Fahatsiarovan̈a nifatesany Jesosy man̈ampy atsika hatoky fa baka amy vidipan̈avotan̈a io hazahoantsika hatsaran̈a maro aminy amaray an̈y, an̈isanizen̈y familoman̈a olo maty. Tsy tiany Jehovah hofoaty foeky olombelon̈o. Zen̈y mahavy fahafatesan̈a io an̈isany raha farany mampalahelo atsika. (1Ko 15:26) Jesosy nalahelo mare nahita iro pianatranany aby io nitomoan̈y, tamy Lazarosy naty. (Jn 11:​33-35) Jesosy io olo lavorary, ke mira fo toetrindro ndreky Babany andan̈itry an̈y. Mety matoky atsika fa Jehovah koa mba malahelo mahita atsika malahelo havantsika maty. (Jn 14:⁠7) Efa tsy din̈iny Jehovah fotoan̈a hamiloman̈a olo nanompo izy jiaby naty in̈y, ke tokony ho karaha zen̈y koa fahitantsika familoman̈a olo maty io.​—Jb 14:​14, 15.

Jehovah io Zan̈ahariny filaminan̈a, ke raha azo antoko, hilamin̈y familomany olo maty. (1Ko 14:​33, 40) Olo amy zen̈y tsy handeha handevin̈y eky, fa handeha hitsena olo aby nivilomin̈y fo. Asa mba azonao onon̈o zen̈y, izikoa anao an̈atiny alahelo mare in̈y? (2Ko 4:​17, 18) Asa anao mba man̈ano mersy Jehovah nan̈amia vidipan̈avotan̈a ndreky nan̈ambara amy Soratra Masin̈y ao fa olo maty mbala ho velon̈o?—Kl 3:⁠15.

• Azovy kamaradinao ndreky havanao ten̈a tianao ho hita amy zen̈y?

• Azovy aminolo aby tantarainy Baiboly ao tianao ho fanojy anao ndreky hikoran̈anao?