Nampitandrin̈y karaha ty prezidany Banky Mondialy, tamy tatitry tamy Ziain in̈y: “Mampavozo toekarena erantany, fotony vidimpiainan̈a manonga malaky, kanefa volanolo tsy maharaka.”

 Karaha ty koa raha nikoran̈iny Tahirimbola Iraisampirenena: “Nanonga mare vangany lesansy ndreky hanin̈y, ke raha zen̈y ten̈a misy vokany aminolo amy tany masikiny.”

 Baiboly man̈ampy atsika hahay antony mahavy atsika miatriky problemony toekarena karaha zen̈y. Koran̈iny ao koa akory hataontsika hiatriky izio, avio ino vahaolan̈a maharitry mety hantinaintsika.

•   Koran̈iny Baiboly fa miain̈y an̈atiny “andra farany” atsika izioty.​—2 Timoty 3:1.

•   Jesosy nivolan̈a fa an̈isany raha mampiavaka andra farany io, “olo hahita raha mampavozo.” (Lioka 21:11) Mavozo mare olo izikoa fa manonga mare vidimpiain̈ana. Mavozo iro fotony miasaloha momba ny amaraindro, tsao iro tsy hahavita hamelon̈o fianakavian̈andro.

•   Bokiny Apokalypsy efa nan̈ambara fa hanonga mare vangany hanin̈y, an̈atiny andra farany. ‘Zaho naharen̈y raha karaha feondraha zay. ... Volan̈iny karaha ty: “Denaria araiky vangany varimbazaha kilô araiky, avio denaria araiky vangany vary orzy telo kilô.”’ ​—Apokalypsy 6:6.

 Misy fan̈azavan̈a maro momba “andra farany” ndreky momba faminanian̈a amy bokiny Apokalypsy ao, zahava video Niova Fiain̈ana Erantany Komansy Taminy 1914, avio vakia lahatsoratra “Iza Ireo Mpitaingin-tsoavaly Efatra?”

•   “Olo han̈amboatra tran̈o ke hipetraka ao, baka io iro hitsabo rezain ke hihina vokatra amy zen̈y. Olo tsy han̈amboatra tran̈o hipitrahanolo hafa zen̈y, baka io koa iro tsy hitsabo raha hohaninolo hafa.”​—Isaia 65:21, 22.

•   “Hahavokatra be tany; ho maro be vokatra, na firaka antampony bongo an̈y.”​—Salamo 72:16.

•   “‘Fotony olo efa mijaly mbala man̈ody ampijalin̈y fo, avio olo masikiny mitseky, zaho hitsangana ke han̈ano raha’, ho Jehovah.”​—Salamo 12:5. a

 Efa tsy ho ela han̈adoso problemo jiaby momba toekarena Zan̈ahary, tsy amy tany araiky fo fa amy tany jiaby. Izikoa tianao hahay karakory han̈anaovany zen̈y, vakia lahatsoratra “Hilamina Ihany ve ny Olana Ara-toe-karena?”

 Ndray zen̈y, Baiboly afaka man̈ampy anao hiatriky fanongany vidimpiain̈ana rango izioty. Amy fomba karakory? Misy torohevitry tsara momba fahaizan̈a mitantambola ao. (Ohabolana 23:4, 5; Mpitoriteny 7:12) Man̈azava raha maro momba zen̈y lahatsoratra aby ty: “Arovy ny Fanananao” ndreky “Ahoana Raha Lasa Mihena ny Vola Miditra Aminao?”