Jehovah tia mampianatra vahoakanany. Zen̈y mahavy fandaminan̈anany nandamin̈y sekoly maromaro natao hampiofan̈ana mpianatra, baka irô hahavita tsara andraikitrindrô. An̈isany sekoly aby zen̈y ziôty Sekolin’ny Mpitory Ilay Fanjakana (SMIF). Tato ato, tsy raha ianaran̈a fo ifantohan’ny fandaminan̈an’ny Zan̈ahary fa firaka amy fankatsaran̈a tran̈o han̈anaovan̈a sekoly koa. Tanjon̈o, amy zen̈y ho moramora amy mpampianatra ndreky mpianatra hifantoko amy fianaran̈a. Amy karakory fan̈amezan̈a ataonao man̈ampy atsika hanatakatra tanjon̈o zen̈y?

 Tan̈atin’ny taon̈o maro, tamy Tran̈o Fivorian̈a ndreky Tran̈o Fan̈anaovan̈a Fivoriambe fo nan̈anaovan̈a sekoly ara-baiboly. Fa nan̈ino fo basy atsika tato ato nan̈orin̈y na nan̈avao tran̈o maromaro baka ampiasaintsika han̈anaovan̈a sekoly ara-baiboly? Ty misy antony telo.

 Mahaimaro fo olo ilain̈y. Nivolan̈a karaha ty Christopher Mavor, Mpan̈ampy amy Komitin’ny Fanompoan̈a amy Filan-kevi-pitantan̈ana: “Birôn’ny sampan̈a nivolan̈a taminay fa mahaimaro fo rahalahy ndreky ranabavy ilain̈y hikarakara asa amy faritany. Ohatra, tamy 2019, sampan̈an’i Brezily nivolan̈a fa irô mila mpianatra SMIF kadiriny 7 600 fan̈ampiny hikarakara asa amy faritanin’ny sampan̈a misy irô.” Sampan̈an’i Etazonỳ koa nan̈ano tatitry fa nahainaro fo mpisava lalan̈a zadraharaha ilain̈y, fôtony irô afaka mampiofan̈a olo hafa amin’ny ezaka manokan̈a hitorian̈a amy tany maro olo, amy paoro, ndreky amy prizon. Ten̈a ilain̈y koa rahalahy maro han̈ampy amy Sampan-draharahan’ny Fan̈oren̈ana An-toeran̈a ndreky Komity Mifandray amy Lôpitaly. Ke irô mpianatra nahavita SMIF mahavita man̈ano raha aby zen̈y.

 Maro mpianatra mandefa fangatahan̈a. Naro fangatahan̈a nazon’ny sampan̈a maro baka tamy mpianatra mahafeno fepetra han̈ano sekoly io. Tan̈atin’ny taon̈o araiky fo ohatra, 2 500 fangatahan̈an’olo man̈iry han̈ano SMIF nazon’ny sampan̈an’i Brezily. Kanefa mpianatra 950 fo afaka alain’ny sampan̈a fotony tsy ampy toeran̈a han̈anaovan̈a sekoly.

 Toeran̈a mety tsarabe. Izikoa amy Tran̈o Fivorian̈a na amy Tran̈o Fan̈anovan̈a Fivoriambe an̈anaovan̈a sekoly, matetiky mpianatra aby io mipetraka amy rahalahy ndreky ranabavy marikitry iô. Raha zen̈y tsy man̈ino izikoa amy tany tsy matetiky misy sekoly. Fa izikoa sekoly aby io misesisesy, mety ho sarotro amindrô rahalahy ndreky ranabavy handray mpianatra aby io hivahiny an-tran̈ondrô an̈atiny fanjava maromaro, isaka taon̈o. Zen̈y mahavy atsika niasa tran̈o mety tsarabe amy mpianatra, marikitry toeran̈a fianaran̈a.

 Mety mandeha milion de dôlara maromaro depansy koa fa miasa tran̈o fianaran̈a araiky misy tran̈ony mpampianatra ndreky mpianatra kadiriny 30, aviô misy birô an̈anaovan̈a asa ikarakaran̈a raha ilainy mpianatra ndreky mpampianatra. Vidin’izio miovaova arakaraka raha misy an-toeran̈a iô.

