Ino ma Raha Koran̈in’ny Baiboly Momba Mosary?
“Tsisy olo mosary eky.” Io tanjon̈ondrô mpitondra aby io, han̈adoso problemo faran’ny maventy mahazo olombelon̈o, ke han̈amia hanin̈y olo tsiaraikiaraiky ambony tany. a Raha ho vitan’olo ankitin̈y ma han̈adoso mosary io? Ino raha koran̈in’ny Baiboly momba zen̈y?
Baiboly efa nan̈ambara rango efa ela fa ho hisy mosary
Baiboly efa nan̈ambara tsialohaloha fa hisy mosary amin’ny andrantsika iziôty. “Andra farany” ivolan̈ana fotoan̈a io. (2 Timoty 3:1) Tsy Zan̈ahary tômpin’andraikitry amy fisian’ny mosary io fa izy raha nampitandrin̈y atsika fo fa hisy mosary. (Jakoba 1:13) Zahava baka faminanian̈a aroe ty.
“Hisy mosary... amy tany isan-karazany.” (Matio 24:7) Dikan’izen̈y, hisy mosary amy tany maro. Tsy ela zay, karaha ty nivolan̈in’olo mpandiniky momba fitadiavan̈a hanin̈y ndreky fandrasan̈a izio: “Mifen̈y olo eran-tany miady amy mosary io, fa nimpody an-dalan̈a irô. Mbala misy fo baka mosary ndreky tsy olo tsy ampy hanin̈y.” b Olo mandeha an-jatony tapitrisa amy tany maro tsy mahazo hanin̈y ilaindrô. Ny raha mampalahelo, manjary maro amindrô olo aby io naty.
“Zaho nahita sevaly jôby, ke olo nitenginy izio nitana balansy tamy tan̈anany.” (Apokalypsy 6:5) Sevaly ndreky mpitenginy izy amy faminanian̈a io man̈ambara mosary misy amin’ny andra iziôty io. c Balansy amy tan̈anany io ndraiky man̈ambara tsy fisian’ny hanin̈y. Ke sevaly io koa fa nilomoay mare in̈y, nisy feo nivolan̈a fa hanonga mare vangan’ny hanin̈y, aviô nan̈iraka olo tsy han̈arin̈ary hanin̈y. (Apokalypsy 6:6) Tanteraka amy ziôty ankitin̈y zen̈y, fôtony misy krizin’ny hanin̈y amy tany maro, ke maro olo tsy mahita hanin̈y ndreky tsy mahavanga hanin̈y mahasalama.
Akôry han̈adosoan̈a mosary io?
Irô manam-pahaizan̈a aby io mivolan̈a fa mandilatran’ny hamarozan’olo ambony tany hamarozan’ny hanin̈y ambony tany. Fa ino fo ma mahavy mosary io? Zan̈ahary Jehovah Mpamôron̈o handeha han̈adoso problemo io, d ke ino ma raha koran̈iny momba izio?
Problemo: Fitondrasan̈an’olombelon̈o tsy mahavita man̈adoso olo masikiny ndreky problemo ara-bola, ke mahavy mosary ndreky raha tsy rariny io tsy mety afaka.
Vahaolan̈a: Fitondrasan̈an’olombelon̈o tsy lavorary io hisoloan̈a Fanjakan̈an’ny Zan̈ahary. (Daniela 2:44; Matio 6:10) Maro olo masikiny matetiky tsisy hanin̈y, fa hiova raha zen̈y izikoa fa mitondra Fanjakan̈an’ny Zan̈ahary. Karaha ty raha koran̈in’ny Baiboly momba Jesosy Mpanjakan’ny Fanjakan̈an’ny Zan̈ahary: “Hamonjy olo masikiny mangataka vonjy aminany izy, ndreky hamonjy irô olo ambanin̈a, aviô lan̈iany olo jiaby tsisy pan̈ampy. ... Hahavokatra be tany; ho maro be vokatra, na firaka antampon’ny bongo an̈y.”—Salamo 72:12, 16.
Problemo: Fisian’ny ady mandrobaka raha maro, aviô mampisy problemo ara-bola, ke manjary tsy malalaka fan̈amezan̈a hanin̈y olo, na mety tsy ho azo atao foeky.
Vahaolan̈a: ‘[Jehovah] han̈ano raha tsy hisian’ny ady eky eran-tany. Tapatapahiny zanapaly aviô potipotehiny saboa. Ravan̈iny amy môtro sarety findesin’ny maramila mandeha lagera.” (Salamo 46:9). Hitorotoroen’i Jehovah raha jiaby fiadivan’olo, aviô haripany koa olo jiaby tia ady aby io. Ho ampy hanin̈y olo jiaby amy zen̈y, ke tsy ho sarotro amindrô eky hahazo hanin̈y. Karaha ty raha ampan̈antinain’ny Baiboly: “Olo marin̈y ho maro be, aviô ho be mare fiadan̈ana firaka fanjava tsisy eky.”—Salamo 72:7.
