Tamin’ny 2022, nahataka 2,24 tapitrisa tapitrisa dôlara amerikain vola lanin’ny fanjakan̈a eran-tany tamy tafiky maramilandrô. Mbala tsiary nisy karaha zen̈y taloha. Baka tamin’i Russie nanafiky Ukraine in̈y nahavy zen̈y. Tamin’ny Avrily 2023, Stockholm International Peace Research Institute (SIPRI), nan̈aboaka tatitry ty mikasiky raha nandalo tamy taon̈o 2022:

•   “Nanonga 13 isan-jato” vola lanin’ny firenena Erôpeain tamy tafiky. “Zen̈y fitombosan̈a farany be tamy tôtalin’ny vola lanin’ny firenena Erôpeain tan̈aty taon̈o araiky, tafaran’ny 1991.”

•   ‘Nampitombosin’i Russie kadiriny 9,2 isan-jato vola laniany amy tafiky maramila. Taloha, Russie firenena fahadimy ten̈a nandany vola tamy tafiky, fa amy ziôty efa izy fahatelo.’

•   Mbala Etazonỳ fo firenena ten̈a nandany vola farany be amy tafiky maramila, fôtony “39 isan-jato amy vola lany tamy tafiky eran-tany” laniny tamy tafikinany.

 “Matoa fanjakan̈a eran-tany tsy vôly mampitombo vola lanindrô amy tafikindrô, dikan’izen̈y mahaimitombo fo asa ratsy eran-tany”, volan̈in’i Dr. Nan Tian, an̈isan’olo nanoratra tatitry naboakan’ny SIPRI.

 Baiboly efa nivolan̈a fa irô fanjakan̈a matanjaka eran-tany aby io hifan̈oesa, aviô efa nambarany atsika ino zaraiky fo raha afaka mampisy ten̈a fiadan̈ana.

•   Baiboly mivolan̈a fa atsika ziôty miain̈y amy ‘fotoan̈an’ny farany.’​—Daniela 8:19.

•   Bokin’i Daniela nivolan̈a fa amy fotoan̈a zen̈y, hifan̈oesa mare fitondrasan̈a matanjaka eran-tany. Ke irô io “hifan̈aposy” na hiady ho farany matanjaka. Irô koa handany ‘harian̈a’ na vola be.​—Daniela 11:40, 42, 43.

 Izikoa tianao ho hay raha koran̈in’ny Baiboly momba faminanian̈a zen̈y, zahava video Faminanian̈a Tanteraka: Daniela Toko Faha-11.

•   Baiboly mivolan̈a fa handeha hisoloan’ny Zan̈ahary fitondrasan̈an’olombelon̈o io. Izy “hanangana fanjakan̈a tsy ho ravan̈a mandrakizay, baka iô fanjakan̈a io tsy ho azon’olo hafa. Izio hanôrotôro ndreky han̈afoan̈a fanjakan̈a jiaby io, ke izio zaraiky fo ho tavela mandrakizay.”​—Daniela 2:44.

•   Tsy ho ela, Zan̈ahary Jehovah a han̈ano raha tsy vitan’olombelon̈o, tsy ino zen̈y fa hampisy ten̈a fiadan̈ana maharitry mandrakizay. Amy fomba karakôry? Hifoan̈an’ny Fanjakan̈anany an-dan̈itry an̈y fitaovan̈a jiaby findesin̈y miady ndreky hifaran̈any karify jiaby.​—Salamo 46:8, 9.

 Izikoa tianao hahay tsarabe raha handeha hataon’ny Fanjakan̈an’ny Zan̈ahary, vakia lahatsoratra “‘Ho Be ny Fiadanana’ Rehefa Hitondra ny Tany Ilay Fanjakana.”