Karaha ty tatitry nataon’ny Firenena Mikamban̈a:

•   Nanomboko tamy 7 Oktobra firaka tamin’ny 23 Oktobra 2023, ady ataon’ny Gaza ndreky Israel nahafaty olo mandeha 6 400 aviô 15 200 maratra, ankamarozandrô io sivily aby. Sôsoko zen̈y, mandeha zato arivo mahery olo tsy maintsy nilefa.

•   Tamy 24 Septambra 2023, nahataka 9 701 sivily naty aviô 17 748 olo naratra ta Ukraine, vokatran’ny adin’ny Russie ndreky Ukraine.

 Ino raha tsara ampan̈antinain’ny Baiboly olo mijaly vokatran’ny ady?

 Baiboly efa nivolan̈a fa Zan̈ahary han̈ano raha “tsy hisian’ny ady eky eran-tany.” (Salamo 46:9) Hadosony fitondram-panjakan̈an’olombelon̈o jiaby ke hisoloany fanjakan̈a ndreky fitondrasan̈a araiky an-dan̈itry an̈y. (Daniela 2:44) Fanjakan̈an’ny Zan̈ahary io han̈adoso raha jiaby mampijaly olombelon̈o.

 Zahava baka raha handeha hataon’i Jesosy Kristy, Mpanjakan’ny Fanjakan̈an’ny Zan̈ahary io:

•   “Hamonjy olo masikiny mangataka vonjy aminany izy, ndreky hamonjy irô olo ambanin̈a, aviô lan̈ian’olo jiaby tsisy mpan̈ampy. Hahinakinaka olo ambany ndreky olo masikiny izy, baka iô hamonjy ain̈indrô. Izy han̈avotro irô amy raha mampijaly irô ndreky han̈avotro irô amin’olo kafiry irô.”​—Salamo 72:12-14.

 Zan̈ahary hampiasa Fanjakan̈anany han̈adoso tanteraka jaly ndreky alahelo vokatran’ny ady ndreky kafiry.

•   “Izy hamafa ranomaso jiaby amy masondrô, fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy, fôtony zen̈y efa kabaro taloha.”​—Apokalypsy 21:4.

 Tsy ho ela Fanjakan̈an’ny Zan̈ahary han̈aova tanteraka fiain̈ana ambony tany. Baiboly efa nivolan̈a fa “hisy lagera amy tany isan-karazany.” (Matio 24:6) Efa zen̈y edy raha hitantsika amy ziôty. Raha aby zen̈y ndreky raha hafa koa man̈aboaka tsarabe fa atsika efa miain̈y an̈atin’ny “andra farany” amy fitondrasan̈an’olombelon̈o.​—2 Timoty 3:1.