AZA VOLY MIAMBIN̈Y!
Pitsoaponenan̈a a Ukraine—Antapitrisany Olo Milefa
Tamy 24 Fevrie 2022, maramilany Russie nanomboko nanafiky Ukraine. Vokany, olo antapitrisany nanjary sahiran̈a mare sady atahoran̈a hofoatiny ady io, ke iro voatery niala nalaky tamy tanàna io. a
“Naro bomby nipoaka taminio. Nampavozo mare raha io, ke tsy hainay foeky fomba hivolan̈ana tahotronay taminio. Zahay amy zay koa fa naharen̈y fa misy “train” mitondra olo hiala tan̈y, zahay nanapakevitry hiala tan̈y. Tsisy raha tondranay eky tamizio, fotony tsy nindesindro koa tsy pake hely fo isaka olo: Taratasy ten̈a miasa, aody, rano ndreky haninkanin̈y fo raha nindesinay. An̈atiny bomby mipoaka man̈odidin̈y zahay in̈y zahay niala rahanay jiaby, nandeha tamy garandamasiny tan̈y.”—Nataliia, baka a Kharkiv, a Ukraine.
“Efa hely tsy haviany ady io zahay vo nino fa hisy ady ankitin̈y. Nisy raha nan̈ena mare ren̈iko farifary amy tanàna nisy zahay, avio lafenetranaka nihozonkozon̈o. Zaho direkty tapakevitry hilefa, ke zay raha ten̈a nilaiko fo nindesiko. Taminy 8:00 maraindrain̈y zaho niala tran̈o, niondran̈a “train” nandeha ta Lviv, avio nangala bisy nandeha ta Pologne.”—Nadija, baka a Kharkiv, a Ukraine.
Ho hitanao amy lahatsoratra ty
Ino ten̈a antony mampisy olo pitsoaponenan̈a io?
Izikoa zahan̈a tsotra raha misy a Ukraine io, baka amy fan̈afihany Russie tanàna io nampisy izio. Fa kanefa Baiboly man̈ambara ten̈a antony mampisy pitsoaponenan̈a karaha araiky io:
Fitondrasan̈anolombelon̈o erantany tsy mahavita man̈amia raha jiaby ilainy vahoakandro. Iro olo amy fitondrasan̈a iô matetiky mampiasa fahifan̈a anan̈andro ampijalian̈a olo indesindro.—Mpitoriteny 4:1; 8:9.
Satan Devoly “pitondra donia ty,” mandrosoko olo han̈ano ny ratsy. Karaha ty koran̈iny Baiboly momba zen̈y: “Donia misy atsika ty ndraiky ambany fahifan̈any araiky ratsy in̈y.”—Jaona 14:30; 1 Jaona 5:19
Ankoatraniro raha manahiran̈a maro tsy voavaha tan̈atiny anjatony taon̈o, atsika izioty koa miain̈y amy fotoan̈a efa nambarany Baiboly rango efa ela ty: “Aminy andra farany an̈y, hisy fotoan̈a sarotro tsy mora hatrefin̈y.” (2 Timoty 3:1) Mampiavaka andra farany io fisiany ady, antambo, mosary, ndreky valan̈aretin̈y, ke mahavy olo maro voatery miala tany misy iro.—Lioka 21:10, 11.
Aia ahitandro pitsoaponenan̈a aby io ten̈a fan̈antinan̈a?
Baiboly man̈ambara fa Jehovah b, Zan̈ahary niasa atsika io Zan̈ahary mahinakinaka pitsoaponenan̈a ndreky iro olo voatery tsy maintsy niala tran̈ondro. (Deoteronomia 10:18) Izy nampan̈anten̈a fa hamaha olan̈a zen̈y, ke Fanjakan̈anany andan̈itry an̈y, na Fanjakan̈any Zan̈ahary koa ikahian̈a izio, hampiasainy han̈ano zen̈y. Izio handeha hisolo fanjakan̈anolombelon̈o jiaby. (Daniela 2:44; Matio 6:10) Jehovah hampiasa Fanjakan̈anany io han̈adoso Satana Devoly. (Romanina 16:20) Fanjakan̈any Zan̈ahary io amy zay hitondra tany jiaby, ke efa tsisy eky amy zen̈y sisintany mampisaraka firenena. Olo jiaby erantany amy zen̈y hanjary fianakavian̈a araiky. Efa tsisy olo eky handeha hilefa hiala tran̈onany, fotony Baiboly efa nampan̈anten̈a karaha ty: “Ke iro samy hipetraka ambaniny rezaindro ndreky aviavindro, baka io tsisy raha hampavozo iro, fotony vavany Jehovah tompiny tafiky nivolan̈a zen̈y.”—Mika 4:4.
Efa Fanjakan̈any Zan̈ahary zaraiky fo vahaolan̈a maharitry amy fisiany pitsoaponenan̈a misy amy zioty io. Hampiasa Fanjakan̈anany io Jehovah han̈adosoan̈a raha mahavy olo hanjary pitsoaponenan̈a. Ty sasany amy zen̈y:
Ady. “[Jehovah] mampijanon̈o ady amy tany jiaby.” (Salamo 46:9) Izikoa tianao hay karakory hataony Zan̈ahary han̈afoan̈a ady, vakia lahatsoratra “Ahoana no Hampisy Fiadanana etỳ An-tany?”
Jaly ndreky olo kafiry. “[Jehovah] han̈avotro ain̈indro amy raha mampijaly iro ndreky han̈avotro iro aminolo kafiry iro.” (Salamo 72:14) Izikoa tianao hay ino raha mety han̈ampy olo araiky hiala amy toetry ratsy efa nanan̈any rango ela, vakia lahatsoratra mifampitohy, titranany “Afaka ny Hifankatia ve ny Olona Mifankahala?”
