Vo miditry amy taon̈o 2023 atsika izioty, ke man̈anten̈a atsika fa ho tsara amintsika ndreky amy fianakavian̈antsika taon̈o ty. Nan̈ino ma atsika afaka man̈anten̈a zen̈y?

 An̈isany vaovao tsara koran̈iny Baiboly ao, mielan̈a fo problemo mahazo atsika izioty io, avio izio efa tsy ela ho afaka. Baiboly io “nisoratin̈y baka hampianaran̈a atsika. Amy zen̈y atsika hanan̈a fan̈antinan̈a, sady izio koa man̈amia fankahirezan̈a atsika.”​—Romanina 15:4.

•   Izikoa tianao hahay raha maro momba fampan̈antinan̈a amy Baiboly io, vakia lahatsoratra “Mbola Hihatsara ve ny Fiainana Amin’ny hoavy?”

 Fan̈antinan̈a amy Baiboly io mira “vatofantsikiny ain̈intsika.” (Hebreo 6:19) Izio mahavy atsika tsy ho kivy mare. Izio man̈ampy atsika hahavita hiatriky problemo mahazo atsika, mahavy atsika hizaha lafy tsarandraha fo, avio man̈ampy atsika hahazo hasambaran̈a mandrakizay. Ohatra:

•   Zahava akory nataony fan̈antinan̈a amy Baiboly ao nan̈ampy lelahy araiky efa navy nihina jamala mare taloha. Zahava amy video Tsy Tiako Foeky Fiain̈ananaka Taloha raha zen̈y.

•   Zahava akory ataony fan̈antinan̈a amy Baiboly io man̈ampy atsika, izikoa atsika naty havan̈a. Zahava video Fankahirezan̈a Olo Naty Havan̈a.

 Maro olo man̈anten̈a fa ho hisy ankitin̈y raha tsara, fa iro fo tsy ten̈a matoky fisianizio. Tsy karaha zen̈y raha ampan̈antinainy Baiboly. Fotony nan̈ino? Fotony raha ampan̈antinainy Baiboly io baka amy Jehovah, Zan̈ahary a “tsy mahay mavandy.” (Titosy 1:2) Jehovah zaraiky fo manan̈a angovo han̈atantirahany fikasan̈anany jiaby. Izy mahavita man̈ano “raha jiaby tiany hatao.”​—Salamo 135:5, 6.

 Mba tianay koa anao hahazo hatsaran̈a baka amy raha aby ampan̈antinainy Baiboly. Hatoky raha koran̈inizio anao, izikoa ‘mandiniky tsarabe Soratra Masin̈y.’ (Asan’ny Apostoly 17:11) Mba man̈ohara hely baka mianatra Baiboly aminay. Tsy man̈efa mianatra izio. Diany mbala amy fanombohany taon̈o 2023 ty, efa hanan̈a fan̈antinan̈a tsara edy anao, koa mianatra Baiboly!