Tilikambo Fiambesan̈a 1 Ziain 1912 nikoran̈a karaha ty: “Mety ankamarozan’ny mpamaky gazetinay aby io mahay olo jamba. Afaka mahazo boky bôjo irô olo aby io. ... Atao pirinty amy soratra marôkorôko boky aby natao nin’olo jamba io, baka ho afaka vakindrô.” Karaha ty koa raha volan̈in’ny gazety io: “Maro olo jamba ten̈a ravoravo izikoa fa mahay fa ho maro mare hatsaran̈a ho azon’olombelon̈o ambony tany eto amin’ny hoavy.”

 Tamy fotoan̈a nanoratan̈a volan̈a aby io, mbala tsendriky nisy soratra braille iraisan’olo jiaby mivolan̈a angiley. Kanefa ndraiky Vavolombelon̈on’i Jehovah efa nan̈aboaka soratra braille, nan̈ambaran̈a tamin’olo jamba aby io, fahamarin̈ana baka amy Baiboly. Mbala man̈ano zen̈y fo atsika firaka amy ziôty. Efa misy amy volan̈a mandilatra 50 karazany boky ndreky gazety aboaka amy soratra braille io iziôty. Akôry fomba nan̈anaovan̈a zen̈y?

 Alamin̈y ndreky avadiky hanjary soratra braille antsendriky lahatsoratra io. Karaha ty nambaran’i Michael Millen, miaraka miasa amy Sampan-draharaha Mikarakara Lahatsoratra a Paterson, New York: “Taloha, programo nivangain̈y nampiasaintsika baka hamadihan̈a hanjary soratra braille soratra amy boky ndreky gazetintsika aby io, ke izio tsy nety nampiasain̈y tamy volan̈a jiaby nilaintsika. Fa iziôty ndraiky atsika mampiasa programo Watchtower Translation System, aviô izio afaka mandika ankamarozan’ny volan̈a jiaby fampiasain’olo eran-tany hanjary soratra braille. Zaho matoky tsisy programo karaha io foeky na aia na aia.”

 Tsy lahatsoratra amy boky ndreky gazety fo amy boky ndreky gazety amy soratra braille io, fa fan̈azavan̈a sary koa. Ohatra, karaha ty fan̈azavan̈a sary amy fôn̈on’ny boky Mankafiza Fiain̈ana Tsisy Farany! in̈y: “Lelahy araiky mikomansy mandeha amy lalan̈a miotakotaka feno raha maniry maro tsara ndreky tazoa aviô bongo.” Ho i Jamshed, rahalahy araiky jamba mpikarakara fiangonan̈a sady mpisava lalan̈a: “Ten̈a valera aminaka irô fan̈azavan̈a sary aby ao io.”

 Izikoa fa baka navadiky hanjary soratra braille lahatsoratra amy boky ndreky gazety aby io, alefa amy sampan̈a man̈ano pirinty amy soratra braille irô io. Atao pirinty amy taratasy matevin̈y pazy tsiaraikiaraiky amindrô boky ndreky gazety amy soratra marôkorôko io. Tsy loaka taratasy io lera asian̈a soratra marôkorôko io, sady tsy robaka ndray ampiasain̈y matetiky. Baka iô, irô pazy vita pirinty aby io atambatra amy spirale (raha plastiky fan̈atambaran̈a boky) baka hanjary boky araiky, aviô alefa miaraka amy boky ndreky gazety handeha amy fiangonan̈a, na alefa paosty izikoa paosty mandefa izio bôjo amin’olo jamba. Izikoa ilain̈y, afaka mitady fomba andifasan̈a izio faran’ny malaky sampan̈a, amy zen̈y hahazo boky ndreky gazety ilaindrô amy fivorian̈an’ny fiangonan̈a irô rahalahy ndreky anabavy jamba na tsy mahita tsara aby io.

 Mandany fotoan̈a ndreky vola be asa jiaby zen̈y. Ohatra, karaha ataony amy fan̈anaovan̈a pirinty a Wallkill, a New York, mitovy amy fotoan̈a lany an̈anaovan̈a pirinty Baiboly mahazatra 50 000, fotoan̈a lany vo mahaboaka Baiboly 2 fo amy soratra braille. Atao boky 25, Baiboly tsiaraikiaraiky amy soratra braille angiley sokajy faharoe, aviô in-123 ny vola lany an̈anaovan̈a pirinty Baiboly mahazatra araiky fo, vola lany an̈anaovan̈a irô boky 25 aby io. a Aviô mbala fôn̈on’irô boky 25 io fo efa kadiriny 150 dolara amerikain!

