Mivolan̈a fikambanan̈a pamory vaovao Catholic News Service fa tan̈atiny lamesa araiky natao tamy Bazilikany Masindahy Piera tamy 25 Marsy 2022 in̈y, Papa François nitsangana man̈oloan̈a sariny Maria, “napiny masonany baka io nahondriny lohanany, avio izy nan̈ano vavaka mangin̈y.” Nivolan̈a koa fikambanan̈a io fa “nivavaka mare tamy Maria” izy baka ho hisy fiadan̈ana. Nan̈ano tatitry koa gazety Vatican News fa “nivavaka koa Papa baka donia ty hatokana amy Fô Madiony Maria, indraka eky La Russie ndreky Ukraine.”

 Akory hevitrinao? Mety ma mivavaka man̈oloan̈a sary na mampiasa sary masin̈y? Diniha hely iro andininy baka amy Baiboly aby ty:

•   “Aza man̈ano sary sokitry ninao, na sarindraha miramira raha amy lan̈itry an̈abo an̈y, na amy tany ambany atỳ, na raha an̈aty rano ambany tany an̈y. Aza mankohoko amindro io, na man̈eky ho voantsory hanompo iro, fotony zaho Jehovah Zan̈aharinao io Zan̈ahary mitaky hanompoanao zaho zaraiky fo.”​—Eksodosy 20:4, 5. a

•   “Volafotsy ndreky volamena sampindro, asany tan̈anolo. Misy vava iro fa tsy mivolan̈a. Misy maso iro fa tsy mahita. Misy sofin̈y iro fa tsy maharen̈y. Misy oron̈o iro fa tsy maharen̈y fôfon̈o. Misy tan̈ana iro fa tsy mahavita mitana. Misy vity iro fa tsy afaka mandeha. Baka io tendandro tsy mahaboaka feo. Ho mira zen̈y koa olo man̈amboatra iro ndreky matoky iro.”​—Salamo 115:4-8.

•   “Zaho Jehovah zen̈y! Efa zen̈y an̈aranaka. Ke voninahitrinaka tsy hamiako olo hafa, baka io dera tokony ninaka tsy hamiako sary sokitry.”​—Isaia 42:8, lamariky amy pazy ambany.

•   ‘Milifasa fanompoan̈a sampy anaro.’​—1 Korintianina 10:14.

•   “Mitandrema amy sampy.”​—1 Jaona 5:21.

 Izikoa tianao hahazo fan̈ampiny fan̈azavan̈a momba raha koran̈iny Baiboly momba fampiasan̈a sary, vakia lahatsoratra “Inona no Lazain’ny Baiboly? Sary”, na zahava video Ikeny Zan̈ahary ma Fampiasan̈a Sary Izikoa fa Mivavaka?

 Mety ho tianao koa hahay raha momba fotokevitry aby ty miorin̈y amy Baiboly:

•   “Inona no Lazain’ny Baiboly Momba An’i Maria Virjiny?”

•   “Tokony Hivavaka Amin’i Maria Virjiny ve Ianao?”

•   “Ahoana no Hampisy Fiadanana etỳ An-tany?”

Sary nazahoan̈a lalan̈a: Vincenzo Pinto/AFP via Getty Images