Tiany Jehovah hianatra raha momba izy ndreky raha hataony Fanjakan̈anany andan̈itry an̈y karazan̈olo jiaby, na karakory na karakory raha iain̈any. (1 Timoty 2:3, 4) Zen̈y mahavy Vavolombelon̈o Jehovah man̈aboaka Baiboly ndreky fitaovan̈a fianaran̈a Baiboly han̈ampian̈a olo farany maro, an̈isanizen̈y iro olo maren̈iny aby io. Tsy zen̈y fo fa, fandaminan̈a koa efa nan̈aboaka boky nadika amy video teniny tan̈ana, amy volan̈a mandilatra 100 aby. a Akory nan̈aovan̈a zen̈y? Avio ino aby raha tsy maintsy nankatsarain̈a tan̈atiny taon̈o maro zay, baka atsika mahavita man̈aboaka ndreky mizara iro io aminolo maren̈iny?

 Efa misy pandika teny erantany mandika boky ndreky gazety amy teniny tan̈ana. Ekipy tsiaraikiaraiky mandiniky tsarabe raha handeha hadika io, avio iro manapakevitry akory fomba ten̈a tsara mety handikan̈a izio amy teniny tan̈ana. Koa fa vita zen̈y, alaindro video amy zay raha adika io. Amy zioty, misy ekipy 60 mandika tsy tapaka iro fitaovan̈a fianaran̈a Baiboly aby io amy teniny tan̈ana, fa misy ekipy 40 hafa ndraiky mandika izio ndraikindraiky.

 Taloha, tsy moramora nan̈aboaka video amy teniny tan̈ana fa lafo mare raha mifototro izio, an̈atinizen̈y kamera, fa tsy karaha amy zioty. Amy studio namboarintsika fo tsy maintsy nangalan̈a video io, fa ndraikindraiky amy tran̈o efa tiô fo fa navaozintsika koa natao studio. Izikoa atao konty, mandilatra 30 000  bdolara na 122 580 000 ariary vola lany amy fitaovan̈a jiaby iasany pandika teniny tan̈ana.

 Akory hampiasan̈a amy fomba tsara iro vola fan̈amezan̈a ataontsika aby io? Fandaminan̈antsika nitady fomba hankatsaran̈a ndreky hampamoramora fomba fandikanteny. Ke nanapakevitry iro hampiasa fitaovan̈a moderny kanefa tsy lafo. Tsy voatery an̈atiny studio eky iro ekipiny pandika teniny tan̈ana aby io miasa, fa iro afaka manangana riba mahitso amy birô iasandro ao, ke ao fo iro mangala video. Izikoa rahalahy ndreky ranabavy maromaro alain̈a feo, iro tsy voatery miditry studio fa samby afaka mangala videony anjarandro amy birôndro na antran̈ondro ao fo.

 Atsika koa namoron̈o programo man̈ampy pandika teny aby io aminy asandro, ke nihen̈y antsasany fotoan̈a ilain̈a han̈aboahan̈a boky na raha hafa amy teniny tan̈ana. Iro piaramanompo amintsika aby io ten̈a mankasitraka fisiany fankatsaran̈a aby io. Karaha ty ho Rahalahy Alexander: “Nanjary miboaka matetiky video amy teniny tan̈ana. Ravoravo mare zaho. Isanandra zaho mizaha video aby io fo.”

 Karaha zen̈y koa amy resaka vola. Efa tsy ampy 5 000 dolara (kadiriny 21 000 000 ariary) koa vola ilain̈a hivangan̈a fitaovan̈a ilainy ekipy pandika teny araiky izioty. Ke nanjary afaka nan̈aboaka video amy teniny tan̈ana marobe atsika.

 Izikoa fa vita fangalan̈a video boky na gazety na raha hafa, tsy maintsy atao amy zay fomba hazahoanolo lian̈a izio. Karaha ataony taloha, iro io natao tamy kasety video na DVD. Kanefa raha zen̈y tsy vita mora sady nandany fotoan̈a ndreky volabe. Sady raha io koa fa vita, tsy maintsy nalefa tamy sosiete araiky hatao kopỳ. Lera izy vita kasety video ndreky DVD zay vo nalefa tamy fiangonan̈a. Mandilatra 2 000 000 dolara (kadiriny 8 400 000 000 ariary) vola lanintsika tamy fan̈aboahan̈a DVD tamy teniny tan̈ana, tamy 2013.