 Ino raha tsapandrô olo man̈ampy amy fan̈aboahan̈a boky ndreky gazety amy soratra braille? Ho i Nadia, manompo amy sampan̈an’i Afriky Atsimo: “Tsy mora fiain̈anandrô rahalahy ndreky ranabavintsika jamba na tsy mahita tsara aby io. Hitako ten̈a fitahian̈a baka amy Jehovah zaho mba afaka man̈ano raha han̈ampian̈a irô. Hita tsarabe fa Jehovah ten̈a tia irô.”

 Karakôry fo basy izikoa misy olo jamba tsy mahay mamaky soratra braille? Taon̈o vitsivitsy lôso zay, naboaka boky Mianara Mamaky Soratra Braille. Misy soratra braille ndreky soratra vita pirinty aminany io, aviô natao hianaran’olo araiky jamba miaraka amin’olo araiky mahita. Misy lardoazy manokan̈a ndreky fanoratan̈a mety ampiasain’olo jamba hanoratan̈a braille koa miaraka aminany io, amy zen̈y izy foeky manoratra litera braille tsiaraikiaraiky. Man̈ano fan̈azaran-ten̈a karaha zen̈y man̈ampy izy baka hangalan̈a onon̈o litera braille tsiaraikiraiky ndreky hahaizan̈a izio, izikoa fa tsapain’ny rantsantan̈anany.

 Ino hatsaran̈a azondrô rahalahy ndreky ranabavy aby jamba ndreky tsy mahita tsara aby io koa fa nahazo boky ndreky gazety amy soratra braille? Zatra nandeha nivory Ernst, mipetraka a Haiti an̈y, fa izy tamy zen̈y tsisy boky ndreky gazety amy soratra braille. Ke nila nampiasa fitadidian̈anany mare izy, baka hahazo onon̈o anjaranany tamy fampiofan̈ana ndreky hahavita han̈amia valin-teny tamy fiarahan̈a midiniky. Ho izy: “Zaho iziôty afaka manangan-tan̈ana ndreky mamaly teny fo, isaka teteky. Ten̈a mahatsapa marikitry irô rahalahy ndreky ranabavy aby io zaho. Mira fo baka hanin̈y ara-pan̈ahy azontsika jiaby!”

 Misy anti-pan̈ahy araiky tsy mahita tsara zay an Aotrisy an̈y, Jan an̈arany. Izy mpitariky Fianaran̈a Tilikambo ndreky Fianaran̈a Baiboly Ataon’ny Fiangonan̈a. Ho izy: “Ninintsika io mazava tsara nohon’ny irô boky hafa amy soratra braille. Mora hita, ohatra, ninintsika nimeron’ny pazy ndreky lamariky amy pazy ambany, aviô voazava tsara amin’ny an-tsipiriany sary.”

 Jamba sady maren̈iny i Seon-ok, ranabavy mpisava lalan̈a a Kore Atsimo an̈y. Nadika taminany tamin’ny alalan’ny fitanan̈a tan̈ana fo fivorian̈a jiaby taloha, fa amy ziôty ndraiky izy fo afaka mamaky irô boky fianaran̈a Baiboly amy soratra braille. Ho izy: “Sarotro vakin̈y boky hafa amy soratra braille fôtony misy tsy ampy teboko, tsy mahitsy filaharany, na matify loatra taratasy. Fa taratasy ampiasain’ny Vavolombelon̈on’i Jehovah ndraiky pare tsara, aviô miboaka tsara teboko, ke mora aminaka mamaky izy.” Karaha ty koa ho izy: “Tsy afaka nianatra irô boky momba Baiboly aby io zaho taloha, izikoa tsisy olo nan̈ampy zaho. Fa iziôty ndraiky, zaho zaraiky fo efa mahavita mianatra. Ten̈a ravoravo zaho fôtony mahavita man̈oman̈a fivorian̈a ataontsika isaka herin̈iandra, ndreky afaka mandray anjara koa. Vakiko aby bokintsika jiaby amy soratra braille. Zaho tihamaky irô io fo.”

 Karaha amy bokintsika atao pirinty aby io fo, bokintsika amy soratra braille io misy soratra karaha ty: “Boky ty tsy alafo. Antony nan̈aboahan̈a izity, hampianaran̈a Baiboly olo eran-tany. Mety man̈amia zay vola tindriny lan̈iany olo tihanohan̈a izio.” Mersy anarô man̈ano fan̈amezan̈a eraka fomba ambara amy donate.pr418.com. Fazotoanarô man̈ano fan̈amezan̈a io mahavy olo jiaby mahazo hanin̈y ara-pan̈ahy, an̈atin’izen̈y irô olo jamba ndreky tsy mahita tsara.