IANARA TANTARANTSIKA
Maro Olo Erantany Ampianarin̈y Mamaky Teny Ndreky Manoratra
Karaha ty raha nivolan̈iny Agostinho baka a Brezily: “Zaho tombo tamy tany fambolian̈a araiky zay, baka io zahay masikiny oe. Ke zaho tsy maintsy niala lekoly, baka io nitady asa, amy zen̈y zaho afaka man̈ampy fianakavian̈anaka.” Agostinho efa 33 taon̈o vo nahay namaky teny ndreky nanoratra. Ty nambarany: “Nanjary nahatsiaro nisy dikany zaho koa fa nahay namaky teny ndreky nanoratra.”
Efa misy olo mandilatrany 250 000 nampianariny Vavolombelon̈o Jehovah namaky teny ndreky nanoratra, tan̈atiny 70 taon̈o loso zay, an̈isanizen̈y Agostinho. Nan̈ino ma iro man̈ano zen̈y? Ino hatsaran̈a azonolo aby io amy fampianaran̈a iro io?
Tsy mora mianatra raha koa tsy mahay taratasy
Taminy 1935, Vavolombelon̈o Jehovah nitory tamy firenena mandeha 115. Misionera aby io koa fa nitory taminolo nampiasa volan̈a samihafa, iro nandefa kabaro baka amy Baiboly efa nalain̈a feo, tamy volan̈anolo nikoran̈andro io, na iro nan̈amia iro boky tamy volan̈andro. Maro mare olo lian̈a tamy Baiboly, kanefa ten̈a tsy nora taminy ankamarozandro nianatra Baiboly. Iro baka tsy nahay namaky teny ndreky nanoratra.
Iro olo aby io tsy afaka namaky Baiboly, ke sarotro tamindro nampihatra toro lalan̈a an̈aty ao. (Josoa 1:8; Salamo 1:2, 3) Nanjary tsy nahavita andraikitry tokony hataony Kristianin̈y iro. Ohatra ziô, nisy raimandreny tsy nahay namaky teny, ke sarotro tamindro nampianatra Baiboly zanakandro. (Deoteronomia 6:6, 7) Iro pitory vaovao aby io koa tsy dia afaka nampiasa Baiboly koa fa nampianatra, fotony iro tsy nahay namaky teny.
Nisy ezaka manokan̈a natao han̈ampian̈a olo tsy mahay taratasy aby io
Kadiriny taminy 1940 ndreky 1950 tan̈y, Nathan Knorr ndreky Milton Henschel an̈isany nitariky asany Vavolombelon̈o Jehovah. Iro nitety tany maro baka handaminan̈a asa fitorian̈a. Tamy tany sasany, maro olo tsy nahay taratasy. Ke birôny sampan̈a tamy tany aby io nampirisihindro handamin̈y kilasy fianaran̈a mamaky teny ndreky manoratra, tamy fiangonan̈a.
Naboaka tamy fivoriambe taminy 1954 bokikely fianaran̈a mamaky teny amy volan̈a cinyanja, ta Chingola, a Zambie an̈y.
Birôny sampan̈a nan̈amia toromariky fiangonan̈a amy fomba tokony han̈anaovan̈a fianaran̈a io. Tamy tany sasany, efa nisy fomba fampianaran̈a ndreky boky fampiasain̈a koa fa mampianatra olo, ke in̈y fo nampiasaindro Vavolombelon̈o Jehovah tan̈y. Ohatra, namiany fanjakan̈a boky ndreky fitaovan̈a sampan̈any Brezily, ke in̈y fo amy zay nalefa tamy fiangonan̈a. Fa tamy tany hafa ndraiky, iro Vavolombelon̈o Jehovah aby io foeky nitady fomba fampianaran̈a olo.
Kilasy io natao ninolo jiaby, na lelahy izy, na man̈angy, na tsaiky, na matoe. Tanjon̈o tamy zen̈y han̈ampy iro hahay hamaky volan̈andro. Ke ndraikindraiky, nanjary nisy volan̈a maromaro nampianarin̈y tamy fiangonan̈a araiky.
Nahatsara olo fianaran̈a io
Ino hatsaran̈a nazonolo baka tamy fianaran̈a io? Misy Vavolombelon̈o Jehovah araiky a Meksiky nivolan̈a karaha ty: “Manjary azoko tsara zioty raha koran̈iny Baiboly, ke manohin̈y fonaka. Rango nahaizako mamaky teny, zaho nanjary nasaky nitory taminolo, ke nahainaro fo olo nikoran̈ako raha momba Baiboly.”
Mbala misy hatsaran̈a hafa koa nazonolo nampianarin̈y io, ankoatranizio man̈ampy iro hahay raha koran̈iny Baiboly. Karaha ty ho Isaac, baka a Burundi an̈y: “Zaho koa fa nahay namaky teny ndreky nanoratra, nanjary afaka nianatra raha momba fan̈amboaran̈a tran̈o. Ke zaho nanjary pan̈amboatra tran̈o. Asanaka ziô pan̈aramaso izikoa fa misy tetikasa maventy atao.”
Fampianaran̈a volan̈a chichewa taminy 2014 tamy Tran̈o Fivorian̈a a Lilongwe, a Malawi
I Jesusa efa 49 taon̈o vo nanomboko nianatra namaky teny ndreky nanoratra. Ty raha nambarany: “Zaho mikarakara tokantran̈o, ke mila mizaha vidindraha ndreky an̈arandraha alafo a bazary an̈y. Raha zen̈y ten̈a tsy nora taminaka taloha. Nakiry izy nisy kilasy fianaran̈a in̈y. Zaho ziô matoky ten̈a koa fa mandeha bazary.”
Efa taon̈o taon̈o manampahifan̈a baka amy tany maro nidera Vavolombelon̈o Jehovah, fotony iro mifen̈y mampianatra olo hamaky teny ndreky hanoratra. Firaka zioty, Vavolombelon̈o Jehovah mbala mampianatra olo fo, baka io mahaitsara fo fomba fampianarandro ndreky fitaovan̈a ampiasaindro. Iro koa nan̈amboatra bokikely, han̈ampian̈a olo tsy mahay mamaky teny na tsy dia nianatra. Efa mandeha 224 tapitrisa aminany io vita pirinty, amy volan̈a mandeha 720 karazany. a
a Ohatra ziô, bokikely Miezaha Mamaky Teny sy Manoratra (malagasy) io misy amy volan̈a 123 karazany, baka io bokikely Tandrin̈esa Zan̈ahary efa misy amy volan̈a mandeha 610.
