Mbala Himpody Karaha Talohany Valan̈aretin̈y in̈y ma Fiain̈ana? Akory Han̈ampiany Baiboly Atsika Hiatriky Fivoany Fiain̈ana Nazony Valan̈aretin̈y in̈y?
“Tiantsika hiova karaha talohany valan̈aretin̈y in̈y fiain̈ana.”—Angela Merkel, Chancelier aliman.
Nata mbala tsy afaka valan̈aretin̈y COVID-19, anao mety hitovy hevitry amy raha volan̈iny man̈angy io. Fa karakory ma fiain̈ana “karaha taloha” io? Ino ma raha tianolo hatao izikoa mimpody karaha taloha fiain̈ana?
Himpody amy fiain̈ana taloha. Olo sasany efa tihiaroaro aminolo, hahazo hitolon̈o olo ndreky hangala tan̈ananolo. Tiandro koa iro mba mahavita man̈ano voiazy lavitry. Dikany fiain̈ana “karaha taloha” zen̈y amindro mandeha restoran, mizaha teatra, na raha karakaraha zen̈y, ho Dr. Anthony Fauci a.
Hankatsara fiain̈anandro. Olo sasany mivolan̈a fa nampiova fiain̈anandro ho tsara mandilatrany taloha izin̈y. Fahitandro izy, tokony tsy hisy asa mandany lera ndreky angovo eky, tsy tokony hailikiliky ndreky ampijalin̈a olo tsy manan̈a, avio tokony tsy ho hisy olo harary sain̈y eky. Karaha ty nivolan̈iny Klaus Schwab, pan̈orin̈y Fihaonambeny Toekarena Erantany: “Valan̈aretin̈y in̈y nahitantsika raha tokony hankatsarain̈a ndreky mila hivoan̈a, fa kanefa tsy nahadin̈y ela fotoan̈a tokony nan̈anaovantsika izio.”
Fa olo sasany ndraiky nahatsiaro nahainijaly fo rango nisiany valan̈aretin̈y, ke iro mieritreritry fa tsy antinain̈y himpody “karaha taloha” eky fiain̈anandro. Ohatra, maro olo nanjary tsisy asa, tsisy tany ipitrahan̈a, tsy salama, ndreky naty havan̈a. Mafy zen̈y!
Tsisy olo mahavita mivolan̈a amintsika han̈ano karakory fiain̈ana izikoa fa tsisy eky valan̈aretin̈y. (Mpitoriteny 9:11) Fa Baiboly mahavita man̈ampy atsika amy zay problemo mety miboaka, ndreky tsy han̈anten̈a fiain̈ana hiova ho tsara mare izikoa mbala izioty fo. Avio mety tsy niritriretintsika foeky fa Baiboly mikoran̈a momba fiain̈ana tsara sady tsisy raha manahiran̈a aminy amaray an̈y.
Fa ino ma raha ten̈a nahavy valan̈aretin̈y COVID-19 in̈y?
Rango efa ela be tan̈y Baiboly efa nan̈ambara fa hisy “valan̈aretin̈y” hiparitaka erantany, izikoa fa ho avy “farany rafitry donia ty.” (Lioka 21:11; Matio 24:3) Ke tsy tokony ho lany fan̈ahy atsika, fotony tanteraka raha koran̈iny Baiboly, an̈isanizen̈y ady ndreky horohorontany maventy, avio mosary.
Nan̈ino ma atsika mila mahay zen̈y? Fotony valan̈aretin̈y io ndray mety ho kirikiry, Baiboly efa nan̈ambara fa atsika izioty efa an̈atiny “fotoan̈a sarotro tsy mora hatrefin̈y.” (2 Timoty 3:1) Fahaizantsika zen̈y ahavitantsika man̈amboatra jery, ke tsy han̈anten̈a fiain̈ana ho ten̈a tsara.
