Man̈ano asa maventy Vavolombelon̈o Jehovah han̈ampian̈a olo amy tany mandilatra 200. Kanefa 35 amindro tany aby io fo ten̈a mahazo fan̈amezan̈a ampy tsara hazahoan̈a raha ilaindro. Ke karakory fo hahitan̈a vola hampiasain̈y hikarakaran̈a raha ilainolo amy tany mahantra?

 Filankevipitantan̈ana mizaha ino aby raha ilainy Vavolombelon̈o Jehovah erantany, baka iro mahavita manompo Jehovah ndreky mitory vaovao tsara. Baka amy zen̈y hahaizandro akory fomba hampiasain̈a vola fan̈amezan̈a. Ohatra, izikoa misy sampan̈a mahazo fan̈amezan̈a be ke tsy lanindro, lambinizin̈y amian̈a sampan̈a hafa mila fan̈ampian̈a. Karaha zen̈y nataondro Kristianin̈y tamy taonjato voanalohany. Iro nifan̈ampy baka ‘naminoan̈a ny tsy ampy.’ (2 Korintianina 8:14) Lambiny baka tamindro namiandro Kristianin̈y zay sahiran̈a.

 Ino raha tsapandro rahalahy nahazo lambiny baka tamy sampan̈a hafa aby io? Karaha ataony a Tanzanie, antsasakanolo mipetraka an̈y mikarama 7 000 ariary fo isanandra. Fa nisy fan̈amboaran̈a nila natao tamy Tran̈o Fivorian̈a ampiasainy fiangonan̈a Mafinga, ke iro nahazo fan̈ampian̈a. Karaha ty raha nisoratindro: “Nahainaro fo olo navy nivory rango nan̈avaozan̈a Tran̈o Fivorianay. Mahatsiaro sambatra zahay fotony an̈isany fandaminan̈any Jehovah. Ravoravo koa zahay fotony tsy matity iro rahalahy ndreky anabavinay erantany, ke nanjary tsara zahan̈a oe Tran̈o Fivorianay.”

 Nohony valan̈aretin̈y COVID-19, sasany amy rahalahintsika a Sri Lanka an̈y nanjary tatrany mosary, ke an̈isanizen̈y Imara Fernando ndreky Enosh zanany. Nakiry izy nisy fan̈amezan̈a nataondro rahalahy ndreky ranabavy baka antany hafa, nafahandro nahazo raha nilaindro fo. Karaha ty raha nisoratindro tamy karty: Man̈ano mersy iro rahalahy ndreky ranabavy nan̈ampy zahay tan̈atiny fotoan̈a sarotro in̈y zahay. Iro ten̈a be fitiavan̈a. Ravoravo zahay fa an̈isany fianakaviany pirahalahy erantany. Mivavaka fo koa zahay baka hampiany Jehovah piaramanompo jiaby, an̈atiny andra farany izioty.”

 Na aia na aia tany misy iro rahalahy ndreky ranabavintsika aby io, von̈ono fo iro hirasa raha anan̈andro. Enosh nan̈amboatra boaty hely, fotony izy tihamory vola hamezan̈a zay fianakavian̈a mila fan̈ampian̈a. Guadalupe Álvarez ndraiky mipetraka amy faritry Meksiky an̈y. Ten̈a tia man̈amia koa izy. Hely karamanolo an̈y fotony vitsy fo olo mahazo karama mitohy, na karama farany ambany. Kanefa na zen̈y ny raha nisy, mbala mirasa raha anan̈any fo Guadalupe Álvarez. Volan̈iny: “Man̈ano mersy Jehovah zaho fotony izy tsara toetry ndreky be fitiavan̈a, baka io tsy mivadiky. Na hely fan̈amezan̈a amiako, haiko fa izikoa izin̈y efa atambatra amy fan̈amezan̈a baka amy rahalahy ndreky ranabavy hafa, azo ampiasain̈y han̈ampian̈a rahalahy ndreky ranabavy sahiran̈a.”

 Ravoravo fo zay sampan̈a mandefa vola amy tany mila fan̈ampian̈a. Karaha ty nivolan̈iny Anthony Carvalho, an̈isany Komitiny Sampan̈any Brezily: “Tan̈atiny taon̈o taon̈o zay zahay nila fan̈ampian̈a baka tamy sampan̈a hafa fo hankifan̈a asa ta Brezily teto, ke nanjary nisy fitombosan̈a teto. Fa amy zioty efa niova fiain̈ana eto, ke afaka man̈ampy firenena hafa koa zahay. Mandiniky fitorian̈a atao erantany iro rahalahy ndreky ranabavy a Brezily eto, misy ahitandro ino azondro atao han̈ampian̈a amy fankifan̈a asa io.”

 Ino raha ten̈a tsara mety hataony Vavolombelon̈o Jehovah araiky, izikoa izy tihan̈ampy rahalahy ndreky ranabavy sahiran̈a? Tsy direkty mandefa vola amy birony sampan̈a izy, fa man̈ano fan̈amezan̈a aminy asa erantany. Afaka man̈ano zen̈y izy amy fiangonan̈a misy izy, ke mandatsaka vola amy boaty “Asa Erantany”, na man̈ano fan̈amezan̈a aminy Internet, amy donate.pr418.com. Ten̈a ankasitrahan̈a fan̈amezan̈a ataonaro zen̈y.