Isaka taon̈o, mandilatra 10 000 horohorontany mandalo. Ankamaraozandro tsy mahery ke tsy mandrobaka raha. Fa sasany ndraiky ten̈a mandrobaka raha maro, avio mampijaly ndreky mahafaty olo foeky. Tsy zen̈y fo, fa mbala iô koa tsunami mandrobaka faritry amorondranomasin̈y sady mamono olo maro mipetraka an̈y. Baiboly ma efa nivolan̈a tsialohaloha momba iro horohorontany maventy aby io?

Amy lahatsoratra ty

•  Baiboly ma efa nivolan̈a fa hisy horohorontany?

•  Man̈atanteraka faminanian̈any Baiboly ma fisiany horohorontany amy izioty io?

•  Ino mahatsara atsika mahay faminanian̈any Baiboly momba horohorontany?

•  Hevitry diso momba faminanian̈any Baiboly ndreky horohorontany

 Baiboly mikoran̈a horohorontany. Hitantsika raha zen̈y amy faminanian̈a nikoran̈iny Jesosy ao. Hitantsika amy boky amy Baiboly aby ty volan̈anany aby zen̈y:

 “Hisy firenena hiady firenena, hisy fanjakan̈a hiady fanjakan̈a. Hisy mosary ndreky horohorontany koa amy tany maro.”​—Matio 24:7.

 “Hisy firenena hiady firenena, hisy fanjakan̈a hiady fanjakan̈a. Hisy horohorontany amy tany isankarazany, baka io hisy mosary koa.”​—Marka 13:8.

 “Ho hisy horohorontany matanjaka, baka io hisy valan̈aretin̈y ndreky mosary amy tany maro.”​—Lioka 21:11.

 Jesosy efa nivolan̈a fa hisy “horohorontany maventy” handalo “amy tany isankarazany,” avio koa lagera ndreky mosary baka io valan̈aretin̈y. An̈atiny fotoan̈a araiky raha jiaby zen̈y. Fitambarany raha jiaby zen̈y ivolan̈ana fa miain̈y amy fotoan̈a miavaka zanakolombelon̈o. Kahian̈a “farany donia ty,” na “andra farany” fotoan̈a io. (Matio 24:3; 2 Timoty 3:1) Izikoa faminanian̈any Baiboly zahavan̈a, efa nanomboko taminy 1914 “andra farany” ary efa tsy ho ela izio ho tapitry.

 Ia. An̈isany faminanian̈a nikoran̈iny Jesosy horohorontany ndreky raha hafa efa tanteraka aminy andrantsika izioty aby io. Nanomboko taminy 1914, nisy horohorontany maventy kadiriny 1 950 nandalo, ke nahafaty olo mandilatra aroe tapitrisa. aAlo baka atsika hizaha ohatra vitsivitsy tamy lay nandalo tamy taonjato misy atsika ty.

 2004​—Océan Indien. Nisy horohorontany 9,1 amy maridrefy Richter nandalo ke nahavy tsunami tamy tany 12. Izio nahafaty olo kadiriny 225 000.

 2008​—Chine. Nisy horohorontany 7,9 amy maridrefy Richter nandravan̈a tanàna ndreky tanabe maro. Kadiriny olo 90 000 naty tamizio. Olo 375 000 naratra baka io antapitrisany tsy nanan̈a tran̈o hipitrahan̈a.

 2010​—Haiti. Nisy horohorontany 7,0 amy maridrefy Richter tan̈y. Niaraka izio vita hely, nimpody nihozongozon̈o impiripiry tany. Olo mandilatra 300 000 naty baka io antapitrisany tsy nanan̈a tany hipitrahan̈a.

 2011​—Japon. Nisy horohorontany 9,0 amy maridrefy Richter ndreky tsunami nandalo ke nahafaty olo kadiriny 18 500. Anjatony tapitrisa koa olo tsy maintsy nafindra. Nisy robaka central ta Fukushima ke niteraka voina niokleary. Folo taon̈o tafaranizin̈y, mbala nisy olo 40 000 tsy afaka nimpody tamy tran̈ondro fo fotony navozoan̈a mbala hisy mare fiparitahany taratra io amy tanindro.

 Faminanian̈any Baiboly momba horohorontany io mampitandrin̈y atsika amy raha hiboaka tsy ho ela. Jesosy nivolan̈a: “Izikoa fa hitanaro fa efa miboaka raha jiaby zen̈y, dikanizen̈y efa marikitry Fanjakan̈any Zan̈ahary.”​—Lioka 21:31.

 Baiboly man̈azava fa Fanjakan̈any Zan̈ahary io Fanjakan̈a ten̈a misy andan̈itry an̈y. Jesosy Kristy Panjakanizio. Jesosy nampianatra pan̈aradia izy hivavaka baka haviany Fanjakan̈a io.​—Matio 6:10.

 Lera Fanjakan̈any Zan̈ahary mitondra tany ty, hifoan̈any Zan̈ahary antambo jiaby, an̈isanizen̈y horohorontany mampijaly olo. (Isaia 32:18) Ankoatranizen̈y, hadosony Zan̈ahary koa takaitry arabatan̈a ndreky arapihetsehampo baka taminy horohorontany aminandra izio. (Isaia 65:17; Apokalypsy 21:3, 4) Izikoa tianao hahita fan̈ampiny fan̈azavan̈a, vakia lahatsoratra “Inona no Hataon’ny Fanjakan’Andriamanitra?”