Ino Raha Koran̈in’ny Baiboly Momba Tsy Fahampian’ny Rano Madio Eran-Tany?
Rano madio raha ten̈a ilaintsika baka ho velon̈o. Fa António Guterres, sekretera zeneralin’ny Firenena Mikamban̈a nampitandrin̈y fa “eran-tany, mahaimaro fo olo mila rano ke hiafaran’izio tsy ho ampy atsika teteky iô.” Amy ziôty, efa mandeha andrivon’ny tapitrisa olo tsy afaka mahazo rano madio eran-tany.
Strdel/AFP via Getty Images
Mbala hahazo rano mahampy edy atsika jiaby andra araiky an̈y? Sa izio efa tsy ho ampy karaha ty fo? Ino raha koran̈in’ny Baiboly?
Raha ampan̈antinain’ny Baiboly momba rano
Baiboly mivolan̈a fa andra araiky an̈y tsy ho hisy tany tsy ampy rano. Ho feno rano madio ambony tany.
‘Hisy rano hiboiboiky amy tany paiky, aviô hisy rano amy lemaka paiky. Hanjary matsabory anirian’ny bararata tany tsy anirian-draha. Baka iô tany paiky hanjary loharano.’—Isaia 35:6, 7.
Nan̈ino ma atsika afaka matoky fampan̈antinan̈an’ny Baiboly zen̈y? Diniha baka raha koran̈in’ny Baiboly mikasiky fomba niasan̈a tany ty.
Raha koran̈in’ny Baiboly momba tany ndreky tsingerin’ny rano
‘Tsy raha tsisy antony niasan’ny [Zan̈ahary] [tany] fa nataony hipitrahan’olo.’—Isaia 45:18.
Handeha hipitrahan’olo niasan’ny Zan̈ahary tany ty, ke efa nasiany fomba voajan̈ahary mampisy rano madio ampy tsarabe.
‘Ampanongain’ny [Zan̈ahary] pitiky rano aby io ke lôso zavon̈o aviô manjary mahalen̈y. Izio baka iô ararakan’ny rondro, ke latsaka amin’olombelon̈o.’—Joba 36:27, 28.
Izikoa tsorin̈y, andininy io mikoran̈a fomba voajan̈ahary sady azo antoko nataon’ny Zan̈ahary baka hampisy rano madio fo. Pitiky rano baka amy ranomasin̈y ndreky vontro baka amy tany manjary zavon̈o ke manjary mahalen̈y. Baka amin’izio hisian’ny rano madio ampiasain’ny olombelon̈o ndreky biby.—Mpitoriteny 1:7; Amosa 5:8.
‘Anarô hamiako mahalen̈y amy fotoan̈any, ke hahavokatra tany baka iô hamoa kakazo am-bilo.’—Levitikosy 26:4.
Mpamboly ankamarozan’Israelita taloha tan̈y. Zan̈ahary nampan̈anten̈a hitahy irô ke han̈amia rano tsy tapaka baka irô hahazo vokatra be. Hainy baka fa tsy hitombo vokatra izikoa tsy ampy mahalen̈y na tsy avy amy fotoan̈any.
Raha nataon’ny Zan̈ahary tamindrô Israelita aby io mbala handeha hataony ambony tany eto tsy ho ela. (Isaia 30:23) Fa parapavian’izen̈y, mahay tsy ampy fo rano amy toeran̈a maro eran-tany. Firaka amy mahalen̈y tsy ampy. Ino koa raha koran̈in’ny Baiboly momba vahaolan̈a amy tsy fahampian’ny rano?
Hifaran̈a prôblemon’ny tsy fahampian’ny rano
Baiboly man̈ambara fa Zan̈ahary hampiasa Fanjakan̈anany hampilamin̈y prôblemon’ny tanintsika ty, an̈isan’izen̈y tsy fahampian’ny rano. (Matio 6:9, 10) Fanjakan̈an’ny Zan̈ahary io fitondram-panjakan̈a araiky an-dan̈itry an̈y. Izio handeha hitondra tany ty. (Daniela 2:44; Apokalypsy 11:15) Fa tsy zen̈y fo, Fanjakan̈an’ny Zan̈ahary handeha han̈ano raha tsy ho vitan’ny fitondrasan̈an’olombelon̈o. Izio han̈afoan̈a fôtotro prôblemo mahavy tsy fahampian’ny rano.
Prôblemo: Efa miova mare toetrandra amy ziôty ke lôso tsy miasa tsara tsingerin’ny rano. Zen̈y mahavy tany paiky mare, na koa misy tany dobon-drano azon’ny mahalen̈y be loatra na fanongan’ny ranomasin̈y.
