“Izikoa tsisy fandiferan̈a, fiadanan̈a io tsy ho hisy foeky.”​—UNESCO Declaration of Principles on Tolerance, 1995.

 Olo koa tsisy tihandefitry amy namany, manjary tsy hifan̈aja irô, aviô koa hifankalain̈y. Baka amy raha karaha zen̈y mahavy olo matetiky man̈ano volan̈a tsisy fitiavan̈a nata potiny, han̈avakavaka ndreky kafiry.

 Fa na izy man̈ano zen̈y, tsy mira fahaizanolo dikany mandefitry zen̈y. Fahaizanolo sasany izio, zay raha ataonolo iken̈a fo, karaha zen̈y koa fitondran-ten̈anany na karakôry na karakôry iken̈a fo. Fa hevitrinolo sasany ndraiky karaha nin’ny Baiboly fo. Olo mandefitry zen̈y amy Baiboly man̈aja zon’olo tsiaraikiaraiky hifidy toetry tiany ndreky raha inoany, nata toetry aby ndreky raha inoan̈a io tsy ikeny.

 Karakôry ten̈a fandiferan̈a aminany? Baiboly ma mahavita man̈ampy olo handefitry amin’ny andra iziôty?

Raha koran̈iny Baiboly momba fandiferan̈a

 Baiboly mandrisiky olo handefitry fo. Karaha ty koran̈in’izio ao: ‘Ataova hainolo jiaby fa anarô mahay mandanjalanja.’ (Filipianina 4:5) Baiboly mandrisiky atsika ho tsara fan̈ahy ndreky han̈aja olo, aviô han̈ano ny rariny izikoa fa mifandray aminolo. Ke olo araiky koa man̈ano ambaka zen̈y, olo ambelany hifidy raha tiandrô, nata tsy ikeny na tsy hataony foeky raha ataonolo aby io.

 Fa ambaran’ny Baiboly mazava koa fa Zan̈ahary nan̈amia torolalan̈a atsika momba fitondran-ten̈a. Karaha ty fivolan̈any izio ao: ‘A zanak’olombelon̈o ô, efa nivolan̈iny [Zan̈ahary] taminao raha tsara.’ (Mika 6:8) Ao man̈ambara tari-dalan̈a baka amy Zan̈ahary baka hampatsara fiain̈ana.​—Isaia 48:17, 18.

 Atsika tsy imboan’ny Zan̈ahary mitsara olo. Karaha ty avoambara amy Baiboly ao: ‘Araiky fo Mpan̈ano Lalàn̈a ndreky Mpitsara atsika ... Anao ma azôvy hitsara namanao?’ (Jakoba 4:12) Zan̈ahary man̈ambela atsika tsiaraikiaraiky hifidy zay raha tiantsika hatao, fa atsika tompiny fo tompin’andraikitry amy zen̈y.​—Deoteronomia 30:19.

Raha koran̈in’ny Baiboly momba fan̈ajan̈a olo

 Baiboly mivolan̈a fa ‘atsika tokony han̈aja olo jiaby.’ (1 Petera 2:17) Ke izikoa olo araiky mifidy han̈araka torolalan̈an’ny Baiboly, man̈aja olo jiaby izy, na ino na ino raha inoan’olo io na karakôry na karakôry fiain̈ananany. (Lioka 6:31) Fa zen̈y ndraiky tsy mivolan̈a fa ikenolo man̈araka raha volan̈in’ny Baiboly aby zay raha inoanolo na hevitrinolo, aviô tsy midika ke hitohan̈andrô aby fanapahan-kevitry jiaby raisinolo. Nata olo man̈araka raha volan̈in’ny Baiboly, irô mahalala fomba fo ndreky man̈aja olo, ke hifen̈y fo irô han̈ano erakan’ny vitandrô han̈araka fomba nitondrasan’i Jesosy olo.

