Eran-tany, maro olo tia fomba fiain̈ana vegan.

•   “Vegan io karazan̈a filôzôfỳ ndreky fomba fiain̈ana. Olo man̈araka izio mifen̈y erakan’ny vitandrô tsy mampijaly biby, tsy mihina biby, tsy misikiny na mampiasa raha baka amy biby.”​—The Vegan Society.

 Man̈araka fomba fiain̈ana vegan olo sasany fôtony irô miasaloha mare amy biby ndreky tontolo iain̈ana, fahasalaman̈a, na koa nohon’ny antony ara-pivavahan̈a.

•   “Maro amin’olo man̈araka fomba fiain̈ana vegan io tsy vitany mitandrin̈y amy raha ohanin̈y karaha mahazatra fo fa matetiky irô man̈araka fomba fihevitry filôzôfỳ na fomba fisain̈ana miramiran̈a amin’izen̈y. Aviô irô mino mare fa safidy ataondrô io han̈atsara fiain̈ana amy donia ty.”​—Britannica Academic.

 Fomba fiain̈ana vegan io ma mahavita man̈adoso prôblemo mifandray amy tany ipitrahantsika ty eto? Ino raha koran̈in’ny Baiboly momba zen̈y?

 Baiboly mivolan̈a fa Zan̈ahary Jehovah Mpamôron̈o atsika. a Aminany, olombelon̈o an̈abon̈abo tozay biby, aviô atsika nasainy nanjaka amy biby aby io. (Genesisy 1:27, 28) Izy nan̈amia lalan̈a atsika hihina henan’ny biby. (Genesisy 9:3) Fa ndray zen̈y, izy man̈ameloko olo mampijaly biby.​—Ohabolana 12:10.

 Eraka raha koran̈in’ny Baiboly, anjaran’olo tsiaraikiaraiky manapa-kevitry na izy hihina hena na tsy hihina. b Tsy baka amy zen̈y azahoantsika na tsy azahoantsika sitraka amy Jehovah. (1 Korintianina 8:8) Ke tsisy olo tôkony han̈amia tsin̈y naman̈a amy raha ohaniny.​—Romanina 14:3.

 Baiboly man̈ambara fa tsy fomba fiain̈ana fidintsika hamaha prôblemo amy donia ty. Maro amy raha manahiran̈a amy donia ty baka amy pôlitiky, fiaraha-monin̈y, aviô fomba fitantan̈ana. Tsisy olo hahavita hamaha prôblemo aby io, fôtony Baiboly mivolan̈a:

•   “Raha koa mibiloko fa tsy mety ampahitsin̈a eky.”​—Mpitoriteny 1:15.

 Mpamôron̈o atsika handeha hamaha prôblemo jiaby atrefintsika amin’iziôty. Hafa hely fomba ikoran̈an’ny Baiboly raha handeha hataony io.

•   ‘Aviô zaho nahita lan̈itry vaovao ndreky tany vaovao; efa tsy iô eky baka lan̈itry taloha ndreky tany taloha, sady ranomasin̈y koa efa tsisy eky.’​—Apokalypsy 21:1.

 Fitondrasan̈an’olombelon̈o oharin̈y amy ‘lan̈itry taloha’, hisoloan’ny Zan̈ahary “lan̈itry vaovao” tsy ino zen̈y fa Fanjakan̈anany andan̈itry an̈y. Izio han̈adoso ‘tany taloha,’ na olo ratsy fan̈ahy jiaby, aviô hanjaka amy ‘tany vaovao’ na olo jiaby man̈eky fahifan̈anany.

 Fitondrasan̈an’ny Fanjakan̈an’ny Zan̈ahary zaraiky fo hahavita hampianatra olombelon̈o hiain̈y milamin̈y miaraka amy biby ndreky tsy handrobaka tontolo iain̈ana.​—Isaia 11:6-9.