Vita tamy 20 Novambra 2022 tio fivorian̈any Firenena Jiaby Mitambatra na COP27, nandinihan̈a vahaolan̈a amy fivoavoany toetrandra. Maro firenena nan̈eky fa tsy mahavaha olan̈a fan̈amezan̈a vola fan̈ampian̈a tany sasany hiatrefan̈a fivoavoany toetrandra io, ndray zen̈y tapaka tamizio.

•   Karaha ty nivolan̈iny António Guterres, sekretera zeneraliny Firenena Mikamban̈a, tamy 19 Novambra 2022: “Ravoravo ndraiky zaho fa hamian̈a fan̈ampian̈a iro firenena jiaby mijaly baka amy fivoavoany toetrandra. Fa raha zen̈y tsy mahampy ... fotony izio tsy ten̈a mahavaha olan̈a io.”

•   “Mbala hanahiran̈a olo fo vokatrany fivoavoany toetrandra io teteky iô.”​—Mary Robinson, prezidany Irlandy taloha sady efa navy Vaomieran’ny Firenena Mikambana Miaro ny Zon’olombelona, 20 Novambra 2022.

 Iro tanora aby io koa mba miasaloha mare momba ny amarainy tanintsika ty. Fa mba ho vitany firenena aby io ma hampilamin̈y toetrandra? Ino raha koran̈iny Baiboly momba zen̈y?

 Baiboly mivolan̈a fa ndray mifen̈a karakory iro firenana aby io hamaha olan̈a momba fivoavoany toetrandra io, iro tsy ten̈a hahavaha olan̈a. Diniha baka antony aroe ty:

•   “Raha koa mibiloko fa tsy mety ampahitsin̈a eky.”​—Mpitoriteny 1:15.

   Ino ma dikanizen̈y?: Tsy ten̈a mahavita mamaha olan̈a fitondrasan̈anolombelon̈o, fotony olombelon̈o tsy natao hifampitondra. (Jeremia 10:23) Ke iro firenena aby io nata hitambatra, iro mbala tsy hahavaha olan̈a misy erantany fo, na mifen̈a karakory iro.

•   “Olo ho tia ten̈a, tia vola, ... tsy mety hifan̈arahan̈a.”​—2 Timoty 3:2, 3.

   Ino ma dikanizen̈y?: Rango efa ela Baiboly efa nivolan̈a fa maro olo ho tia ten̈a ndreky tsy ho tia miaraka miasa aminolo han̈ano ny tsara.

 Tsy miankin̈y amy fitondrasan̈anolombelon̈o ny amarainy tany ty. Zan̈ahary efa nifidy Pitondra ten̈a mahay. Jesosy Kristy an̈aranizio. Karaha ty raha koran̈iny Baiboly momba Jesosy Kristy io:

•   “Fahifan̈any andriana amy sorokonany. Panolotsain̈y Mahagaga, Zan̈ahary Mahery, Baba Mandrakizay, Andrianany Fiadan̈ana. Mbala an̈aran̈a hikahian̈a izy koa jiaby zen̈y.”​—Isaia 9:6.

 Jesosy io Panjakany Fanjakan̈any Zan̈ahary. Fanjakan̈a io andan̈itry an̈y. (Matio 6:10) Izy manan̈a angovo, fahendrena, ndreky von̈ono hankatsara tany ty ndreky hikarakara olombelon̈o jiaby. (Salamo 72:12, 16) Lera Jesosy mitondra tany ty, haripany olo jiaby “mandrobaka tany ty”, avio koa izy hampilamin̈y tontolo iain̈ana.​—Apokalypsy 11:18; Isaia 35:1, 7.

 Izikoa tianao hahazo fan̈ampiny fan̈azavan̈a momba vahaolan̈a amy fivoavoany toetrandra io, vakia lahatsoratra “Ino ma Raha Koran̈iny Baiboly Momba Fiovoany Toetrandra Ndreky ny Amaraintsika?”