Kadiriny dimy arivo tapitrisa olo ho avy hizaha atilety baka amy firenena 206 amy Saoma Ôlaimpiky (Jeux Olympiques) amy 2024. Karaha ty nivolan̈in’i Thomas Bach, prezidan’ny Kômity Ôlaimpiky Eran-tany: “Mampiray sain̈y olo eran-tany Saoma Ôlaimpiky io. Ke alô aboakantsika fa miray sain̈y ndreky milamin̈y ankitin̈y atsika amy saoma ataontsika io ndray atsika tsy mitovy ndreky samy amy tany faviantsika.”

 Ke Saoma Ôlaimpiky io ma mahavita raha miavaka be karaha zen̈y? Mahavita mampiray sain̈y ndreky mampihavan̈a olombelon̈o amin’ny ankitin̈y ma izio?

 Tsy spaoro fo raha ho hita amy Saoma Ôlaimpiky tamy taon̈o ty, fa kabaron’ny pôlitiky ndreky prôblemo ara-tsôsialy mahavy fisaratsarahan̈a koa. An̈isan’izen̈y raha momba zon’olombelon̈o, fan̈avakavahan̈a olo ndreky fan̈avakavahan̈a fivavahan̈a, aviô tsy fitovizan̈a.

 Tian’olo saoma iraisam-pirenena karaha ataon’ny Saoma Ôlaimpiky io. Kanefa, izio tsy ten̈a mahavy olo ho jery araiky ndreky hihavan̈a tsara aby, fôtony fohita ndreky hankalazain̈y mare amin’izio toe-tsain̈y mampisy fisaratsarahan̈a.

 Efa rango ela Baiboly efa nivolan̈a momba toetrin’olo amy ziôty io. Irô toetry aby io mahavy olo tsy miray sain̈y. (2 Timoty 3:1-5) Izikoa anao tihahay tsarabe momba faminanian̈a koran̈in’ny Baiboly io, vakia lahatsoratra “Efa Voalazan’ny Baiboly Mialoha ve ny Toe-tsain’ny Olona Amin’izao Andro Izao sy ny Zavatra Ataony?”

 Baiboly mikoran̈a raha ten̈a hampisy fihavanan̈a ndreky firaisan-tsain̈y. Koran̈in’izio ao fa olo jiaby ambony tany ty hiray sain̈y koa fa mitondra fanjakan̈an’ny lan̈itry, kahian̈a “Fanjakan̈an’ny Zan̈ahary.”​—Lioka 4:43; Matio 6:10.

 Jesosy Kristy Mpanjakan’ny Fanjakan̈a io. Izy han̈ano raha hisian’ny fiadan̈ana eran-tany. Baiboly mivolan̈a:

•   “Olo marin̈y ho maro be, aviô ho be mare fiadan̈ana.”​—Salamo 72:7.

•   “Hamonjy olo masikiny mangataka vonjy aminany izy ... Izy han̈avotro irô amy raha mampijaly irô ndreky han̈avotro irô amin’olo kafiry irô.”​—Salamo 72:12, 14.

 Rango ziôty, fampianaran’i Jesosy efa mampiray sain̈y olo mandeha an-tapitrisany baka amy firenena 239. Amy maha Kristianin̈y irô, Vavolombelon̈on’i Jehovah eran-tany mihavan̈a salakady miray sain̈y. Izikoa tianao ho hay akôry mahavy zen̈y, vakia gazety Tilikambo Fiambesan̈a, titranany “Inona no Hanampy ny Olona Tsy Hifankahala Intsony?”