Fahantran̈a. “[Jehovah] hamonjy masikiny mitarain̈y ndreky mangataka vonjy.” (Salamo 72:12) Baka ho hitanao karakory hataony Zan̈ahary han̈adoso fototro mahavy olo masikiny io, vakia lahatsoratra “Mbola Hihatsara ve ny Fiainana Amin’ny Hoavy?”
Mosary. “Hahavokatra be tany.” (Salamo 72:16) Akory hataony Zan̈ahary tsy hampisy mosary zen̈y eky? Vakia lahatsoratra “Ho Foana ve ny Hanoanana?”
Baiboly ma afaka man̈ampy iro pitsoaponenan̈a aby io izioty?
Ia. Baiboly man̈amia fan̈antinan̈a azo antoko nindro pitsoaponenan̈a aby io, sady izio koa mahavita man̈ampy iro hiatriky izio rango izioty.
Toro lalan̈any Baiboly: “Olo mbala tsy nandia fiain̈ana mino zay raha volan̈inolo, fa olo misy jery ndraiky mandiniky dianany tsiaraikiaraiky.”—Ohabolana 14:15.
Dikany: Sakavy diniha ino raha sarotro mare mety ho tojy anao ndreky akory hiarovanao ain̈inao. Mila mahimahin̈y fo anao tsao misy olo ratsy jery sady kafiry mitady han̈araraotro anao, fotony haindro baka fa olo pitsoaponenan̈a zen̈y tsy zatra tany misy iro sady tsisy piaro.
Toro lalan̈any Baiboly: “Ke atsika koa fa misy hanin̈y ndreky lamba sikinin̈y, efa mahampy edy zen̈y.”—1 Timoty 6:8.
Dikany: Aza mampandry jery amy fanan̈ana. Mahaiza afapo amy raha ten̈a ilainao. Hahatsiaro sambatra anao izikoa man̈ano zen̈y.
Toro lalan̈any Baiboly: “Ke zay raha tianaro hataonolo aminaro, mba ataova amindro koa.”—Matio 7:12.
Dikany: Mifen̈a haharidraha ndreky ho tsara fan̈ahy. Izikoa karaha zen̈y toetrinao, ho moramora aminolo amy tany hifindranao an̈y han̈aja anao ndreky handray anao.
Toro lalan̈any Baiboly: “Na azovy nan̈ano ratsy taminaro na azovy, aza mamaly faty.”—Romanina 12:17.
Dikany: Baka tsy hankasarodraha, izikoa misy olo mampijaly anao, aza man̈eky resiny heloko, fotony raha zen̈y hahavy anao tihamaly faty.
Toro lalan̈any Baiboly: “Baka aminy araiky man̈amia angovo zaho in̈y mahavy zaho manan̈a angovo hindesin̈y hiatriky karazandraha jiaby.”—Filipianina 4:13.
Dikany: Zan̈ahary fo ataova voanalohany amy fiain̈ananao, avio mivavaha aminany. Izy mahavita man̈amia angovo ahavitanao miaritry.
Toro lalan̈any Baiboly: ‘Aza miasaloha anaro, na aminino zen̈y na aminino, fa amy raha jiaby, koràn̈a amy Zan̈ahary fo raha tianaro hangatahin̈y, amy vavaka ndreky fangatahan̈a mare ndreky fankasitrahan̈a izy. Fiadanan̈a Zan̈ahary, bebeny eritreritry jiaby, hiambin̈y fonaro ndreky sain̈inaro.’—Filipianina 4:6, 7.
Dikany: Ndray ino ndray ino raha mavoa anao, mivavaha amy Zan̈ahary. Hangataha izy han̈ampy anao hilamintsain̈y fo. Zahava lahatsoratra ty: “Filipianina 4:6, 7: ‘Aza Manahy na Inona na Inona.’”
a Kiakany andrany nan̈afihan̈a io, Vaomieran’ny Firenena Mikambana Mikarakara ny Mpitsoa-ponenana nivolan̈a fa raha mandalo an̈y io problemo farany maventy mila alamin̈y farany malaky. Mbala tan̈atiny 12 andra fo baka, efa mandilatrany aroe tapitrisa olo nilefa niala ta Ukraine. Iro nifindra amy tanàna tsy lavitry tio. Fa mbala misy olo araiky tapitrisa koa tsy maintsy niala tran̈ondro ke loso nilefa amy faritry hafa a Ukraine an̈y.
b Jehovah an̈aran̈any Zan̈ahary. (Salamo 83:18) Zahava lahatsoratra “Azovy ma Jehovah?”
Mety ho Tianao Koa
Russie Manafiky Ukraine—Tanteraka ma Faminanian̈a amy Baiboly?
Zahava ato ino dikany raha mandalo io.
FAMPIANARAN̈A FOTOTRO AMY BAIBOLY
Karakory ma Fanjakan̈any Zan̈ahary Zen̈y?
Tamy Jesosy tambony tany teto, raha momba Fanjakan̈any Zan̈ahary io raha ten̈a nampianariny. Rango efa ela, pianatranany mivavaka haviany Fanjakan̈a io.
FAN̈ONTANIAN̈A VALIANY BAIBOLY
Tany ty ma Mbala ho Potiky?
Ho gaga anao koa mahita raha koran̈iny Baiboly.
RAHA AMPIANARINY BAIBOLY
Man̈ohara Mianatra Baiboly Aminay
Mangalà fianaran̈a Baiboly miaraka amy fan̈azavan̈a araikiaraiky momba fan̈anaovan̈a izio.
