Tamy 19 May 2022, tamy fivorian̈any Filankevitry Momba Filaminan̈a amy Firenena Mikamban̈a, mandilatrany 75 manaboninahitry nivolan̈a fa “nahay tsisy fo hanin̈y erantany, vokatrany valan̈aretin̈y COVID-19 ndreky fiovany toetrandra. Fa ady an Ukraine io nahainampan̈adary zen̈y fo, ke atahoran̈a hisy mosary foeky.” Tsy ela tafaranizen̈y, gazety Toekarena (angiley) nan̈ambara fa “ady io hahavy olo maro, amy donia feno problemo be ty, hofoatiny mafo.” Baiboly efa nan̈ambara fa ho hisy mosary mare amy fotoan̈a misy atsika zioty. Fa izio koa mikoran̈a raha han̈ampy atsika hiatriky zen̈y.

•    Jesosy nivolan̈a: “Hisy firenena hiady firenena, hisy fanjakan̈a hiady fanjakan̈a. Hisy mosary.”​—Matio 24:7.

•    Bokiny Apokalypsy mikoran̈a momba pitenginy sevaly an̈ohatra. Efatra iro io, fa araiky amindro manondro ady. Araiky man̈araka izy ndraiky manondro mosary, lera sarotro mare mahita hanin̈y avio ho lafo koa vangany. “Hitako fa nisy sevaly joby, avio nisy balansy tamy tan̈any pitenginizio. Zaho naharen̈y raha mira feo ... nivolan̈a: ‘Karama andra araiky vangany varimbazaha kilo araiky, avio mira amy zen̈y koa vangany vary orza telo kilo.’”​—Apokalypsy 6:5, 6, Dikanteny Angiley Moderny.

 Tanteraka amy zioty faminanian̈any Baiboly momba mosary. “Andra farany” ikahiany Baiboly fotoan̈a misy atsika zioty. (2 Timoty 3:1) Izikoa tianao ho hay tsarabe momba “andra farany” ndreky iro pitenginy sevaly efatra koran̈iny Apokalypsy io, zahava video Niova Fiain̈ana Erantany Komansy Taminy 1914, avio vakia lahatsoratra “Iza Ireo Mpitaingin-tsoavaly Efatra?”

•    Amy Baiboly ao misy torohevitry mahomby afaka man̈ampy anao hiatriky raha sarotro, an̈isanizen̈y fanongany vangany hanin̈y, firaka amy tsy fisiany hanin̈y foeky. Zahava torohevitry sasany momba zen̈y amy lahatsoratra “Ahoana Raha Lasa Mihena ny Vola Miditra Aminao?”

•    Mampan̈anten̈a atsika koa Baiboly fa mbala hahaiho tsara fiain̈ana. Andra araiky an̈y, hoizy, mbala “hahavokatra be tany” ke olo jiaby ho ampy hanin̈y tsarabe. (Salamo 72:16) Izikoa tianao ho hay tsarabe raha ampan̈antinainy Baiboly momba ny amaray avio nan̈ino raha zen̈y mety atokisan̈a, vakia lahatsoratra “Mbola Hihatsara ve ny Fiainana Amin’ny hoavy?”