈a jiaby manomboko aminy 1 Avrily izikoa tsisy fanakanan̈a baka amy fanjakana.’ Tamy voanalohany Marsy 2022, haravoan̈a tsisy ambaka izy niny Vavolombelon̈o Jehovah erantany nahita filazan̈a io tamy jw.org. Tamy zen̈y mbala tsy tapitry foeky fisiany COVID-19 io. a Ino aby fan̈ovoan̈a natao ndreky fitaovan̈a nilain̈y hiarovan̈a olo man̈atriky fivorian̈a baka tsy ho tatrany virisy io? Mbala ho mety ampiasain̈y ma Tran̈o Fivorian̈a ndray efa tsy nampiasain̈y nivorian̈a nivantan̈a tan̈antiny taon̈o aroe zay?

 Efa fanjava maromaro raha ny marin̈y iro rahalahintsika aby io efa tsy nieritreritry himpody hivory mivantan̈a ndraiky amy Tran̈o Fivorian̈a.

 Fanjava araiky tafarany atsika nijanon̈o tsy nitory nivantan̈a tamy 2020, efa nandiniky Sampandraharaha Miandraikitry Fan̈oren̈ana Erantany na (SFE), a Warwick, a Etazony an̈y, fa ino mety ho vokatrany COVID-19 io amy fomba hampiasantsika Tran̈o Fivorian̈a. Nidinihindro ino aby raha mety atao baka atsika tsy ho tatrany aretin̈y io lera mivory amy toeran̈a fivoriantsika.

 Matetiky tsy nitovy raha nilain̈y tamy tany tsiaraikiaraiky erantany. Nivolan̈a karaha ty Matthew De Sanctis, miasa aminy SFE, fa “problemo tamy tany sasany izio, tsy ampy fitaovan̈a fanasan̈a tan̈ana. Koa fa tsisy rano tamy Tran̈o Fivorian̈a, tsy maintsy nividy na nantsaka tamy ten̈arano tsy lavitry tio, na tamy vôvo. Tamy tany sasany ndraiky, nivoany fanjakana fepetra napetrakandro momba fiparitahany tsiko tantran̈o ndreky momba afisy ahaizan̈a momba fahadiovan̈a ndreky fahasalaman̈a.”

 Ke ino vahaolan̈a hitandro rahalahintsika aby io? Nivolan̈a Matthew fa “vahaolan̈a tsotra ndreky tsy mandany vola hitandro rahalahintsika aby io, kanefa ten̈a nahomby tamy Tran̈o Fivorian̈a maro oe. Ohatra izio, ta Paouasie-Nouvelle-Guinée, nisy fitaovan̈a fanasan̈a tan̈ana namboarin̈y tamy plasitky tandry rano 20 litra. Nan̈apitahandro robine fo siô io. Efapolo dolara amerikain (170 000 ariary) fo vola lanindro rahalahy aby io, tamy fitaovan̈a nampiasaindro rahalahy aby io tamy Tran̈o Fivorian̈a tambanivolo tan̈y. Iro fitaovan̈a fanasan̈a tan̈ana nampiasain̈y tamy Tran̈o Fivorian̈a tan̈y Afriky ndraiky nafarin̈y baka tan̈y Asia. Fitaovan̈a maro tsara mandeha 6 000 nafarin̈y.

 Nisy fan̈ovoan̈a sasany koa natao tamy Tran̈o Fivorian̈a, an̈isany zen̈y nasian̈a fitaovan̈a mapafana ndreky mampanintsy tsiko tamy Tran̈o Fivorian̈a, baka ho ampy tsara tsiko na koa nivoan̈a iro tsiko efa tao. Maro koa iro fiangonan̈a nividy tahony mikrô lava, amy zen̈y tsy voatery atao pasipasy amy tan̈ana mikrô. Natao ten̈a vitsy araka ny mety atao raha kasihin̈y amy tan̈ana matetiky, baka io diovin̈y fo iro in̈y an̈isany zen̈y koa lakile ndreky robine. Zen̈y raha nataondro baka iro tsy findrany virisy io. Fiangonan̈a sasany ndraiky nampiasa robine mandeha fo amy W.C ndro an̈y. Kadiriny 1 400 dolara amerikain (kadiriny tsiota hetsy araiary) vola lany tamy fan̈avaozan̈a Tran̈o Fivorian̈a tsiaraikiaraiky ta Chilie.

