Vavolombelon̈o Jehovah ten̈a tia piaramanompo amindro. (1 Petera 2:17) Ankamarozantsika mitovy hevitry amy Tannis, ranabavy araiky baka a Kenya. Karaha ty nambarany: “Erantany misy anadahiko ndreky rahavaviko, ke tiako ho hay mare raha mahazo iro.” Miezaka Tannis ndreky Vavolombelon̈o antapitrisany baka tsy ho tapaka vaovao azondro momba piaramanompo amindro. Akory hangalantsika tahaka iro? Tsy sarotro amintsika man̈ano zen̈y amy zioty fotony rango 2013, efa misy fizaran̈a mitondra titra “Vaovao” amy tranonkalantsika jw.org ao.

 Tatitry azo antoko ndreky atokisan̈a momba Vavolombelon̈o Jehovah hita amy Vaovao JW ao, avio ao misy fotokeivtry isankarazany, ohatra momba fan̈aboahan̈a Baiboly, fan̈ampian̈a iro amy tany nandalovany antambo, tetikasa fan̈oren̈ana, na raha hafa miavaka nandalo. An̈isany raha avoakoran̈a ao koa vaovao momba iro namantsika gadrain̈a baka amy raha inoandro. Fan̈ampinizen̈y koa, misy tantara mankahery koa amy Vaovao JW ao momba ezaka manokan̈a ndreky Fahatsiarovan̈a. Azovy aby iro mitsakaraka lahatsoratra aby io, avio akory an̈oman̈ana iro io?

 Birôny Filazambaovao Erantany (BFE) mikarakara Vaovao JW. Amy foibe an̈y misy sampandraharaha io, avio iro amy Komitiny Pandrindra an̈ivony Filankevipitantan̈ana miandraikitry izio. Rahalahy ndreky ranabavy mandilatra 100 miasa amy BFE io. Fa ankamarozandro io piasa antsitrapo miasa baka antran̈o, ke misy amindro io panoratra, pan̈ano fikarohan̈a, pan̈amboatra sary, avio pandika teny. Sasany ndraiky mifandray amy manampahifan̈a, papianatra, pikaroko aminy Iniversite, avio pan̈ano gazety. Birôny Filazambaovao (BFB) mandilatra 80 amy sampan̈a erantany man̈ampy iro amy BFE io.

 Miaraka miasa marikitry iro amy BFB ndreky BFE, lera man̈oman̈a vaovao. Lera iro rahalahintsika aby io mahita fitantaran̈a tsara mety aboaka, iro man̈ano fikarohan̈a antsendriky momba izio, baka io avorindro fan̈azavan̈a azo antoko azondro. Misy fotoan̈a iro man̈adikadin̈y manampahizan̈a mahay raha momba izio. Izikoa fa voavorindro fan̈azavan̈a jiaby, soratindro, avio ahitsy, hamarin̈iny, asian̈a sary, avio alefa amy Komitiny Pandrindra, fotony komity io zaraiky fo afaka man̈amia lalan̈a izikoa mety haboaka fan̈azavan̈a io na tsy mety.

 Ino raha tsapandro piaramanompo amintsika aby io momba Vaovao JW io? Karaha ty nambarany ranabavy araiky baka a Philippines, Cheryl an̈arany: “Miaraka andra vo kiaka, farandraha tiako eky mamaky vaovao momba fandaminan̈a ndreky vahoakany Jehovah.”

 Maro koa olo mivolan̈a fa tsy mitovy foeky vaovao hitandro amy Vaovao JW ndreky filazambaovao hafa. Karaha ty ho Tatiana, baka a Kazakhstan: “Ny raha mamparavoravo zaho koa fa mizaha vaovao amy jw.org ao, azo antoko izio avio mivolan̈a raha ten̈a nisy ankitin̈y.” Karaha ty koa nambarany Alma, ranabavy araiky baka a Meksiky: “Ten̈a mankahery Vaovao JW, fotony vaovao hitanao ao tsy mampijaly jery karaha ataondro vaovao aboakany pan̈ano vaovao mahazatra aby io.”

 Vaovao JW tsy basiny azo antoko, fa mankafatatra finoan̈a koa. Ho Bernard, baka a Kenya: “Zaho koa fa mamaky Vaovao JW, efa mira fianakavian̈anaka fo fahitako iro rahalahy ndreky ranabavy erantany aby io, na aia na aia tany misy iro. Lera zaho mivavaka, zaho mahavita manon̈ono an̈arandro ndreky raha mahazo iro.” Karaha ty koa nambarany Bybron, ranabavy araiky baka a Kenya: “Haravoan̈a ma ninaka isaka zaho mamaky lahatsoratra momba Baiboly naboaka amy volan̈a hafa! Mampatsiaro zaho lahatsoratra aby io fa Jehovah tsy man̈avakavaka.”

 Mety hankahery atsika ndray iro vaovao momba iro rahalahintsika injehin̈y aby io. Karaha ty nambarany Jackline, baka Kenya: “Matetiky zaho misaintsain̈y momba korazindro piaramanompo aby io, ke ten̈a mankahery zaho raha zen̈y. Ke mifen̈y fo zaho mizaha ino raha man̈ampy iro hiaritry. Hitako fa na raha ‘tsotra’ hely efa ten̈a man̈amia angovo iro, karaha ataony vavaka, famakian̈a Baiboly, avio hira.”

 Akory fo iro vaovao momba antambo aby io ke? Karaha ty nambarany Beatriz, ranabavy araiky baka a Costa Rica: “Amy Vaovao JW ao ahitako fomba han̈ampiany fandaminan̈antsika iro piaramanompo. Izikoa fa misy tany andalovany antambo, tsy mirekireky foeky iro man̈ampy, sady amy zen̈y ampitiavan̈a an̈anaovandro zen̈y. Resy lahatra zaho fa ten̈a fandaminan̈any Jehovah misy atsika ty.”

 Ravoravo atsika izikoa fa mahazo vaovao farany momba iro rahalahintsika erantany aby io! Tsy honohono ho nisy raha aby zen̈y izikoa tsy tiô fan̈amezan̈a antsitrapô ataonaro momba asa fitorian̈a erantany. Maro aminaro man̈ano zen̈y amy donate.pr418.com. Ke ten̈a mankasitraka anaro zahay fotony anaro ten̈a mazoto man̈ano fan̈amezan̈a.