 Ravoravo mare iro olo maren̈iny aby io nahazo DVD ndreky kasety video. Fa ndraikindraiky tsy nora nampiasa iro io, intsaka eky izikoa fa nahainaro iro io. Tsy maintsy DVD maromaro iziô nilain̈a, zay vo tandry boky araiky amy Baiboly. Karaha ty nambarany rahalahy araiky mipetraka a Brezily an̈y, Gilnei an̈arany: “Izikoa fa nisy toko ndreky andininy tianay vakin̈a, tsy maintsy nitadiavinay antsendriky kasety video nisy izy, baka io nizahavanay aia amy kasety io nisy andininy io. Somary nanahiran̈a zahay mare raha zen̈y!” Nisy ranabavy araiky koa, Rafayane an̈arany, nampiasa DVD amy teniny tan̈ana. Karaha ty nambarany: “Tamy leranizen̈y, tsy nora taminany nan̈ano fianaran̈a manokan̈a. Elabe anao vo mahita toko ndreky andininy avio loharanonkevitry!” Akory fo basy nataondro rahalahy ndreky ranabavy aby io izikoa iro fa nitory? Matetiky iro nitondra DVD na kasety video, ke iro koa fa tojy olo lian̈a, nalefandro tamy fitaovan̈anolo io izio. Piaramanompo sasany ndraiky nitondra fitaovan̈anany manokan̈a handifasan̈a DVD io. Kanefa tsy ela tafaranizen̈y, nanjary nisy fitaovan̈a fandifasan̈a DVD portabla, ke naro pitory nampiasa izio handifasan̈a iro video aby io. Karaha ty nambarany Bobby, rahalahy araiky a Etazonỳ: “Zaho koa fa baka nan̈aboaka andininteny araiky taminolo, ke mbala tihan̈aboaka andininy hafa, matetiky zaho tsy maintsy nitsakaraka DVD hafa koa. Nandany lera mare raha zen̈y, ke tsy dia afaka nampiasa Baiboly loatra pitory.”

 Tamy 2013, fandaminan̈any Jehovah nan̈aboaka programo JW Library Sign Language. Izio programo mahavita mangala ndreky mandefa video teniny tan̈ana amy telefony na amy tabletindro rahalahy ndreky ranabavy aby manan̈a izio. Natao niny Teniny Tan̈ana Amerikain nan̈aboahan̈a programo io tamy voanalohany. Fa navaozin̈y izio tamy 2017, ke nanjary mety amy teniny tan̈ana jiaby erantany. Ravoravo mare rahalahy ndreky ranabavy erantany nahazo izio! Karaha ty nambarany Juscelino, rahalahy araiky a Brezily an̈y: “Mira vandy ay! Nanjary loso diniky karaha ty fo zaho, mba tiany filankevipitantan̈ana mare zahay maren̈iny ty ay! Sady ten̈a tiandro handroso karaha iro olo maharen̈y aby io koa zahay. Ravoravo mare zaho programo io koa fa niboaka! Mahaimazoto mianatra Baiboly fo zaho iziô.”

 Aboaka aminy endriky elektroniky aby zioty video jiaby amy teniny tan̈ana, ke mety alain̈a amy jw.org ndreky amy programo JW Library Sign Language. Safe nanjary efa andra vitsivitsy fo fotoan̈a ilain̈a handikan̈a ndreky hangalan̈a video, baka io handrasan̈a boky amy teniny tan̈ana, fa tsy mahadin̈y fanjava na taon̈o karaha taloha in̈y eky. Ndray izy aby maro video teniny tan̈ana miaraka miboaka amy bokinolo maharen̈y aby io.

 Zahava hely baka raha nivolan̈iny sasany amy rahalahy ndreky ranabavintsika maren̈iny aby io momba zen̈y. Karaha ty ho Ranabavy Klízia: “Aia koa ma anao hahita fandaminan̈a hafa mba mijery olo maren̈iny karaha nintsika ty? Sady izy amy zen̈y von̈ono han̈amia olo maren̈iny hanin̈y arapan̈ahy mora azo! Izikoa mbala fandaminan̈a fo, tsisy mahavita ambakany vitany fandaminan̈any Jehovah aminolo maren̈iny! Tsisy foeky.” Karaha ty koa ho Vladimir: “Hitako baka amindro video aby natao ninolo maren̈iny aby io fa Jehovah mijery zahay ankitin̈y, karaha ataony aminolo maharen̈y aby io fo koa.”

 Matetiky video amy teniny tan̈ana aby io ahitan̈a filazan̈a karaha ty: “Navoaka ity boky ity mba hampianarana Baiboly maneran-tany, ary tohanana amin’ny alalan’ny fanomezana an-tsitrapo.” Ankasitrahinay mare fan̈amezan̈a jiaby ataonaro, ary maro amizio ataonaro baka amy donate.pr418.com. Iro vola aby in̈y ahavitanay man̈aboaka Baiboly ndreky boky fianaran̈a Baiboly natao ninolo jiaby erantany, an̈isanizen̈y olo mampiasa teniny tan̈ana.