Problemo: Fivoavoan’ny toetrandra ndreky antambo mandrobaka tsabo ndreky mandravan̈a tany fikajian̈a hanin̈y.
Vahaolan̈a: Ho vitan’ny Zan̈ahary hamehy angôvon’ny natira, ke hamoa tsarabe raha hatsabo amy zen̈y. Baiboly mivolan̈a: “[Jehovah] mampijanon̈o tafio; tsy hiola eky ranomasin̈y fa hilamin̈y tsarabe. ... Izy man̈ova tany dezera hanjary matsabory anirian’ny bararata. Ivoany tany be loharano tany paiky aby io. Izy han̈ano raha hahavy olo mosary hipetraka ao. ... Irô mamafy voan-draha amy vilo ndreky mitsabo rezain. Ho treka mare vokatra ho azo.”—Salamo 107:29, 35-37.
Problemo: Maro olo tia vola ndreky mikatramo, ke man̈amia hanin̈y mamparary ndreky ndreky mahafaty olo.
Vahaolan̈a: Fanjakan̈an’ny Zan̈ahary han̈adoso lan̈iany olo tsy man̈ano ny marin̈y ndreky mikatramo aby io. (Salamo 37:10, 11; Isaia 61:8) Baiboly mivolan̈a fa ‘Jehovah man̈amia rariny olo katramoen’olo, aviô izy man̈amia hanin̈y olo mosary.’—Salamo 146:7.
Problemo: Maro hanin̈y verivery ndreky tsy hita isaka taon̈o.
Vahaolan̈a: Fanjakan̈an’ny Zan̈ahary koa fa mitondra, ho voarasa tsara hanin̈y jiaby. Tamy Jesosy tambony teto, izy tsy tia nan̈arin̈ary hanin̈y. Ohatra, tandraraiky izy nan̈ano fahagagan̈a ke nahavoky olo mandeha 5 000 manan̈amby. Izy baka tiô nivolan̈a tamy mpianatranany aby io: “Avoria lan̈iany tsy lany, baka izio tsy ho verivery karaha io fo.”—Jaona 6:5-13.
Fanjakan̈an’ny Zan̈ahary han̈adoso fôtotro mahavy mosary io, ke olo jiaby amy zen̈y ho ravoravo hahazo hanin̈y treka sady tsara, aviô mahasalama. (Isaia 25:6) Izikoa tianao hay ombian̈a ma raha zen̈y ho hisy, zahava lahatsoratra “Rahoviana ny Fanjakan’Andriamanitra no Hitondra ny Tany?”
a Programme de développement durable à l’horizon 2030, niken’ny firenena jiaby anisan’ny Firenena Mikamban̈a tamin’ny 2015.
b Tatitry nitambaran’ny Sampan-draharahan’ny Firenena Mikambana Momba ny Sakafo sy ny Fambolena, aviô Banky Iraisam-pirenena ho An’ny Fampandrosoana ny Tontolon’ny Fambolena, aviô Sampan-draharahan’ny Firenena Mikambana Mikarakara ny Reny sy ny Zaza, baka iô Fandaharan’asan’ny Firenena Mikambana Momba ny Sakafo Eran-tany, ndreky Fikambanana Iraisam-pirenena Momba ny Fahasalamana.
c Izikoa tihahazo fan̈azavan̈a maro momba sevaly efatra amin’ny Apokalypsy, zahava lahatsoratra “Iza Ireo Mpitaingin-tsoavaly Efatra?”
d Jehovah io an̈aran̈an’ny Zan̈ahary. (Salamo 83:18) Zahava lahatsoratra “Azovy ma Jehovah?”
Mety ho Tianao Koa
FAN̈ONTANIAN̈A VALIANY BAIBOLY
Ino ma Raha Ahaizan̈a “Andra Farany” na “Vanimpotoan̈any Farany”?
Baiboly efa nan̈ambara tsialohaloha raha maro miaraka hiboaka ahaizan̈a andra farany.
FOTOKEVITRY ISANKARAZANY
Mbala ho Foan̈a ma Problemony Toekarena Io?
Misy fanjakan̈a araiky mahavita mikarakara raha maro ambony tany eto tsarabe. Izio han̈adoso fahantran̈a ndreky asalohanolo jiaby.
FAMPIANARAN̈A FOTOTRO AMY BAIBOLY
Karakory ma Fanjakan̈any Zan̈ahary Zen̈y?
Tamy Jesosy tambony tany teto, raha momba Fanjakan̈any Zan̈ahary io raha ten̈a nampianariny. Rango efa ela, pianatranany mivavaka haviany Fanjakan̈a io.
