Isaka fanjava, efa tsy din̈intsika aby hizahavan̈a video parkarazany ndreky programo mankahery aboaka amy Tele JW. Kanefa maro amindro piaramanompo amintsika an Afriky tsy afaka mangala iro io aminy Internet. Nan̈ino?

 Maro faritry tsy mahazo Internet an Afriky, fa misy tany mba mahazo Internet fa lafo be man̈ano izy, na miadan̈a koneksion. Nisy piandraikitry faritry araiky ta Madagasikara tan̈y, nangala programo Tele JW isaka fanjava in̈y tamy cyber, vola 57 000Ar nirahindro nifainy. Mbala bebeny karamanolo sasany an̈atiny herin̈iandra araiky vola zen̈y.

 Kanefa na misy problemo zen̈y, mbala afaka mizaha programo Tele JW fo olo antapitrisany an Afriky, kanefa tsy mila Internet. Akory ataondro amy zen̈y?

 Komansy taminy 2017, nalefa tamy tele satelity Tele JW io, ke afaka man̈araka izio fo iro piaramanompo amintsika an Afriky atsimony Sahara an̈y. Tsy man̈efa mizaha izio, baka io izio mandeha fo man̈iakandra, komansy tinainy firaka dimansy. Misy amy volan̈a 16 karazany koa izio.

 Vavolombelon̈o Jehovah nan̈ano fan̈arahan̈a taminy orinasa pandefa tele amy satelity antsendriky. Kadiriny firenena 35 an Afriky atsimony Sahara an̈y mahazo tele satelity io. Mandilatrany 12 000 dolara isaka fanjava vola ifain̈y aminany io. Izikoa fa misy fandaharan̈a manokana alefa amy kanaly hafa, man̈efa volan̈a fan̈ampiny atsika. Nohony raha zen̈y, olo andrivony afaka man̈araka fivoriambeny vondroparitry, na programo manokana alefa mivantan̈a, misy ifandraisany amy fitsidihan̈a sampan̈a. a

 Maro olo izioty afaka mizaha Tele JW Satelity io antran̈ondro, firaka aminolo tsy Vavolombelon̈o Jehovah. Fa ndray zen̈y, maro rahalahy ndreky ranabavy tsy mahavanga raha hizahavan̈a tele satelity. Ke zen̈y nahavy Tran̈o Fivorian̈a mandeha 3 670 manan̈amby, nasian̈a fitaovan̈a mety izahavan̈a tele satelity. Izikoa ndraiky amy Tran̈o Fivorian̈a efa misy ekran fandifasan̈a video, 70 dolara iô fo vidiny fitaovan̈a miaraka frais han̈ateran̈a izy an̈y. Fa koa tsy zen̈y ndraiky, mety hahatakatra 530 dolara vidiny fitaovan̈a jiaby ilain̈a handifasan̈a tele satelity io.

 Ravoravo mare iro rahalahy ndreky ranabavy aby io izikoa fa nahazo Tele JW Satelity io. Karaha ty volan̈iny antipan̈ahy araiky a Cameroun an̈y: “Aminay jiaby antran̈o ato, izio mira mana tamy tany paiky tan̈y in̈y fo.” Karaha ty koa nivolan̈iny Odebode, rahalahy mipetraka a Nizeria an̈y: “Intelo isaka herin̈iandra zahay tran̈o araiky miaraka mizaha Tele JW Satelity. Efa tsy din̈iny zanakanay telo lahy foeky lera hizahavanay izio. Ndraikindraiky aby iro mivolan̈a aminay fa sitrany mizaha Tele JW Satelity fo zen̈y.” Karaha ty koa ho Rose, a Nizeria an̈y: “Zaho izioty ravoravo mare fotony fa tsy mizaha vaovao matetiky eky fa mizaha Tele JW Satelity fo. Zaho koa baka mahita vaovao ratsy aby io, zaho mora mahinihiny oe, ke manonga tansionaka. Tsy karaha zen̈y ndraiky programony Tele JW fa mankahery mare ndreky mampakalma oe. Io kanaly ten̈a tiako. Izio ten̈a hatsaran̈a baka amy Jehovah ankitin̈y.”

 Nisy piandraikitry faritry araiky a Mozambiky an̈y nan̈ano tatitry fa amy Tran̈o Fivorian̈a amy faritry tsidihiny zen̈y nasian̈a fitaovan̈a mampandeha tele satelity. Iro rahalahy ndreky ranabavy aby io efa avy lera araiky na mandilatra alohany hanombohany fivorian̈a, mizaha Tele JW satelity.

 Tamy fivoriambe iraisampirenena ta Johannesbourg, tan Afriky Atsimo taminy 2019, efa satelity io edy nandifasan̈a kabaro sasany tamy tany sivy, an̈atinizen̈y kabarony rahalahy an̈isany Filankevipitantan̈ana. Karaha ty ho Sphumelele, amy Sampandraharaha Antoeran̈a Man̈aparitaka Feo Ndreky Video amy sampan̈any Afriky Atsimo: “Taloha tan̈y, tsy maintsy nalefanay taminy alalany Internet kabaro karaha in̈y. Fa tsy nety izikoa tsy Internet matanjaka tsarabe, izy amy zen̈y mbala nivangain̈a koa. Fa Tele JW Satelity ndraiky tsy karaha zen̈y. Azo lazain̈a mora vidiny sady raha io koa mandeha tsarabe.”

 Mersy anaro amy fan̈amezan̈a ataonaro aminy asa erantany, fotony maro izioty iro rahalahy ndreky ranabavintsika an Afriky nanjary afaka mahita Tele JW aminy alalany satelity. Mankasitraka mare fan̈amezan̈a ataonaro amy fomba isankarazany amy donate.pr418.com.