Eraka tatitry a eran-tany araiky niboaka vo tsy ela, amin’olo efatra, olo araiky farafaheliny mahatsiaro latsatokan̈a.

•   “Mety hahatsiaro latsatokan̈a aby olo jiaby, na firy taon̈o izy na firy taon̈o, aviô ndray aia ndray aia tany misy izy.”​—Chido Mpemba, tompon’andraikitry araiky amy Vaomiera Mikarakara Fifandraisan̈a amy Fiaraha-monin̈y, amy Fikambanan̈a Iraisam-pirenena Momba Fahasalaman̈a.

 Tsy olobe fo na olo amy tany mitokan̈a fo mety hahatsiaro latsatokan̈a, karaha fiheveran’olo maro izy, fa firaka amy tanora, olo matanjaka, olo manan̈a asa tsara, ndreky olo manambady koa mety hahatsiaro latsatokan̈a aby. Izikoa olo araiky mahatsapa latsatokan̈a, raha zen̈y mety hisy vokany amy vatan̈anany ndreky amy fônany.

•   Karaha ty nivolan̈in’ny Dr. Vivek Murthy, Ministran’ny Fahasalaman̈a an Etazonỳ: “Fahatsapan̈a latsatokan̈a io tsy zisty fihetseham-pô ratsy tsapan’olo an̈atin’ny fônany ao fo. Mety havozoan̈a hofoaty karaha olo araiky mifima sigarety 15 isanandra olo araiky tsy mifandray amin’olo.”

 Tsy tian’ny Mpamôron̈o atsika hitokatokan̈a. Tian’ny Zan̈ahary hahatsiaro ravoravo atsika ndreky tiany ho hisy kamarady.

•   Toro lalan̈an’ny Baiboly: “Zan̈ahary nivolan̈a: ‘Tsy tsara izikoa lelahy io tsisy naman̈a.’”​—Genesisy 2:18.

 Tian’ny Zan̈ahary hifandray aminany atsika. Izikoa atsika man̈aton̈o izy, izy mampan̈anten̈a fa izy hifandray amintsika koa.​—Jakoba 4:8.

•   Toro lalan̈an’ny Baiboly: “Sambatra lan̈iany olo mahatsiaro fa mila Zan̈ahary, fôtony izy hahazo Fanjakan̈an’ny lan̈itry.”​—Matio 5:3.

 Tian’ny Zan̈ahary atsika manompo izy miaraka amin’ny namantsika. Ho sambatra atsika izikoa man̈ano zen̈y.

•   Toro lalan̈an’ny Baiboly: ‘Tsara atsika mba mifampandiniky ke mifandrisiky amy fitiavan̈a ndreky asa tsara, fa tsy manapatapaka fivorian̈a, … fa hifankahery fo, fôtony hitantsika tsarabe fa efa marikitry andra io.’​—Hebreo 10:24, 25.

 Ten̈a ilain̈a mifen̈y man̈ano raha hahavy anten̈a tsy hahatsiaro latsatokan̈a. Han̈ampy anao amy zen̈y lahatsoratra ty “Manirery Nefa Betsaka ny Fitaovam-pifandraisana.”