Amy tany maro, maro olo sahiran̈a fôtony mahaimanonga vidim-piain̈ana, an̈isan’izen̈y Vavolombelon̈on’i Jehovah. Fa ndray zen̈y, irô tsy miasaloha dila loatra fôtony haindrô fa ‘tsisy andra Jehovah han̈ary’ mpanomponany. (Hebreo 13:5) Efa impirimpiry Jehovah nitana volan̈anany zen̈y. Ohatra amy zen̈y ta Philippines. Ankamaraozan’olo an̈y masikiny. Niatriky prôblemo mare olo tan̈y tamindrô taon̈o 1970 ndreky 1980 tan̈y.

 Karaha ty ho ranabavy araiky kahian̈a Vicky: a “Nisy fotoan̈a zaho nitomoan̈y fôtony zaho tsy ampy hanin̈y. Ndraikindraiky taminay tao tsisy raha izikoa tsy vary, sira ndreky rano fo.” Sahiran̈a nitsakaraka asa koa rahalahy araiky kahian̈a Florencio, fa tsy nety nahita. Ho izy: “Semizy telo ndreky patalôn̈o telo fo nanan̈ako. Irô io fo nisolosoloako lera zaho nandeha nivory na nan̈atriky fivoriambe.” Akôry nataon’ny vahoakan’i Jehovah tamy fotoan̈a zen̈y? Ino raha nan̈ampy irô tsy hivadiky tamy Jehovah? Baka iô, nan̈ino môdelindrô afaka man̈ampy atsika lera miova fiain̈anantsika?

 Tan̈atin’ny fotoan̈a sarotro be io, irô Vavolombelon̈on’i Jehovah ta Philippines tan̈y natoky fa Jehovah han̈amia raha ilaindrô. (Hebreo 13:6) Ary zen̈y ankitin̈y raha nataony. Matetiky tsy nampoizin̈y foeky fomba nan̈ampiany irô. Karaha ty, ohatra, raha nikoran̈in’ny ranabavy Cecille: “Vary kapoaka araiky fo tavela taminay tao, ke izy in̈y nataonay hanin̈y maraindrain̈y. Zahay efatra mianaka baka tiô nivavaka tamy Jehovah baka zahay hampiany hahazo raha ilainay tamin’ny andra io. Zahay mbala tampihinanan̈a, tiô fo nisy rahalahy araiky navy salakady nitondra vary dimy kilô. Latsaka ranomasonay fôtony zahay ravoravo loatra ndreky nankasitraka raha namian’i Jehovah zahay. Mbala nisy fomba maro hafa koa nan̈ampian’i Jehovah zahay.”

 Vahoakan’ny Zan̈ahary koa nan̈araka torohevitry feno fahendrena an̈atin’ny Baiboly. (Ohabolana 2:6, 7) Karaha zen̈y ohatra ranabavy araiky vo vita batisa, Arcelita an̈aranany. Izy tamy fotoan̈a zen̈y mbala tsy nanambady ke tsy nora taminany namelonten̈a. Nikoran̈iny tamy Jehovah raha tan̈atin’ny fônany. Baka iô, izy nisaintsain̈y raha koran̈iny Ohabolana 10:4. Andininy io mivolan̈a karaha ty: ‘Tan̈an’olo kamo mahavy izy ho masikiny, fa tan̈an’olo mazoto ndraiky mahavy izy ho mpan̈arivo.’ Tiany arehan̈a raha koran̈in’ny andininy io ke izy namboly. Karaha ty nambarany: “Nitahin’i Jehovah ankitin̈y ezakanaka. Namokatra tsabonaka ke nahampy zaho. Sasany nahaniko fa sasany nalafoko nataoko fray.”

 Mpiara-manompo aby io tsy ampy vola ividianan̈a tany ndreky han̈amboaran̈a Tran̈o Fivorian̈a. Ndray zen̈y, irô tsy kivy fa mbala nivory ndreky nifankahery fo, eraka raha nandidian̈a atsika. (Hebreo 10:24, 25) Irô niain̈y nifan̈araka tamy raha nisy tamindrô. Ho ranabavy Deborah: “Kadiriny tsiôta tiô zahay niaraka nivory tamy tran̈o hely namboarinay roen’ny mpisava lalan̈a namako zay. Zahay nangala ravin’ny karazan̈a palmie nataonay tafo, aviô ravin’ny vanio nataonay riba, baka iô vatan’ny palmie nataonay sezy.”