 Nifen̈y mare koa iro rahalahintsika aby io hitsitsy vola fan̈amezan̈a antsitrapo ndray raha maventy tamindro fikarakaran̈a Tran̈o Fivorian̈a io. Ohatra izio, iro rahalahy tamy tany sasany, iro nampiasa fan̈ampian̈a baka tamy fanjakana hividianan̈a ndreky han̈amboaran̈a fitaovan̈a fanasan̈a tan̈ana ndreky tahony mikrô. Birony Sampan̈a maro koa nifan̈araka fa hiaraka hividy entan̈a maro eraka ny mety atao mba hitsitsian̈a vola. Direkty nandeha taminy loziny man̈amboatra raha araiky sampan̈a ndreky Sampandraharahany Fidivianan̈a Entan̈a nividy entan̈a. An̈y baka mba moramora vidiny baka io koa mba malaky avy entan̈a aby io.

 Ke vokatrany fandaminan̈a natao hikarakaran̈a Tran̈o Fivorian̈a aby in̈y, loso voaharo olo nan̈atriky fivorian̈a mivantan̈a salakady nahatsiaro nilamin̈y. Ranabavy Dulcine baka a Pérou nitsotra karaha ty, “navozo hely zaho koa fa naharen̈y fa himpody hivory mivantan̈a ndraiky amy Tran̈o Fivorian̈a atsika.” “Tamy valan̈aretin̈y” io vo nanomboko niparitaka volan̈iny, voa izy. Ke nivolan̈iny karaha ty: “Navozo hely zaho himpody ndraiky hivory mivantan̈a amy Tran̈o Fivorian̈a tsao ho voa ndraiky koa. Fa zaho koa fa navy tan̈y, hitako tsarabe fa ten̈a nan̈ano raha iro antipan̈ahy aby io hiarovan̈a zahay. Ohatra izio nisy fitaovan̈a fanasan̈a tan̈ana tan̈y, baka io nasian̈a tahony lavabe koa mikrô. Nan̈ano fandaharan̈a koa iro nan̈adiovan̈a ndreky namonoan̈a mikrôby, taloha ndreky tafarany fivorian̈a tsiaraikiaraiky. Zaho ten̈a nahatsiaro voaharo, ary zen̈y ankitin̈y raha ten̈a nilaiko.” b

 Nisy problemo hafa ndraiky ranabavy Sara, baka Zambie. Volan̈iny: “Natiny COVID-19 vadiko, fanjava maromaro loso zay. Niasa loha mare zaho, han̈ano karakory eky zaho koa man̈atriky fivorian̈a voanalohany tsy miaraka aminany amy Tran̈o Fivorian̈a an̈y? Ino raha tsapany izy koa fa nan̈atriky fivorian̈a? Karaha ty tohiny koran̈anany: “Zaho koa fa nan̈atriky fivorian̈a mivantan̈a, tsapako tsarabe fa tsy miala zaho Jehovah aminy andra farany amy donia ty. Tia ndreky mankahery baka io manohan̈a zaho mandilatrany taloha koa iro antipan̈ahy ndreky iro piaramanompo aby io izioty.”

 Ravoravo mare iro rahalahintsika tiantsika aby io fotony tafiaraka mivory ndraiky amy Tran̈o Fivorian̈a. Ten̈a mankasitraka taminy fan̈amezan̈a nataonaro. Natao baka tamy donate.pr418.com ankamarozandro fan̈amezan̈a aby io. Fan̈amezan̈a nataonaro aby in̈y nahafahantsika nikobaby foibeny fivavahan̈a marin̈y, baka milamin̈y tsara salakady tsy avozoan̈a ho tatrany aretin̈y atsika lera mivory ao.