“Vokatrany raha nataonolombelon̈o, hahairatsy fo toetrandra. Tsy ho ela, ankamarozany tanàna ho dobondrano. Hanonga tsisy ambaka izy koa hafanan̈any tany. Hampavozo koa andra ratsy. Hahaimaro koa olo sahiran̈a mahazo rano. Antapitrisany koa karazan̈a kakazo ndreky biby efa ho lany taranaka. Tsy mamoron̈o na mampitombo koran̈a atsika izikoa mivolan̈a zen̈y. Zen̈y aby ny raha mety ho hisy izikoa fanjakan̈a tsy man̈ova fomba fiasandro.”​—Nivolan̈iny António Guterres, sekretera zeneraliny Firenena Mikamban̈a, momba tatitry araiky nataony Fikambanan̈a Iraisampirenena Pikaroko Momba Fiovany Toetrandra (GIEC), taminy 4 Avrily 2022.

 “Mampitandrin̈y iro manampahizan̈a aby io fa, tsy ho ela, ho robaka iro parky nasionaly jiaby misy 423 an Etazonỳ, baka amy fanongany hafanan̈a ambony tany. Ke mety hiboaka iro antambo efa nikoran̈iny Baiboly, karaha ataony: Motro ndreky tondradrano, laglasy miravan̈a amy tany manintsy an̈y, fiakarany ranomasin̈y ndreky hafanan̈a.”​—“Tondradrano a Yellowstone, Famantaran̈a fa Hisy Antambo ho Avy”, Gazetiny New York (angiley), tamy 15 Ziain 2022.

 Mety ho voavaha ma problemony tany ndreky tontolo iain̈ana ty? Izikoa ia, azovy mahavaha izio? Alo zahavantsika raha koran̈iny Baiboly momba zen̈y.

 Baiboly mivolan̈a fa Zan̈ahary ‘handripaka lan̈iany olo mandrobaka tany ty.’ (Apokalypsy 11:18) Misy raha telo ianarantsika baka aminy andininy io:

1.  1. Baka amy raha ataonolombelon̈o fo mandrobaka tany ty.

2.  2. Mbala ho hisy farany fandrobatan̈a tany ty.

3.  3. Zan̈ahary, fa tsy olombelon̈o, hamaha problemony tontolo iain̈ana.

 Ambarany Baiboly fa ‘tany ty maharitry mandrakizay.’ (Mpitoriteny 1:4) Ho hisy olo fo hipetraka eto.

•   “Olo marin̈y handova tany, ke hipetraka iô tsisy farany.”​—Salamo 37:29.

 Mbala hilamin̈y fo problemony tontolo iain̈ana ty.

•   “Ho ravoravo tany dezera ndreky tany paiky. Ho ravoravo koa lemaka paiky sady hamolera karaha safrona.”​—Isaia 35:1.