Raha koran̈iny Baiboly io man̈amia atsika fan̈antinan̈a, ke na mahaisarotro isanandra fiain̈ana, tsy hahadin̈y ela izio fa mbala hiova. Hiova karakory ma izio?
Mety tsy hampoizinao fa hisy raha tsara koa hiboaka, izikoa fa tapitry valan̈aretin̈y
Baiboly tsy vitany man̈ambara tsialohaloha raha ho hisy izioty fo fa, koran̈iny ao koa fa atsika mbala man̈anten̈a fiain̈ana tsara aminy ankitin̈y. Mbala ho tsara mandilatrany raha iritriretiny fanjakan̈anolombelon̈o fa hataondro raha koran̈iny Baiboly momba ny amaray. Zan̈ahary zaraiky fo mahavita han̈ano zen̈y. Karaha ty raha koran̈iny Baiboly momba zen̈y: “Izy hamafa ranomaso jiaby amy masondro, fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy, fotony zen̈y efa kabaro taloha.”—Apokalypsy 21:4.
Zan̈ahary Jehovah b mampan̈anten̈a karaha ty: “Ivoako vao raha jiaby.” (Apokalypsy 21:5) Efa maro problemo erantany fa mbala sosoko zen̈y koa valan̈aretin̈y io. Fa Jehovah hamaha problemo jiaby zen̈y. Ty aby raha handeha hataony:
Olo jiaby ho salama vatan̈a ndreky ho salama sain̈y, avio aretin̈y ndreky fahafatesan̈a tsy ho hisy eky.—Isaia 25:8; 33:24.
Olo jiaby hanan̈a asa ten̈a tsara, fa tsy karaha asa izioty mandany fotoan̈a ndreky mandreraka sain̈y io.—Isaia 65:22, 23.
Olo jiaby samy hanan̈a raha ten̈a ilain̈a amy fiain̈ana, fa tsisy eky olo masikiny ndreky mosary.—Salamo 72:12, 13; 145:16.
Ho janga karazan̈a aretimpô ndreky aretintsain̈y jiaby vokatrany raha niain̈anao taloha. Iro havanao jiaby efa naty aby in̈y mbala hivilomin̈y.—Isaia 65:17; Asan’ny Apostoly 24:15.
Nan̈ino man̈ampy atsika fahaizantsika zen̈y? Baiboly mivolan̈a: “Fan̈antinan̈a anan̈antsika zen̈y vatofantsikiny ain̈intsika.” (Hebreo 6:19) Loso tsy kivy atsika fotony manan̈a fan̈antinan̈a. Vitantsika koa miatriky problemo iain̈antsika izioty. Atsika koa tsy hiasaloha be loatra fa hilamintsain̈y ndreky ho ravoravo fo.
Ke izio ma ten̈a atokisan̈a raha koran̈iny Baiboly io? Zahava lahatsoratra “Milaza ny Marina Foana ny Baiboly.”
Toro lalan̈any Baiboly han̈ampy anao hiatriky fiain̈ana afarany valan̈aretin̈y
Valera fahin̈ana
Andininy: ‘Fahendrena io miaro ain̈inolo manan̈a izy.’—Mpitoriteny 7:12.
Karakory ma zen̈y? Man̈anaova raha han̈ampy anao tsy ho mora idirany aretin̈y io. Diniha akory mahavy aretin̈y io hiparitaka mare amy tany misy anaro. Avio iritrireta ino aby toromariky momba fitandreman̈a fahasalaman̈a, firy olo avoanizio, avio firy olo vita vaksiny tanteraka.
Mitandrema fo
Andininy: “Olo hendry mitandrin̈y tsara ke tsy man̈ano raha ratsy, fa olo adala ndraiky tsy mijery zen̈y foeky sady matoky ten̈a loatra.”—Ohabolana 14:16.
Karakory ma zen̈y? Tandrema tsarabe fo fahasalaman̈anao. Maro manampahizan̈a mivolan̈a fa mety mbala tsy ho afaka atoato virisy io.