 Matetiky tran̈o fan̈anaovan̈a sekoly aorin̈y amy toeran̈a mangin̈y miala tabataban’ny tanambe, kanefa tsy lavitry tany azahoan̈a bisy na taxi na raha miramiran̈a amin’zen̈y. Tsy zen̈y fo, izikoa posibla izio atao amy tany maro mpitory afaka han̈ano sekoly io ndreky misy mpiara-manompo afaka man̈ampy amy fikarakaran̈a raha ao ndreky amy fikobabian̈a tran̈o io ndreky fitaovan̈a ao.

 Tran̈o fan̈anaovan̈a sekoly io misy tany famakian̈a boky ndreky lekaoly, misy ordinatera ndreky masìny fan̈anaovan̈a printy aviô fitaovan̈a hafa ilain̈y. Misy tany fihinanan̈a malalaka koa izio matetiky, ke miaraka mihina ao mpianatra ndreky mpampianatra. Efa misy tany fan̈anaovan̈a spaoro ndreky fangalan̈a diandian̈a koa amin’izio ao.

 Nidinihin̈y tsarabe plan’ny tany fianaran̈a amin’izio. Troy miasa amy Sampandraharaha Miandraikitry Fan̈oren̈ana Erantany a Warwick, New York. Ho izy: “Zahay koa fa an̈ano plan’ny efitry fianaran̈a amy tran̈o fan̈anaovan̈a sekoly, zahay nangataka soso-kevitry tamy Sampandraharahan’ny Sekoly baka irô han̈ampy zahay hahita hevitry hahavy mpianatra aby io hifantoko tsarabe. Irô rahalahy aby io baka tiô nan̈amia tari-dalan̈a zahay momba forman’ny efitry fianaran̈a io ndreky habezany, hazavan̈a an̈atin’izio, aviô fitaovan̈a ilain̈y amy feo ndreky video.” Zoltán an̈isany mpampianatra amy SMIF a Hongrie. Karaha ty nambarany momba fitaovan̈a ilain̈y amy feo ndreky video: “Tamy voanalohany, zahay tsisy mikrô, ke mpianatra aby io tsy maintsy nampahatsiarôvinay matetiky mba hivolan̈a mare. Fa zioty zahay efa tsy man̈ano zen̈y eky fôtony isaka latabatran’ny mpianatra misy mikrô!”

 Izikoa fa natsarain̈y tran̈o fan̈anaovan̈a sekoly aby io, ino vokany tamy mpianatra ndreky mpampianatra? Ho Angela, nan̈ano SMIF ta Palm Coast, Florida, U.S.A: “Nilamin̈y mare tao. Tsy raha nataotao fo tran̈o fianaran̈a io fa voadiniky tsarabe plan’izo, an̈isan’izen̈y lekaolinay, sambranay ke zahay afaka nifantoko tamy fianaran̈a tsarabe.” Csaba ndraiky an̈isany mpampianatran’ny SMIF a Hongrie. An̈isany raha tiany iziô miaraka mihina amy mpianatra aby io. Amy leran’io, ho izy, matetiky irô mpianatra aby io mitantara raha momba irô ndreky raha niain̈andrô, ke zahay lôso mahaimahay irô. Vokany, lôso tsy sarotro aminay mampifan̈araka drafitrin’ny fampianaran̈a amy raha ilaindrô.”

 Na mpianatra na mpampianatra samby mahatsapa fa fankatsaran̈a tran̈o fan̈anaovan̈a sekoly io ten̈a fitahian̈a baka amy Jehovah, ‘Mpampianatra Be Voninahitry.’ (Isaia 30:20, 21) Nisy ranabavy araiky a Philippines nan̈ano SMIF tamy tran̈o araiky navaozin̈y ke natao tran̈o fan̈anaovan̈a sekoly. Ho izy: “Tsara mare tran̈o fan̈anaovan̈a sekoly io ke tsapako fa zaho tsy zisty mpianatra fo fa vahiny nikahian’ny Jehovah manokan̈a foeky! Hitako tsarabe fa atsika tiany hahazo sirony fandalin̈ana Volan̈anany.”

 Atsika mahavita man̈ôrin̈y, man̈avao ndreky mikobaby tran̈o fan̈anaovan̈a sekoly fôtony anarô mazoto man̈ano fan̈amezan̈a. Ankamarozanarô nan̈ano zen̈y baka amy donate.pr418.com. Anarô ten̈a mahatariky, ke zahay mankasitraka anarô amy fô jiaby.