Eran-tany, mahaimaro fo olo mifamono baka amy pôlitiky.

•   Nisy 39 kandidà nivonen’olo ta Meksiky, tan̈atin’ny fotoan̈an’ny fifidianan̈a tamin’ny 2023-2024. Nisy karazan̈a hakafirianan̈a hafa vokatran’ny pôlitiky koa tamy zen̈y.

•   Tato ato zay tan Erôpy, naro hakafirianan̈a nataon’olo baka amy pôlitiky. Tamin’ny 15 May 2024 iziô, nisy olo tseky hamono premie Ministrin’ny Slovaquie.

•   Tamin’ny 13 Zie 2024, nisy olo tseky hamono Donald Trump, prezidan’ny Etazonỳ taloha.

 Nan̈ino maro olo mifamono baka amy pôlitiky? Ombian̈a vo tsy hisy eky raha karaha zen̈y? Ino raha koran̈in’ny Baiboly momba zen̈y?

 Baiboly mivolan̈a fa “andra farany” andra iain̈antsika iziôty. Rango efa ela Baiboly efa nivolan̈a fa maro olo ho ratsy jery, ke olo tsy hifankahazo sady ho kafiry.

•   “Amin’ny andra farany an̈y, hisy fotoan̈a sarotro tsy mora hatrefin̈y. Olo … tsy hahay han̈ano mersy, tsy ho men̈atra mivadiky, … tsy mety hifan̈arahan̈a, … ho masiaka mare, … ho mpamadiky, hierin̈y olo, ho poerapoera.”​—2 Timoty 3:1-4.

 Baiboly efa nivolan̈a fa fotoan̈a iain̈antsika iziôty ho feno korontan̈a, karaha ataon’ny fanonganam-panjakan̈a ndreky lagrevo isan-karazany. (Lioka 21:9, lamariky amy pazy ambany) Fa ndray zen̈y, korontan̈a, hakafirianan̈a, ndreky fisaratsarahan̈a baka amy pôlitiky tsy hitohy karaha io fo mandrakizay.

 Baiboly man̈azava fa hisoloan’ny Zan̈ahary Fanjakan̈anany an-dan̈itry an̈y fanjakan̈an’olombelon̈o jiaby ambony tany ty.

•   “Zan̈aharin’ny lan̈itry hanangana fanjakan̈a. ... Izio hanôrotôro ndreky han̈afoan̈a fanjakan̈a [hafa] jiaby io, ke izio zaraiky fo ho tavela mandrakizay.”​—Daniela 2:44.

 Fanjakan̈an’ny Zan̈ahary io ten̈a hampiray sain̈y ndreky hampiadan̈a aviô hampihavan̈a olo jiaby, eran-tany.

•   “Andrianan’ny Fiadan̈ana” ikahian̈a Jesosy Kristy Mpanjakan’ny Fanjakan̈a io, ke halainy antoko tsarabe fa “tsy ho hisy farany” ankitin̈y “fiadan̈ana.”​—Isaia 9:6, 7.

•   Ke diany iziô, olo indesin’ny Fanjakan̈a io efa mianatra mihavan̈a tsarabe. Zen̈y mahavy Baiboly mivolan̈a karaha ty: “Hanefy sabatrandrô hanjary lasarỳ irô vahoaka aby io, baka iô saboandrô hitifendrô hanjary meso fandrantsan̈ana rezain. Firenena aby io tsy hampanonga sabatra hamangoan̈a naman̈a eky, baka iô irô tsy hianatra hiady eky.”​—Isaia 2:3, 4.

 Izikoa anao mila sôsoko fan̈azavan̈a, vakia lahatsoratra “Inona no Hataon’ny Fanjakan’Andriamanitra?”, aviô zahava video Karakôry ma Fanjakan̈any Zan̈ahary Zen̈y?