An̈isany problemo erantany fanjakan̈a man̈ano aferafera io. Ten̈a ratsy vokatranizio. a Ohatra, tan̈atiny COVID-19 ty, nisy manampahifan̈a maromaro zen̈y nan̈odikodin̈y vola efa natao hiadivan̈a amy valan̈aretin̈y io. Tiho pan̈arivo fo nahavy iro nan̈ano zen̈y. Baka amy raha nataondro zen̈y nahavy olo maro nanjary tsy nahazo fitahan̈a nilaindro, ke maro olo manjary mijaly ndreky naty.

 Maro mare raha ratsy indesiny aferafera ataony fanjakan̈a io. Karaha ty nikoran̈iny David Cameron, praiminisitra taloha ta Royaume-Uni tan̈y: “Aferafera io karaha tran̈omparoratra maventy in̈y, ke firenena jiaby voafandriky an̈atinizio ao.”

 Mety matoky atsika fa hely tavela, efa tsy ho hisy eky karazan̈a aferafera jiaby. Fotony nan̈ino? Zahava baka raha handeha hataony Zan̈ahary, koran̈iny Baiboly ao.

 Karaha ty koran̈iny Baiboly momba Zan̈ahary: “Zaho Jehovah, zaho tia raha amy rariny, halako olo mandrava ndreky tsy tia fahamarin̈ana.” b (Isaia 61:8) Hitany Zan̈ahary iro olo mijaly baka aminy aferafera ataonolo. (Ohabolana 14:31) Izy mampan̈anten̈a karaha ty: “Fotony olo efa mijaly mbala man̈ody ampijalin̈y fo, ... Zaho hitsangana ke han̈ano raha.”​—Salamo 12:5.

 Ke ino raha handeha hataony Zan̈ahary? Izy tsy hitatahy fanjakan̈a misy amy zioty io fa hisoloany Fanjakan̈anany andan̈itry an̈y foeky izio. “Fanjakan̈any Zan̈ahary” ikahian̈a izio. (Marka 1:14, 15; Matio 6:10) Karaha ty koran̈iny Baiboly: “Zan̈ahariny lan̈itry hanangana fanjakan̈a tsy ho ravan̈a mandrakizay, baka io fanjakan̈a io tsy ho azonolo hafa. Izio hanorotoro ndreky han̈afoan̈a fanjakan̈a jiaby io, ke izio zaraiky fo ho tavela mandrakizay.” (Daniela 2:44) Karaha zen̈y raha hataony Zan̈ahary han̈afoan̈ana aferafera jiaby hitantsika amy zioty.

 Akory hahaizantsika fa tsy man̈ano aferafera Fanjakan̈any Zan̈ahary? Diniha baka ty.

1.  1. Fahifan̈a. Zan̈ahary Farany Mahery man̈amia fahifan̈a Fanjakan̈a io.​—Apokalypsy 11:15.

    Nan̈ino ma raha zen̈y ten̈a maventy? Fanjakan̈anolombelon̈o mitavandra vola baka amy vahoaka fo baka asandro mandeha tsarabe. Io amy zay raha matetiky araraotinolo han̈anaovan̈a aferafera ndreky halatra avio katramo. Fa Fanjakan̈any Zan̈ahary tsy mira zen̈y foeky, fotony Zan̈ahary Farany Mahery manohan̈a izio. Ke izio hahavita han̈amia raha ilainy vahoakanany fo.​—Salamo 145:16.

2.  2. Pitondra. Jesosy Kristy nifidiny Zan̈ahary hatao Pitondra amy Fanjakan̈a io.​—Daniela 7:13, 14.

    Nan̈ino ma raha zen̈y ten̈a raha maventy? Fotony nata misy pitondra araiky tsara fan̈ahy, mbala ho voantsorinolo han̈ano raha tsy mety fo izy. (Mpitoriteny 7:20) Jesosy ndraiky tsy karaha zen̈y. Naboakany taminizy tambony tany teto fa izy tsy man̈eky han̈anaovan̈a aferafera foeky. (Matio 4:8-11) Izy ten̈a tia vahoakanany ndreky mitady raha hahatsara iro. Ke isaka misy raha tiany hatao, fitiavan̈a io fo mandrisiky izy han̈ano zen̈y.​—Salamo 72:12-14.

3.  3. Lalàn̈a. Tsisy tsin̈iny foeky lalàn̈any Fanjakan̈any Zan̈ahary io sady tsy mampijaly olo foeky.​—Salamo 19:7, 8.

    Nan̈ino ma raha zen̈y ten̈a maventy? Lalàn̈any olombelon̈o baka matetiky sarotro mare, mavesatra, sady tsy arehan̈a tsarabe, ke maro olo voantsory han̈ano aferafera koa. Lalàn̈any Zan̈ahary ndraiky tsy sarotro mare karaha zen̈y, avio vitanolo tsarabe man̈araka izy. Mahazo hatsaran̈a koa lan̈iany olo man̈araka izio. (Isaia 48:17, 18) Ankoatranizen̈y koa, tsisy raha ataonolo fo avoakasiky amy lalàn̈a aby io fa antony mahavy izy man̈ano raha koa. (Matio 22:37, 39) Zan̈ahary koa mahita ny ampônolo. Ke izy koa fa man̈araka iro raha takiny lalàn̈a aby io, izy mitsinjo raha an̈atiny fônolo ndreky raha iain̈andro fo.​—Jeremia 17:10.

 Mandrisiky anao zahay hianatra raha maro momba fampan̈antinan̈any Baiboly momba ny amaray, han̈adoso aferafera io.

•   Izikoa anao tihahay antony telo hafa mahavy Fanjakan̈any Zan̈ahary tsy han̈ano aferafera foeky, vakia lahatsoratra “Tsy Manao Kolikoly ny Fanjakan’Andriamanitra.”

•   Zahava video Karakory ma Fanjakan̈any Zan̈ahary Zen̈y? hahaizanao raha maro mikasiky Fanjakan̈any Zan̈ahary io ndraiky raha handeha hataonizio amy tany ty.

•   Mandrisiky anao zahay hianatra Baiboly aminay, baka ho hitanao akory hazahoan̈a hatsaran̈a baka amy raha ampan̈antinainy Baiboly.