 Matetiky natao tan-tran̈on’ny mpiara-manompo koa fivorian̈a. Ho ranabavy Virginia: “Tran̈onay tran̈o valiha tafo bozaka sady hely. Isaka sabotsy, tsy maintsy nakisakisakanay entan̈anay, amy zen̈y amarain’izin̈y efa malalaka tsara an̈anaovan̈a fivorian̈a.” Nitete tafon’ny tran̈o araiky nan̈anaovan̈a fivorian̈a. Ho rahalahy Noel: “Koa fa latsaka mahalen̈y, zahay nangala siô nitantesan̈a rano. Fa tsy azonay onon̈o aby prôblemo madiniky aby zen̈y fôtony zahay niaraka tamy rahalahy ndreky ranabavinay.”

 Nata irô masikiny, zen̈y tsy nataondrô hampihen̈y hafanam-pondrô tamy fanompoan̈a. Karaha ty nitantarain’i Lindina mipetraka amy nôsy Negros: “Zahay maro an-tran̈o. Papako fo olo niasa, ke matetiky zahay tsisy vola natao fray. Tsy maintsy nandeha vity zahay firaka tamy faritany. Fa zahay jiaby niaraka ke zahay ravoravo fo. Hainay koa fa namparavoravo Jehovah ezakanay.”

 An̈isany raha ten̈a sarotro koa nandeha nitory tamy faritany mitaokan̈a salakady maro bongo. Vitsy na tsisy foeky baka tômôbily man̈an̈y. Karaha ty nitantarain’i Esther mipetraka amy nôsy Luzon: “Tsiota firaka folo aroe amby tiô isanay. Bônera zahay fa nandeha fôtony mandeha kilômaitara maro lalan̈a himboanay. Nitory fo zahay parapitsifaoran’ny andra. Zahay nitondra hanin̈y masaka, aviô tambanin’ny vodindraha zahay nihina. Nisy mpiara-manompo sasany tsisy hanin̈y fa irô navy fo. Ho zahay tamindrô: ‘Aza miasaloha fa mahampy atsika hanin̈y nindesinay ato.’”

 Nitahin’i Jehovah fahafoizan-ten̈andrô mpiara-manompo aby io. Ohatra, tamin’ny 1970, nisy 54 789 mpitory ta Philippines. Fa tamin’ny 1989, nitombo tsy ela tsy ho indroen’izen̈y irô ke nahataka 102 487. Tamin’ny 2023, nisy 253 876 mpitory vaovao tsara ta Philippines.

 Mpiara-manompo aby io nata sahiran̈a ara-bola, irô ravoravo ndreky nazoto tamy fanompoan̈a fo. Karaha ty ho rahalahy Antonio: “Tsy fisian̈a tsy manakan̈a atsika tsy ho tia Jehovah.” Ho koa ranabavy Fe Abad: “Zahay roen’ny vadiko koa fa sahiran̈a ara-bola, zahay tsy miala Jehovah fa vo may man̈aton̈o izy fo, aviô ataonay tsotra fo fiain̈ananay ke zahay ravoravo fo. Ke vokany, nianatra natoky Jehovah koa zanakanay.”

 Ho Lucila mipetraka amy Nôsy Samar: “Anten̈a ndray masikiny, fa zen̈y tsy prôblemo izikoa anten̈a manompo Jehovah. Izikoa raha momba Zan̈ahary ataontsika amy plasy voanalohany, atsika ho afa-pô ndreky hanan̈a toe-tsain̈y tsara fo. Ravoravo mare zaho mahita mpianatra Baibolinaka lôso mahay Jehovah ndreky lôso miaraka aminaka man̈ano asan’ny mpisava lalan̈a.”

 Haintsika fa amaray afaka amaray an̈y, atsika jiaby tsy maintsy mbala handia raha sarotro. Ke tsara alaintsika onon̈o fo raha nisoratin’ny anti-pan̈ahy araiky kahian̈a Rodolfo ty: “Ten̈a sarotro raha niain̈anay tamin’ny 1970 ndreky 1980 tan̈y. Fa tamy zin̈y tsapako fa Jehovah tia zaho sady nanohan̈a zaho. Nata hely fo vola taminaka, zaho tsy nahatsiaro nijaly loatra. Jehovah baka nikarakara zaho. Nahatsiaro sambatra mare zaho. Efa tsy din̈iko koa hahita ‘ten̈a fiain̈ana’ miambin̈y atsika amy Paradisa.”​—1 Timoty 6:19.