“Problemo mpahazo tanora aretin-tsain̈y io, aviô izio mila alamin̈y malaky. Tambazotran-tserasera an̈isan’ny antony araiky ten̈a mahavy izio.”​—Dr. Vivek Murthy, minisitrin’ny fahasalaman̈a an Etazonỳ, New York Times, 17 Ziain 2024.

 Ino raha mety ataon’ny raimandreny baka hiarovan̈a zanakandrô amy problemo baka amy tambazotran-tserasera? Misy torohevitry mety arehan̈a amy Baiboly ao.

 Diniha irô torolalan̈an’ny Baiboly aby ty:

 “Olo mitandrin̈y mandiniky tsarabe isaka izy han̈ano raha.”​—Ohabolana 14:15.

 Nata maro problemo azo baka amy fampiasan̈a tambazotran-tserasera, anao tsy voatery hisakana zanakanao tsy hampiasa izio. Fa alohan’ny izy ambelanao hampiasa izio, ataova azo antoko tsara antsendriky fa efa matotro tsara zanakanao io ke hahavita han̈aja fotoan̈a niferanao ampiasan̈a izio ndreky hahay hifidy naman̈a fo, aviô tsy hizaha raha ratsy foeky.

•   Misy fan̈azavan̈a fan̈ampiny amy lahatsoratra “Tokony Hampiasa Tambazotran-tserasera ve ny Zanako?” ndreky “Ampianaro ny Zanakao mba ho Voaro Rehefa Mampiasa Tambazotran-tserasera.”

 “Ampiasà amy fomba tsara fotoan̈anarô.”​—Efesianina 5:16.

 Izikoa anao man̈ambela zanakanao hampiasa tambazotran-tserasera, man̈apitraha fitsipiky, aviô hazavà aminany nan̈ino fitsipiky aby io miaro izy. Aza varian̈a loatra izikoa hitanao fa nisy raha niova amy zanakanao, fôtony zen̈y hahaizanao fa tôkony mila feranao fotoan̈a ampiasany izio.

•   Ampiasà sarisary Mba Mahaiza Fetsifetsy Izikoa fa Mampiasa Internet! baka han̈ampian̈a zanakanao hahay nan̈ino mila feran̈a fotoan̈a ampiasan̈a tambazotran-tserasera.

 Baiboly mivolan̈a fa miain̈y amy “fotoan̈a sarotro tsy mora hatrefin̈y” atsika iziôty. (2 Timoty 3:1-5) Fa misy torohevitry man̈ampy atsika hiatriky zen̈y koa ao. Hahita listin’ny fan̈azavan̈a ara-baiboly mandilatran’ny 20 koa anao amy lahatsoratra momba aretin-tsain̈y ty.