Vo tsy ela zay, mpitondra man̈eran-tany, mpahay siansy aviô mpahay teknôlôzy aby io nan̈ambara hevitrindrô momba raha vitan’ny intelligence artificielle a (AI). Niaiky irô fa ten̈a ilain̈a izio, kanefa miasaloha koa irô tsao hisy olo hampiasa izio amy fomba ratsy.

•   “An̈isan’ny teknôlôzy ten̈a arifomba amy ziôty AI, aviô izio mety hahavita han̈atsara fiainan̈an’olo ... Kanefa izio koa mety hahavy prôblemo karaha ataony: Momba fiarovan-ten̈a, tsy fandriam-pahaleman̈a hahay hitombo fo. Zon’ny olom-pirenena koa ho voahitsakitsaka, karaha zen̈y koa fiainan̈an’olo manokan̈a, aviô hihen̈y koa finoan̈an’olo ndreky fatokisan’olo demokrasia.”​—Kamala Harris, Lefitrin’ny Filoham-pirenenan’i Etazonỳ, 4 May 2023.

•   “Nata mety han̈atsara raha amy resaka fitahan̈a intelligence artificielle (AI) io, izio koa mety hampandiranandra fahasalaman̈antsika ara-batan̈a ndreky ara-pihetseham-pô.” Zen̈y raha nisoratan’ny vondron̈o iraisam-pirenena araiky misy dôkotera ndreky manam-pahaizan̈a momba fitahan̈a, taritin’i Dr. Frederik Federspiel, tamy lahatsoratra araiky niboaka tamy 9 May 2023, tamy BMJ Global Health. b

•   “Efa azon’olo ampiasain̈a amy fan̈aparitahan̈a fan̈azavan̈a tsy marin̈y AI io. Tsy ho ela koa hifoan̈an’izio asan’olo sasany. Miasaloha mare olo sasany miasa amy resaka teknôlôzy, fôtony mety hampandiranandra fiain̈anan’olombelon̈o AI io amin’ny amaray an̈y.”​—The New York Times, 1 May 2023.

 Ho hitantsika iô fo asa hampiasain̈a baka han̈ampian̈a olombelon̈o ma AI io sa hampiasain̈a baka hampadiranandra olombelon̈o. Ino raha koran̈in’ny Baiboly momba zen̈y?

 Baiboly man̈aboaka nan̈ino tsy vitan’olombelon̈o man̈amia antoko fa raha tsara fo hampiasan̈a teknôlôzy vaovao isan-karazany niforôn̈indrô aby io.

1.  1. Olo araiky koa fa man̈ano raha, mety ho tsara fikasan̈anany, fa tsy takatran’ny jerinany fo ino mety ho vokan-dratsin’izio amin’ny amaray an̈y.

   •   ‘Misy lalan̈a iritriretin’olo fa mety, kanefa amy fahafatesan̈a an̈y hiafarany.’​—Ohabolana 14:12.

2.  2. Izikoa fa misy raha niforôn̈in’olo araiky, tsy voafehin’olo io foeky fomba hampiasan’olo hafa izio na amy fomba tsara zen̈y na amy fomba ratsy.

   •   ‘Tsy maintsy ambelako nin’olo handimby zaho [raha nitadiaviko]. Ary azôvy mahay raha ho hendry olo zen̈y na ho adala? Zaho nan̈ano erakan’ny vitako niasa mare sady nampiasa fahendrenanaka jiaby, kanefa izy hanjaka amy raha jiaby nazoko tambanin’ny masoandra tatỳ.’​—Mpitoriteny 2:18, 19.

 Raha jiaby zen̈y man̈aboaka fa atsika ten̈a mila tari-dalan̈a baka amy Mpamôron̈o atsika.

 Mpamôron̈o atsika mampan̈anten̈a fa tsisy olo na teknôlôzy niforôn̈in’olo foeky hambelany hamotiky tany na olombelon̈o.

•   ‘Maharitry mandrakizay tany.’​—Mpitoriteny 1:4.

•   “Olo marin̈y handova tany, ke hipetraka iô tsisy farany.”​—Salamo 37:29.

 Man̈amia tari-dalan̈a atsika Mpamôron̈o atsika baka atsika ho sambatra rango iziôty, aviô han̈anten̈a fiainan̈a milamin̈y amin’ny amaray. Anao koa tihahita fan̈azavan̈a fan̈ampiny momba raha koran̈in’ny Baiboly, vakia lahatsoratra ““Misy Tari-dalana Azo Antoka Ve?” aviô “Mbola Hihatsara ve ny Fiainana Amin’ny Hoavy?”