Vahaolan̈a: Fanjakan̈an’ny Zan̈ahary han̈ampody toetrandra amy plasiny baka tanintsika mimpody karaha taloha. Zan̈ahary nampan̈anten̈a karaha ty: “Ivoako vao raha jiaby.” (Apokalypsy 21:5) Tany paiky ho feno rano madio, ke hanjary hanirian-draha firaka amy tany tsy mety ipitrahan̈a amy ziôty. (Isaia 41:17-20) Jesosy Kristy hitondra Fanjakan̈an’ny Zan̈ahary io. Izy hifehy angôvon’ny natiora.
Tamy Jesosy tambony tany, izy nahavita nampijanon̈o tsiko be miaro mahalen̈y. Zen̈y fomba nan̈aboahany fa izy namian’ny Zan̈ahary angôvo. (Marka 4:39, 41) Lera Kristy Mpanjakan’ny Fanjakan̈an’ny Zan̈ahary io hitondra tany, tsy ho hisy eky antambo. Olo hiadan̈a ndreky ho voaro tsarabe salakady tsy havozo antambo eky.
Prôblemo: Irô olo tsy mandiniky vokatran’ny raha ataondrô ndreky irô orinasa tia vola aby io mandoto ten̈arano, matsabory, firaka amy rano madio ambany tany an̈y. Ke vokany, lôso tsy ampy rano madio.
Vahaolan̈a: Zan̈ahary han̈adio tany ty ndreky ten̈arano, matsabory, ndreky ranomasin̈y. Ke tany hanjary paradisa. Tsara mare fomba ivolan̈an’ny Baiboly izio: “Ho ravoravo tany dezera ndreky tany paiky. Ho ravoravo koa lemaka paiky sady hamolera karaha safrona.”—Isaia 35:1.
Ino raha miambin̈y irô olo tsy man̈isy fôtiny tontolo iain̈ana aby io? Zan̈ahary nampan̈anten̈a fa izy ‘handripaka lan̈ian’olo mandrobaka tany ty.’—Apokalypsy 11:18; Ohabolana 2:21, 22.
Prôblemo: Tsy aminany fomba ampiasan’olombelon̈o rano ambony tany. Safe beben’ny rano vokarin’ny tany ty rano lanindrô.
Vahaolan̈a: Fanjakan̈an’ny Zan̈ahary han̈atanteraka sitrapon’ny Zan̈ahary “ambony tany”, fa tsy sitrapon’olombelon̈o tia ten̈a aby io. (Matio 6:9, 10) Hahazo fampianaran̈a farany tsara vahoakan’ny Fanjakan̈an’ny Zan̈ahary. Isaia 11:9 mivolan̈a: “Ho feno fahaizan̈a ny marin̈y momba Jehovah tany ty.” a Baka amy fampianaran̈a farany tsara ho azon’olombelon̈o zen̈y aviô fitiavandrô Zan̈ahary ndreky zavaboarinany jiaby, hahavy irô hikarakara tsarabe tanintsika ty ndreky raha jiaby ao.
Izikoa anao tihahay raha maro mikasiky raha handeha hataon’ny Fanjakan̈an’ny Zan̈ahary, zahava lahatsoratra “Inona no Hataon’ny Fanjakan’Andriamanitra?”
Zahava amy Baiboly bokin’ny Isaia toko faha- 35, izikoa tianao hahay akôry hahavy tany ty hanjary paradisa.
Zahava video Ino ma Dikany Niasany Zan̈ahary Tany Ty? Izikoa anao tihahay tsarabe momba fikasan̈an’ny Zan̈ahary amy tany ndreky olombelon̈o.
a Jehovah io an̈aran̈an’ny Zan̈ahary. (Salamo 83:18) Zahava lahatsoratra “Azôvy ma Jehovah?”
Mety ho Tianao Koa
AZA VOLY MIAMBIN̈Y!
Hafanan̈a Mandombolombo Ndreky Toetany Paiky—Ino Raha Koran̈iny Baiboly Momba Zen̈y?
Mety ho voavaha ma problemo erantany io? Ino ma raha antin̈aintsika aminy hoavy?
FAMPIANARAN̈A FOTOTRO AMY BAIBOLY
Karakory ma Fanjakan̈any Zan̈ahary Zen̈y?
Tamy Jesosy tambony tany teto, raha momba Fanjakan̈any Zan̈ahary io raha ten̈a nampianariny. Rango efa ela, pianatranany mivavaka haviany Fanjakan̈a io.
FOTOKEVITRY ISANKARAZANY
Ino ma Raha Koran̈iny Baiboly Momba Fiovoany Toetrandra Ndreky ny Amaraintsika?
Izio ma Zan̈ahary niasa tany ty mba mijery tany ty ndreky mijery olombelon̈o?
RAHA MOMBA ZAHAY
Mangataka Vangian̈a
Miaraha mandiniky fan̈ontanian̈a amy Baiboly aminay, na mianara raha maromaro momba Vavolombelon̈o Jehovah.