 Ohatra, tandraraiky Jesosy fanôjy man̈angy araiky nan̈araka fivavahan̈a tsy nikeny. Sôsoko zen̈y koa, man̈angy io nan̈ano tran̈o araiky tamy lelahy tsy vadiny, ke ten̈a tsy niady tamy Jesosy fomba fiain̈anan’ny man̈angy io zen̈y. Fa Jesosy koa fa nikoran̈a taminany, najain’i Jesosy fo izy.​—Jaona 4:9, 17-24.

 Karaha raha nataon’i Jesosy in̈y koa raha ataon’ny Kristianin̈y iziôty. Irô efa von̈ono fo han̈azava aminolo antony mahavy irô mino raha araiky, ke ‘man̈aja mare’ irô izikoa fa man̈ano zen̈y. (1 Petera 3:15) Baiboly mampianatra Kristianin̈y tsy hiforse olo han̈eky hevitrindrô. Ao misy mivolan̈a fa mpan̈ara-dia Kristy ‘tsy tokony hiady fa ho tsara fan̈ahy aminolo jiaby’, nata tsy mira amy nin’ny Kristianin̈y raha inoandrô olo aby io.​—2 Timoty 2:24.

Raha koran̈in’ny Baiboly momba fahalain̈ana olo

 Baiboly mivolan̈a fa atsika tokony ‘han̈ano raha ihavan̈ana aminolo jiaby.’ (Hebreo 12:14) Olo tia fihavan̈ana baka tsy malain̈y olo. Izy koa tsy milefitry amy raha inoany foeky, fa kanefa mifen̈y mare man̈ano raha hampadin̈y fihavan̈ana io. (Matio 5:9) Baiboly koa mandrisiky Kristianin̈y ho tia fahavalondrô, ho tsara fan̈ahy fo, nata aminolo man̈aboaka toetry ratsy amindrô.​—Matio 5:44.

 Marin̈y ndraiky fa Baiboly mivolan̈a fa ‘halan’ny Zan̈ahary’ na ‘tsy tiany foeky’ zay raha mety han̈isy ratsy olo na hahavy izy tsy ho hisy hajany. (Ohabolana 6:16-19) Fa kanefa Baiboly iô mampiasa volan̈a misy ifandraisany amy fahalain̈ana olo hindesin̈y hivolan̈ana fa misy raha ataonolo kanefa halan’ny Zan̈ahary. Tsy tiany foeky. Baiboly koa man̈ambara mazava fa Zan̈ahary vôn̈ono hamela helokonolo, aviô vôn̈ono koa han̈ampy olo hiova ndreky hiain̈y mifan̈araka amy torolalan̈a amezany.​—Isaia 55:7.

Toko sy andininy amy Baiboly mikoran̈a momba fandiferan̈a ndreky fan̈ajan̈a olo

 Titosy 3:2: ‘Mahaiza mandanjalanja ndreky halemy toetry tsarabe aminolo jiaby.’

 Matio 7:12: “Ke zay raha tianarô hataonolo aminarô, mba ataova amindrô koa.”

 Josoa 24:15: ‘Fidiana iziôty azôvy tianaro hitompoen̈y.’

 Asan’ny Apostoly 10:34: “Zan̈ahary tsy man̈avakavaka.”

 Habakoka 1:12, 13: ‘Zan̈ahary tsy milefitry amy raha ratsy.’

 Romanina 12:19: “Ambilà Zan̈ahary han̈aboaka helokonany. Fotony ty raha efa voasoratra: ‘Zaho tompiny famalian̈a, ary zaho hamaly’, ho Jehovah.” a

 Tsisy olo imboan’ny Zan̈ahary mamaly faty, na azôvy izy na azôvy. Io tsy maintsy mbala hataony fo raha hahitan̈a ny marin̈y, amy lera efa niritriretiny han̈anaovany zen̈y. Ke izikoa tianao hahazo fan̈azavan̈a maro momba raha zen̈y, vakia lahatsoratra “Mbola ho Foana ve ny Tsy Rariny Indray Andro Any?”