Fan̈azavan̈a azo antoko fo areha
Andininy: “Olo mora fitahin̈y, mino zay raha volan̈inolo aminany; fa olo mitandrin̈y ndraiky mandiniky tsarabe isaka izy han̈ano raha.”—Ohabolana 14:15.
Karakory ma zen̈y? Fidiana tsarabe torohevitry harehanao. Ten̈a ilain̈a man̈ano zen̈y fotony ho robaka fahasalaman̈anao izikoa tsy azo antoko fan̈azavan̈a io.
Raha tsara fo ataova an̈aty jery
Andininy: “Aza mivolan̈a: ‘Nan̈ino ma raha taloha tsara mandilatra amy zioty?’ Fotony tsy fahendrena an̈ontanianao zen̈y.”—Mpitoriteny 7:10.
Karakory ma zen̈y? Zay raha mety ho vitanao fo ataova fa aza man̈inofinofy fiain̈ananao, tamy valan̈aretin̈y io mbala tsisy. Avio anao aza malahelo izikoa misy raha nanjary tsy vitanao fotony iô aretin̈y io.
Aboaha fa anao man̈aja olo
Andininy: ‘Hajà karazan̈olo jiaby.’—1 Petera 2:17.
Karakory ma zen̈y? Samby isany raha ataonolo izikoa fa misy valan̈aretin̈y ndreky vokatranizio aminolo tsiaraikiaraiky. Ke hajà fo hevitrinolo ndray anao tsy hiova amy fanapahankevitry tsara efa nataonao. Hajà olo hafa tsy vita vaksiny, olo matoe, olo marary fatatra.
Manàn̈a faharetan̈a
Andininy: “Fitiavan̈a io maharidraha.”—1 Korintianina 13:4.
Karakory ma zen̈y? Ndraikindraiky anao mety ho tojy olo hivolan̈a fa mavozo iro himpody amy raha fataondro talohany valan̈aretin̈y io. Izikoa zen̈y, aboaha fa anao tsara fan̈ahy aminany. Mety efa tihan̈ano raha sasany anao fotony efa tsy dia maro eky olo tatrany virisy io, avio efa maro koa raha mety hatao. Kanefa manàn̈a faharetan̈a izikoa anao efa han̈ano raha aby zen̈y.
Akory han̈ampiany Baiboly atsika hiatriky valan̈aretin̈y?
Baiboly mampan̈anten̈a raha tsara maro aminy hoavy. Ten̈a mankahery Vavolombelon̈o Jehovah raha aby zen̈y. Man̈ampy iro tsy hifantoko amy valan̈aretin̈y misy amy zioty raha zen̈y. Mifan̈ampy fo koa iro, ke arehandro fo lalàn̈any Zan̈ahary amy Baiboly ao man̈iraka iro hivory tsy tapaka. (Hebreo 10:24, 25) Mampiasa vidéoconference iro koa mivory, ke olo jiaby afaka man̈aton̈o izio.
Misy olo nivolan̈a fa ten̈a nan̈ampy iro hiatriky raha manahiran̈a vokatrany valan̈aretin̈y fivorian̈a miaraka amy Vavolombelon̈o Jehovah. Nisy man̈angy araiky avoany COVID-19 nitahôminy Vavolombelon̈o Jehovah araiky han̈aton̈o fivorian̈a. Nivolan̈a izy fa nan̈ampy izy tsy ho rivan̈a iro fivorian̈a aby io ndray nahairatsy fahasalaman̈anany. Karaha ty nambarany tafara tatỳ: “Hitako tsarabe fa anaro ten̈a efa mira lafamỳ. Nan̈ampy zaho tsy hitotoko fa hilamintsain̈y fo koa mamaky Baiboly. Manjary tsy mifantoko amy problemonaka zaho fa amy raha ho avy. Mankasitraka anaro zaho fotony anaro nan̈ampy zaho hihavan̈a amy Zan̈ahary. Letrizay, efa zen̈y edy ny raha niriko.”
