Maro firenena erantany mirasarasa azony politiky. Koran̈iny Foibeny Fikarohan̈any Pew taminy 2022 in̈y, “65 isanjatonolo efa be amy firenena 19 nan̈ontanian̈a mivolan̈a fa baka amy politiky fo ten̈a tsy mampifan̈araka mare olo.”

 Asa mba mampisarasaraka olo karaha zen̈y koa politiky io amy tany misy anaro an̈y? Ino ma mahavy zen̈y? Ino vahaolan̈a? Diniha baka raha aby koran̈iny Baiboly ty:

 Baiboly efa nan̈ambara fotoan̈a misy atsika izioty io. “Andra farany” izioty ho izy. Zen̈y mahavy olo maro manan̈a toetry ratsy ke tsy mahavita miray sain̈y foeky.

•   “Aminy andra farany an̈y, hisy fotoan̈a sarotro tsy mora hatrefin̈y. Olo ho tia ten̈a, ... tsy mety hifan̈arahan̈a.”​—2 Timoty 3:1-3.

 Nata maro olo mba mifen̈y man̈ano asa tsara amy fanjakan̈a aby io, fanjakan̈a mbala tsy mahomby raha fo. Tsy mitovy hevitry baka iro ke sarotro amindro sady tsy vitandro foeky miaraka miasa hamaha olan̈a io. Efa nambarany Baiboly rango efa ela vokany.

•   “Olo nanjaka mare taminolo, ke nampiditry jaly tamindro.”​—Mpitoriteny 8:9.

 Fa Baiboly man̈ambara fa vahaolan̈a aminany io, fanjakan̈a araiky zay. Pitondra aminany io mahavita mamaha problemo jiaby mahavy olo mijaly izioty io.

 Baiboly mivolan̈a fa Jesosy Kristy pitondra ten̈a mahay. Izy manan̈a angovo, fahifan̈a ndreky fan̈irian̈a hampitambatra olo jiaby ndreky hampiadan̈a olo jiaby ambony tany eto.

•   “Aminy andra anjakany, olo marin̈y ho maro be, avio ho be mare fiadan̈ana.”​—Salamo 72:7.

•   “Firenena jiaby hanompo izy.”​—Salamo 72:11.

 Jesosy io ten̈a pitondra mahay, fotony izy tihan̈ampy olo, indrindraka iro olo aby ampijalinolo izioty io.

•   “Hamonjy olo masikiny mangataka vonjy aminany izy, ndreky hamonjy iro olo ambanin̈a, avio lan̈iany olo jiaby tsisy pan̈ampy. Hahinakinaka olo ambany ndreky olo masikiny izy, baka io hamonjy ain̈indro. Izy han̈avotro iro amy raha mampijaly iro ndreky han̈avotro iro aminolo kafiry iro.”​—Salamo 72:12-14.

 Ataova raha hahaizanao raha maro momba Fanjakan̈any Zan̈ahary andan̈itry an̈y, taritiny Jesosy io. Diniha ino hatsaran̈a ho azonao, avio akory hanohan̈anao fitondrasan̈a io.

•   Zahava video Karakory ma Fanjakan̈any Zan̈ahary Zen̈y?

•   Vakia lahatsoratra “Tsy Manao Kolikoly ny Fanjakan’Andriamanitra.”